ଦୁବାଇ: ଆଇସିସି ପ୍ରକାଶ କଲା ସାପ୍ତାହିକ ଦିନିକିଆ ରାଙ୍କିଙ୍ଗ ତାଲିକା । ବ୍ୟାଟିଂ ତାଲିକାରେ ଭାରତୀୟ ଅଧିନାୟକ ବିରାଟ କୋହଲି ବଜାୟ ରଖିଛନ୍ତି ଦ୍ବିତୀୟ ସ୍ଥାନ । ତୃତୀୟ ସ୍ଥାନରେ ରହିଛନ୍ତି ହିଟମ୍ୟାନ ରୋହିତ ଶର୍ମା । ସେପଟେ ବୋଲିଂ ତାଲିକାରେ ନିଜର ପଞ୍ଚମ ସ୍ଥାନ ପକ୍କା ରଖିଛନ୍ତି ଭାରତୀୟ ଦ୍ରୁତ ବୋଲର ଜସପ୍ରୀତ ବୁମରା ।
ଶ୍ରୀଲଙ୍କା ଦ୍ରୁତ ବୋଲର ଦୁଷ୍ମନ୍ତ ଚାମୀରା ଓ ଅଧିନାୟକ କୁସଲ ପରେରା ଆଇସିସିର ସଦ୍ୟତମ ରାଙ୍କିଙ୍ଗ ତାଲିକାରେ ଅନେକ ସ୍ଥାନ ଉପରକୁ ଉଠିଛନ୍ତି । ଆଇସିସି ପୁରୁଷ କ୍ରିକେଟ ବିଶ୍ବକପ ସୁପର ଲିଗ ସିରିଜରେ ବାଂଲାଦେଶକୁ 97 ରନରେ ପରାସ୍ତ କରିବା ପରେ ଉଭୟଙ୍କ ସ୍ଥାନରେ ଉନ୍ନତି ହୋଇଛି ।
ଚାମୀରା ଏହି ମ୍ୟାଚରେ 16 ରନ ଦେଇ 5 ୱିକେଟ ନେଇଥିବାରୁ 27 ସ୍ଥାନ ଉପରକୁ ଉଠି କ୍ୟାରିୟରର ଶ୍ରେଷ୍ଟତମ 33ତମ ସ୍ଥାନରେ ରହିଛନ୍ତି । ସିରିଜ ଆରମ୍ଭରେ ଚାମୀରା ରାଙ୍କିଙ୍ଗ ତାଲିକାରେ 72ତମ ସ୍ଥାନରେ ରହିଥିଲେ । ସେପଟେ ପରେରାଙ୍କ ଷଷ୍ଠ ଦିନିକିଆ ଶତକ ତାଙ୍କୁ 13 ଟି ସ୍ଥାନ ଉପରକୁ ଉଠାଇ 42ତମ ସ୍ଥାନରେ ପହଞ୍ଚାଇଛି ।
ଶ୍ରୀଲଙ୍କାର ଆଉ ଜଣେ ଖେଳାଳି ଧନଞ୍ଜୟ ଡି ସିଲଭା 10ଟି ସ୍ଥାନ ଉପରକୁ ଉଠି 85ତମ ସ୍ଥାନରେ ରହିଛନ୍ତି । ବୋଲିଂ ତାଲିକାରେ ମଧ୍ୟ ଦୁଇଟି ସ୍ଥାନ ଉପରକୁ ଉଠି 79ତମ ସ୍ଥାନରେ ପହଞ୍ଚିଛନ୍ତି ଡି ସିଲଭା ।
ବାଂଲାଦେଶର ଖଳାଳି ମହମ୍ମଦୁଲ୍ଲାଙ୍କ 53 ରନ୍ର ସ୍କୋର ତାଙ୍କୁ 36ତମ ସ୍ଥାନରେ ରଖିଛି । ଦ୍ରୁତ ବୋଲର ତାସ୍କିନ ଅହମଦ 12 ସ୍ଥାନ ଆଗକୁ ବଢ଼ି 88ତମ ସ୍ଥାନରେ ରହିଛନ୍ତି ।
@ANI
