କଲମ୍ବୋ: ଶ୍ରୀଲଙ୍କା ବିପକ୍ଷ ସିରିଜରେ ଅଧିନାୟକତ୍ବ ଦାୟିତ୍ବ ତୁଲାଉଥିବା ଶିଖର ଧୱନ ଅଧିନାୟକ ଭାବେ ନିଜର ଭାବନା ବ୍ୟକ୍ତ କରି କହିଛନ୍ତି ଯେ, ସେ ସମସ୍ତଙ୍କୁ ଏକତ୍ର ଓ ଖୁସିରେ ରଖିବାକୁ ଚାହାନ୍ତି ।
ଶ୍ରୀଲଙ୍କା ଗସ୍ତ ବେଳେ ଭାରତୀୟ ଟିମ ତିନିଟି ଦିନିକିଆ ଓ ତିନିଟି ଟି-20 ମ୍ୟାଚ ଖେଳିବାର କାର୍ଯ୍ୟକ୍ରମ ରହିଛି । ତାରିଖ ପୁନଃ ନିର୍ଦ୍ଧାରିତ ହେବା ପରେ ଜୁଲାଇ 18 ତାରିଖରୁ ଏହି ସିରିଜ ଖେଳାଯିବ । ଜୁଲାଇ 18, 20 ଓ 23 ତାରିଖରେ ତିନୋଟି ଦିନିକିଆ ଖେଳାଯିବାକୁ ଥିବାବେଳେ ଜୁଲାଇ 25, 27 ଓ 29 ରେ ଟି-20 ମ୍ୟାଚ ଖେଳାଯିବ ।
ଧୱନ ଏନେଇ କହିଛନ୍ତି ଯେ, ‘‘ଭାରତୀୟ ଦଳର ଅଧିନାୟକ ହେବା ମୋ ପାଇଁ ଏକ ବଡ଼ ଉପଲବ୍ଧି । ଜଣେ ଅଧିନାୟକ ଭାବେ ସମସ୍ତଙ୍କୁ ଏକତ୍ରିତ ଓ ଖୁସି ରଖିବା ମୋର ଲକ୍ଷ୍ୟ ରହିଛି, ଏହା ହିଁ ସବୁଠାରୁ ଗୁରୁତ୍ବପୂର୍ଣ୍ଣ । ଆମ ପାଖରେ ବହୁତ ଭଲ ଖେଳାଳି ଅଛନ୍ତି, ଭଲ ସପୋର୍ଟ ଷ୍ଟାଫ୍ ମଧ୍ୟ ରହିଛନ୍ତି । ଯାହାଙ୍କ ସହ ଆମେ ପୂର୍ବରୁ କାମ କରିସାରିଛୁ । ମୁଁ ଯେତେବେଳେ ଇଣ୍ଡିଆ A ର ଅଧିନାୟକ ଥିଲି ରାହୁଲ ଦ୍ରାବିଡ କୋଚ ଥିଲେ ଏବଂ ମୁଁ ଅନେକ ଥର NCA ଯାଇଛି । ତେଣୁ ଆମ ମଧ୍ୟରେ ଖୁବ୍ ଭଲ ସମ୍ପର୍କ ରହିଛି । ମୋର ବିଶ୍ବାସ ଯେ ଆମ ପାଖରେ ଉର୍ଜା ଓ ଆତ୍ମବିଶ୍ବାସ ଅଛି, ଯାହା କି ଆମ ଖେଳରେ ଦେଖାଯିବ ।’’
ଦ୍ରାବିଡଙ୍କ ସହ ନିଜ ସମ୍ପର୍କ ନେଇ ପଚରାଯିବାରୁ ଧୱନ କହିଛନ୍ତି, ‘‘ରାହୁଲ ଭାଇଙ୍କ ସହ ମୋର ଖୁବ୍ ଭଲ ସମ୍ପର୍କ ରହିଛି । ମୁଁ ରଣଜୀ ଖେଳିବା ଆରମ୍ଭ କଲାବେଳେ ତାଙ୍କ ବିପକ୍ଷରେ ଖେଳିଛି ଓ ସେବେଠାରୁ ମୁଁ ତାଙ୍କୁ ଜାଣିଛି । ଇଣ୍ଡିଆ A ପାଇଁ ଖେଳିବାବେଳେ ସେ କୋଚ ଥିଲେ ତେଣୁ ତାଙ୍କୁ ମୁଁ ଭଲଭାବେ ଜାଣେ । ଯେତେବେଳେ ସେ NCA ନିର୍ଦ୍ଦେଶକ ଥିଲେ, ସେତେବେଳେ ମଧ୍ୟ ଅନେକ ସମୟରେ ଆମର ସାକ୍ଷାତ ହୁଏ । ଆଉ ବର୍ତ୍ତମାନ ଯେତେବେଳେ ଆମକୁ 6ଟି ମ୍ୟାଚରେ ଏକତ୍ର ରହିବାକୁ ସୁଯୋଗ ମିଳିଛି ମୁଁ ଭାବୁଛି ଏହା ଖୁବ ମଜାଦାର ହେବ ଓ ଆମେ ଦୁହେଁ ଖୁବ୍ ଭଲ ଭାବେ ଯୋଡ଼ି ହୋଇ ପାରିବୁ ।’’
ଯୁବ ଖେଳାଳିଙ୍କ ପାଇଁ ଏହି ସିରିଜ ଖୁବ୍ ଗୁରୁତ୍ବପୂର୍ଣ୍ଣ ହେବ ବୋଲି ଧୱନ କହିଛନ୍ତି । ନିଜ ଘର ଛାଡ଼ି ସ୍ବପ୍ନ ସାକାର କରିବା ପାଇଁ ସେମାନେ ଆସିଛନ୍ତି ଓ ତାଙ୍କ ସ୍ବପ୍ନ ପୂରଣ ହେଉଛି ବୋଲି ମତ ଦେଇଛନ୍ତି ଶିଖର ।
ବ୍ୟୁରୋ ରିପୋର୍ଟ, ଇଟିଭି ଭାରତ
