ମୁମ୍ବାଇ: ମୁମ୍ବାଇ ଇଣ୍ଡିଆନ୍ସରୁ ଲସିଥ୍ ମଲିଙ୍ଗା କିଛିଦିନ ପାଇଁ ବ୍ରେକ୍ ନେଇଛନ୍ତି । କାରଣ ସେ ଘରୋଇ ଏକ ଦିବସୀୟ ସିରିଜ୍ ଖେଳିବା ପାଇଁ ଗତ ବୁଧବାର ଦିନ ସ୍ବଦେଶକୁ ଫେରି ଆସିଛନ୍ତି । ଏହି ସୂଚନା ଶ୍ରୀଲଙ୍କା କ୍ରିକେଟ୍ ବୋର୍ଡ ପକ୍ଷରୁ ଦିଆଯାଇଛି ।
ତେବେ ଶ୍ରୀଲଙ୍କାର ଏହି ଦ୍ରୁତ ବୋଲର୍ ଚଳିତବର୍ଷ ଆଇପିଏଲ୍ ଲିଗ୍ରେ କେବଳ 2ଟି ମ୍ୟାଚ୍ ଖେଳିଛନ୍ତି । ସୂଚନାଥାଉକି, ଶ୍ରୀଲଙ୍କାରେ ବିଶ୍ବକପ୍ ପୂର୍ବରୁ 4ଦଳୀୟ ଏକ ଘରୋଇ ଟୁର୍ଣ୍ଣାମେଣ୍ଟ ଆୟୋଜିତ କରାଯିବ । ତେଣୁ ଶ୍ରୀଲଙ୍କା କ୍ରିକେଟ୍ ବୋର୍ଡ ମଲିଙ୍ଗାଙ୍କୁ ସ୍ବଦେଶକୁ ପ୍ରତ୍ୟାବର୍ତ୍ତନ କରିବାର ନିଷ୍ପତ୍ତି ନେଇଛି । ଘରୋଇ ଟୁର୍ଣ୍ଣାମେଣ୍ଟରେ ଗାଲେ ଟିମ୍ର ନେତୃତ୍ବ ଭାର ମଲିଙ୍ଗାଙ୍କ କାନ୍ଧରେ ରହିଛି ।
ଏନେଇ ମୁମ୍ବାଇ ଇଣ୍ଡିଆନ୍ସର ଖେଳାଳୀ ସୂର୍ଯ୍ୟକୁମାର ଯାଦବ ମିଡିଆକୁ କହିଛନ୍ତି ଯେ, ଏହି ଲିଗ୍ରେ ମଲିଙ୍ଗା ସମ୍ପୂର୍ଣ୍ଣ ଭାବରେ ଖେଳରୁ ଓହରିବେ ନାହିଁ । ସେ ଭଲ ଫର୍ମରେ ଅଛନ୍ତି । ଯେବେ ଆସିବେ ଟିମ୍କୁ ଫାଇଦା ହେବ । ଶୀଘ୍ର ହିଁ ସେ ଟିମ୍କୁ ପ୍ରତ୍ୟାବର୍ତ୍ତନ କରିବେ ।
