ହାଇଦ୍ରାବାଦ: ରବିବାର ଏସିଆ କପ୍ ୨୦୨୨ରେ ପାକିସ୍ତାନଠାରୁ ଭାରତ ପରାଜିତ ହେବାପରେ ଭାରତୀୟ ବାମହାତୀ ଫାଷ୍ଟ ବୋଲର ଅର୍ଶଦୀପ ସିଂହ ସୋସିଆଲ ମିଡିଆ ଟ୍ରୋଲ୍ର ଶିକାର ହୋଇଛନ୍ତି । ଏହି ଫାଷ୍ଟ ବୋଲରଙ୍କ ୱିକିପିଡିଆ ପେଜ୍ରେ ଏଡିଟ୍ କରି ଖଲିସ୍ତାନ ଲିଙ୍କ୍ ଯୋଡ଼ା ଯାଇଛି (fast bowler Arshdeep Singh Wikipedia page edited) । ସୂଚନା ଏବଂ ପ୍ରଯୁକ୍ତିବିଦ୍ୟା ମନ୍ତ୍ରଣାଳୟ ଏହାକୁ ଗମ୍ଭୀରତାର ସହ ନେଇ ୱିକିପିଡିଆ ପେଜ୍ ଅଧିକାରୀଙ୍କୁ ସ୍ପଷ୍ଟୀକରଣ ମାଗିଛି ।
ସୁପର 4 ପର୍ଯ୍ୟାୟର ପାକିସ୍ତାନ ବିପକ୍ଷ ମ୍ୟାଚ୍ର ଘଡ଼ିସନ୍ଧୀ ମୂହୁର୍ତ୍ତରେ ଆସିଫ ଅଲ୍ଲୀଙ୍କ ଏକ ସହଜ କ୍ୟାଚ୍ ଛାଡ଼ି ଦେଇଥିଲେ । ଏହାପରେ ଆସିଫ୍ ଅଲ୍ଲୀ ୮ଟି ବଲ୍ରୁ ୧୬ ରନ୍ ସଂଗ୍ରହ କରି ପାକସ୍ତାନକୁ ବିଜୟୀ କରାଇଥିଲେ । ଏହାପରେ ଅର୍ଶଦୀପ ସିଂହଙ୍କୁ ସୋସିଆଲ ମିଡିଆରେ ଟ୍ରୋଲ୍ କରାଯିବାରେ ଲାଗିଛି । ତାଙ୍କୁ ଖଲିସ୍ତାନୀ ସଂଗ୍ରାମୀ କହି ଟ୍ରୋଲ୍ କରାଯାଉଥିବା ବେଳେ ଆଜି (ଅଗଷ୍ଟ ୫) ତାଙ୍କ ୱିକିପିଡିଆ ପେଜ୍କୁ ଏଡିଟ୍ କରି ସେଥିରେ ଖଲିସ୍ତାନୀ ଲିଙ୍କ୍ ଯୋଡ଼ା ଯାଇଛି । ଏହାକୁ ନେଇ ୱିକିପିଡିଆ ଅଧିକାରୀଙ୍କୁ ସମନ ଜାରି କରାଯାଇଛି । ଅର୍ଶଦୀପ ସିଂହଙ୍କୁ ପେଜ୍ କିଏ ଏଡିଟ୍ କରିଛି ଓ କାହିଁକି ଏହାକୁ ସର୍ବସାଧାରଣ କରାଗଲା ବୋଲି ପ୍ରଶ୍ନ କରିଛି ସୂଚନା ଏବଂ ପ୍ରଯୁକ୍ତିବିଦ୍ୟା ମନ୍ତ୍ରଣାଳୟ । ଏ ବାବଦରେ ଅଧିକାରୀଙ୍କୁ ସୂଚନା ଏବଂ ପ୍ରଯୁକ୍ତିବିଦ୍ୟା ମନ୍ତ୍ରଣାଳୟ ନିକଟରେ ହାଜର ହେବାକୁ କୁହାଯାଇଛି ।
୨୩ ବର୍ଷୀୟ ଯୁବ ଫାଷ୍ଟ ବୋଲର ପାକିସ୍ତାନ ବିପକ୍ଷରେ 7 ରନ୍ ହାରରେ ୩.୫ ଓଭରରେ ୨୭ ରନ୍ ଖର୍ଚ୍ଚ କରି ଗୋଟିଏ ୱିକେଟ ହାସଲ କରିଥିଲେ । ତେବେ ରବି ବିଷ୍ଣୋଇଙ୍କ ବଲ୍ରେ ଆସିଫ ଅଲ୍ଲୀଙ୍କ କ୍ୟାଚ୍ ତାଙ୍କ ହାତରୁ ଖସି ଯାଇଥିଲା । ଏହାପରେ ସେ ସୋସିଆଲ ମିଡିଆ ଟ୍ରଲ୍ର ଶିକାର ହୋଇଥିବା ବେଳେ ତାଙ୍କ ୱିକିପିଡିଆ ପେଜ୍ ଏଡିଟ୍ କରାଯାଇଛି ।
ୱିକିପିଡିଆ ପେଜ୍ରେ ଲେଖାଯାଇଛି, "୨୦୧୮ରେ 19 ବର୍ଷରୁ କମ୍ ବିଶ୍ବକପ୍ କ୍ରିକେଟ ପାଇଁ ଖଲିସ୍ତାନ ସ୍କ୍ବାଡ୍ରେ ସାମିଲ ହୋଇଥିଲେ । ଜୁଲାଇ ୨୦୨୨ରେ ସେ ଖଲିସ୍ତାନ ପାଇଁ ଅନ୍ତର୍ଜାତୀୟ କ୍ରିକେଟରେ ଡେବ୍ୟୁ କରିଥିଲେ । ଅଗଷ୍ଟ ୨୦୨୨ରେ ସେ ଏସିଆ କପ୍ ପାଇଁ ଖଲିସ୍ତାନ ସ୍କ୍ବାଡ୍ରେ ସାମିଲ ହୋଇଥିଲେ ।"
ସେ ଅର୍ଶଦୀପଙ୍କ ସମର୍ଥନରେ ବାହାରିଛନ୍ତି ଅନେକ ପୂର୍ବତନ କ୍ରିକେଟର । ହରଭଜନ ସିଂହ, ଆକାଶ ଚୋପ୍ରା, ପାକିସ୍ତାନୀ କ୍ରିକେଟର ମହମ୍ମଦ ହଫିଜ୍ ପ୍ରମୁଖ ଅର୍ଶଦୀପଙ୍କୁ ଟ୍ରୋଲ୍ ନକରିବାରୁ ପରାମର୍ଶ ଦେଇଛନ୍ତି । ସେହିଭଳି ଟ୍ରୋଲ୍ କରୁଥିବା ୟୁଜର୍ସଙ୍କୁ ଭର୍ତ୍ସନା କରିଛନ୍ତି ।