ହାଇଦ୍ରାବାଦ: ଅଷ୍ଟ୍ରେଲିଆରେ ଦମଦାର ପ୍ରଦର୍ଶନ ପରେ ୱିକେଟ କିପର ବ୍ୟାଟ୍ସମ୍ୟାନ ଋଷଙ ପନ୍ତଙ୍କ କ୍ରିକେଟ ଜୀବନରେ ନୂଆ ମୋଡ ଆସିଛି । ଚମତ୍କାର ସଟ୍ ସହ ସେ ବିଶ୍ବ କ୍ରିକେଟର ଅନେକ ତାରକାଙ୍କୁ ପ୍ରଭାବିତ କରିଛନ୍ତି । ଇଂଲଣ୍ଡ ବିପକ୍ଷ ଘରୋଇ ସିରିଜରେ ମଧ୍ୟ ଭେଟେରାନ ଜେମ୍ସ ଆଣ୍ଡରସନଙ୍କୁ ଦର୍ଶନୀୟ ଓ କିଛି ଅବିଶ୍ବସନୀୟ ସଟ୍ ଖେଳି ଚକିତ କରିଥିଲେ ପନ୍ତ ।
ନିକଟ ଅତୀତରେ ପନ୍ତଙ୍କ ଏହି ସବୁ ପ୍ରଭାବୀ ପ୍ରଦର୍ଶନ ପୂର୍ବତନ କ୍ରିକେଟର ମହମ୍ମଦ କୈଫଙ୍କୁ ପ୍ରଭାବିତ କରିଛି । କୈଫ କହିଛନ୍ତି, ଆଗାମୀ ଟି-20 ବିଶ୍ବକପରେ ଟିମ ଇଣ୍ଡିଆର ମଧ୍ୟକ୍ରମ ବ୍ୟାଟିଂର ବଡ ଶକ୍ତି ପାଲଟିବେ ପନ୍ତ । ଟି20 ବିଶ୍ବକପରେ ପନ୍ତ ପ୍ରମୁଖ ଭୂମିକା ନିଭାଇବେ ବୋଲି କହିଛନ୍ତି କୈଫ ।
ସାବା କରିମ, ଅମିତ ମିଶ୍ରଙ୍କ ସହିତ ଭାରତ-ଶ୍ରୀଲଙ୍କା ସିରିଜରେ କମେଣ୍ଟେଟର ଭୂମିକାରେ ନଜର ଆସିବେ କୈଫ । ତେବେ ଏହି ସିରିଜ ପୂର୍ବରୁ ଭେଟେରାନ ପୂର୍ବତନ କ୍ରିକେଟର କହିଛନ୍ତି, ଟି20 ବିଶ୍ବକପରେ ଭାରତୀୟ ମଧ୍ୟକ୍ରମ ବ୍ୟାଟିଂର ମଜଭୁତ ସ୍ତମ୍ବ ହେବେ ହାର୍ଦ୍ଦିକ ପାଣ୍ଡ୍ୟା । ଶ୍ରୀଲଙ୍କା ସିରିଜରେ ମଧ୍ୟ ହାର୍ଦ୍ଦିକ ନିର୍ଣ୍ଣାୟକ ସାଜିପାରନ୍ତି ବୋଲି ପୂର୍ବାନୁମାନ କରିଛନ୍ତି କୈଫ ।
ବ୍ୟୁରୋ ରିପୋର୍ଟ, ଇଟିଭି ଭାରତ
