ଲଣ୍ଡନ: ଲର୍ଡ୍ସ ଗ୍ରାଉଣ୍ଡରେ ଖେଳାଯାଉଛି ନ୍ୟୁଜିଲାଣ୍ଡ ବନାମ ଇଂଲଣ୍ଡ 2 ମ୍ୟାଚ ବିଶିଷ୍ଟ ଟେଷ୍ଟ ସିରିଜର ପ୍ରଥମ ମ୍ୟାଚ । ଟସ୍ ଜିତି ପ୍ରଥମେ ବ୍ୟାଟିଂ ନିଷ୍ପତ୍ତି ନେଇଛନ୍ତି ନ୍ୟୁଜିଲାଣ୍ଡ ଅଧିନାୟକ କେନ୍ ୱିଲିୟମସନ । ଏହି ମ୍ୟାଚରେ ଲର୍ଡ୍ସ ଷ୍ଟାଡିଅମକୁ ଦର୍ଶକ ଫେରିଛନ୍ତି । କୋରୋନା ମହାମାରୀ ଯୋଗୁଁ ଗତ ଗୋଟିଏ ବର୍ଷରୁ ଅଧିକ ସମୟ ଧରି ବିନା ଦର୍ଶକରେ ଖେଳାଯାଉଥିଲା ମ୍ୟାଚ ।
ପ୍ରଥମ ମ୍ୟାଚରେ ଇଂଲଣ୍ଡ ପାଇଁ ଡେବ୍ୟୁ କରୁଛନ୍ତି ୱିକେଟ କିପର ବ୍ୟାଟ୍ସମ୍ୟାନ ଜେମ୍ସ ବ୍ରାସି ଓ ଦ୍ରୁତ ବୋଲର ଓଲି ରବିନସନ । ଆଇପିଏଲ ପରେ ଜସ ବଟଲର ଓ ଜନି ବେୟାରଷ୍ଟ୍ରୋଙ୍କୁ ବିଶ୍ରାମ ଦେବାକୁ ଇଂଲଣ୍ଡର ନିଷ୍ପତ୍ତି ପରେ ବ୍ରାସିଙ୍କୁ ଟିମରେ ସ୍ଥାନ ଦିଆଯାଇଛି । ଏହାସହ ଇଂଲଣ୍ଡ ୱିକେଟ କିପର ବେନ୍ ଫୋକ୍ସ ଆହତ ହୋଇ ମ୍ୟାଚରୁ ବାଦ ପଡ଼ିବା କାରଣରୁ ମଧ୍ୟ ବ୍ରାସିଙ୍କୁ ସୁଯୋଗ ମିଳିଛି ।
ଅନ୍ୟପଟେ ନ୍ୟୁଜିଲାଣ୍ଡ ଟିମରେ ଓପନର ଡେଭୋନ କନୱେଙ୍କୁ ସୁଯୋଗ ଦିଆଯାଇଛି । ଏନେଇ ପୂର୍ବରୁ ନ୍ୟୁଜିଲାଣ୍ଡ ଅଧିନାୟକ ୱିଲିୟମସନ ଘୋଷଣା କରିଥିଲେ ।
ଏହି ସିରିଜ ପରେ ନ୍ୟୁଜିଲାଣ୍ଡ ଟିମ୍ ବିଶ୍ବ ଟେଷ୍ଟ ଚାମ୍ପିୟନଶିପ ଫାଇନାଲରେ ଭାରତ ସହ ମୁକାବିଲା କରିବ । ନ୍ୟୁଜିଲାଣ୍ଡ ଟିମକୁ ସ୍ପିନର ମିଚେଲ ସାଣ୍ଟନର ଓ ଅଲରାଉଣ୍ଡର କୋଲିନ ଡି ଗ୍ରାଣ୍ଡହୋମ ମଧ୍ୟ ଫେରିଛନ୍ତି ।
ଶେଷ ଖବର ସୁଦ୍ଧା, ନ୍ୟୁଜିଲାଣ୍ଡ 23.3 ଓଭର ଖେଳି ଗୋଟିଏ ଓ୍ବିକେଟ୍ ବିନିମୟରେ 85 ରନ ସ୍କୋର କରିଛି । ତେବେ ଓଲି ରବିନସନ ବିପକ୍ଷ ଦଳକୁ ପ୍ରଥମ ଝଟକା ଦେଇଛନ୍ତି । ସେ ଟମ୍ ଲାଥମଙ୍କ ଓ୍ବିକେଟ ଅକ୍ତିଆର କରିଛନ୍ତି ।
@ANI
