ହାଇଦ୍ରାବାଦ: ବିବାହ ବନ୍ଧନରେ ବାନ୍ଧି ହେବେ ଟିମ୍ ଇଣ୍ଡିଆର ଷ୍ଟାର୍ ବୋଲର ଦୀପକ ଚହର । ବାହାଘରକୁ ନେଇ ବିଭିନ୍ନ ସମାରୋହ ଆରମ୍ଭ ହୋଇଛି । ମଙ୍ଗଳବାର ରାତିରେ ଦୀପକ ଚହର ଓ ତାଙ୍କ ଭାବି ପତ୍ନୀଙ୍କ ସଙ୍ଗୀତ ସମାରୋହ ଅନୁଷ୍ଠିତ ହୋଇଛି । ଏଥିରେ ଉଭୟ ଦୀପକ ଓ ତାଙ୍କ ଭାବି ପତ୍ନୀ ଜୟା ନାଚରେ ମସଗୁଲ୍ ଥିବା ଦେଖାଯାଇଛି ।
ସଙ୍ଗୀତ ସମାରୋହରେ ଭାଙ୍ଗଡ଼ା କରୁଥିଲେ ଦୀପକ ଚହର ଓ ଜୟା ଭରଦ୍ବାଜ । ଦୁହିଁଙ୍କ ନାଚ ଦେଖିବା ପରେ ନିଜକୁ ରୋକି ପାରିନଥିଲେ ଉପସ୍ଥିତ ଅତିଥି । ଅତିଥିମାନେ ମଧ୍ୟ ଷ୍ଟେଜ୍ ଉପରେ ନାଚ କରି ସମାରୋହରେ ଚାରଚାନ୍ଦ ଲଗାଇଥିଲେ । ଆଗ୍ରାର ଫତେହପୁର ନିକଟରେ ଥିବା ଏକ ପଞ୍ଚ ତାରକା ହୋଟେଲ୍ରେ ଦୀପକ ଚହରଙ୍କ ବିବାହ ଉତ୍ସବ ଅନୁଷ୍ଠିତ ହେଉଛି ।
ସଙ୍ଗୀତ ସମାରୋହ ପରେ ବୁଧବାର ସକାଳୁ ଦୀପକ ଓ ଜୟାଙ୍କ ହଳଦୀ ରସମ କରାଯାଇଛି । ବୁଧବାର ବିଳମ୍ବିତ ରାତିରେ ବର ସାଜିବେ ଟିମ୍ ଇଣ୍ଡିଆର ଫାଷ୍ଟ ବୋଲର ଦୀପକ ଚହର । ଆଇପିଏଲ୍ ମ୍ୟାଚ୍ ବେଳେ ଷ୍ଟାଡିୟମରେ ବାନ୍ଧବୀ ଜୟା ଭରଦ୍ବାଜଙ୍କୁ ପ୍ରପୋଜ୍ କରି ଚର୍ଚ୍ଚାରେ ରହିଥିଲେ ଏହି ଯୋଡ଼ି । ବର୍ତ୍ତମାନ ଏହି ବିବାହ ବନ୍ଧନରେ ବାନ୍ଧି ହେବାକୁ ଯାଉଛନ୍ତି । ବିବାହ କାର୍ଯ୍ୟକ୍ରମରେ ବହୁ ଜଣାଶୁଣା କ୍ରିକେଟର ଯୋଗ ଦେବାର କାର୍ଯ୍ୟକ୍ରମ ରହିଛି ।
