କଲମ୍ବୋ: ଭାରତ ବିପକ୍ଷ ସୀମିତ ଓଭର ସିରିଜ ପୂର୍ବରୁ ଆୟୋଜକ ଶ୍ରୀଲଙ୍କାକୁ ବଡ ଝଟକା । ଟିମର ଅଭିଜ୍ଞ ବାମହାତୀ ବ୍ୟାଟ୍ସମ୍ୟାନ କୁଶଲ ପରେରା ଭାରତ ବିପକ୍ଷ ସିରିଜରୁ ବାଦ ପଡିଛନ୍ତି ।
ପରେରା କାନ୍ଧରେ ଯନ୍ତ୍ରଣା ଅନୁଭବ କରୁଥିବା ଜଣାପଡିଛି ଓ ସୁସ୍ଥ ହେବା ପାଇଁ 6ରୁ 8 ସପ୍ତାହ ସମୟ ଲାଗିବ ବୋଲି କହିଛନ୍ତି ଟିମ ଡାକ୍ତର ।
ୟୁକେରେ କୋଭିଡ ନିୟମ ଉଲ୍ଲଙ୍ଘନ କରିବା ପରେ ୱିକେଟ କିପର ନିରୋସାନ ଡିକୱାଲା ନିଲମ୍ବିତ ହୋଇଥିଲେ । ଫଳରେ ପରେରା ୱିକେଟକିପର ପାଇଁ ପ୍ରମୁଖ ବିକଳ୍ପ ଥିଲେ ।
ପୂର୍ବରୁ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ(BCCI) ଓ ଶ୍ରୀଲଙ୍କା କ୍ରିକେଟ ବୋର୍ଡ(SLC) ଆଗାମୀ ଭାରତ ଓ ଶ୍ରୀଲଙ୍କା ସୀମିତ ଓଭର ସିରିଜର ସଂଶୋଧିତ ସୂଚୀ ଘୋଷଣା କରିଛନ୍ତି ।
ଏହି ଗସ୍ତରେ ଶ୍ରୀଲଙ୍କା ବିପକ୍ଷରେ ଟିମ ଇଣ୍ଡିଆ 3ଟି ଦିନିକିଆ ଓ 3ଟି ଟି20 ମ୍ୟାଚ ଖେଳିବା ନେଇ ସୂଚୀ ରହିଛି । ସିରିଜର ପ୍ରଥମ ମ୍ୟାଚ 18 ଜୁଲାଇ 2021ରୁ ଆରମ୍ଭ ହେବ ।
ଦିନିକିଆ ସିରିଜର ମ୍ୟାଚ ଜୁଲାଇ 18, 20 ଓ 23ରେ ଖେଳାଯିବ । ସେହିପରି ଟି20 ସିରିଜର 3ଟି ମ୍ୟାଚ୍ ଜୁଲାଇ 25, 27 ଓ 29ରେ ଖେଳାଯିବ ।
ବ୍ୟୁରୋ ରିପୋର୍ଟ, ଇଟିଭି ଭାରତ
