ଅହମ୍ମଦାବାଦ: ବିଶ୍ବକପ୍ ୨୦୨୩ ସମ୍ପୂର୍ଣ୍ଣ ଟୁର୍ଣ୍ଣାମେଣ୍ଟରେ ଦମଦାର ପ୍ରଦର୍ଶନ କରୁଥିବା ଭାରତୀୟ ଯୁବ ଷ୍ଟାର ବ୍ୟାଟରମାନେ ଫାଇନାଲ୍ ଭଳି ବଡ଼ ମଞ୍ଚରେ ଫେଲ୍ ମାରିଛନ୍ତି । ଅଧିନାୟକ ରୋହିତ ଶର୍ମା ଦଳକୁ ବିସ୍ଫୋରକ ଆରମ୍ଭ ଦେଇଥିଲେ ମଧ୍ୟ ଗିଲ୍ ଓ ଆୟର ଦଳକୁ ନିରାଶ କରି ପାଭିଲିୟନ ଫେରିଛନ୍ତି । ସେପଟେ ରୋହିତ ମଧ୍ୟ ଅର୍ଦ୍ଧଶତକ କରିବା ପୂର୍ବରୁ ୪୭ ରନ୍ରେ ଆଉଟ୍ ହୋଇଯାଇଛନ୍ତି । ଫଳରେ କଠିନ ପରିସ୍ଥିତିରେ ପଡ଼ିଛି ଟିମ୍ ଇଣ୍ଡିଆ । ରିପୋର୍ଟ ଲେଖା ହେବାବେଳକୁ ବିରାଟ କୋହଲି ଓ କେଏଲ୍ ରାହୁଲ ପରିସ୍ଥିତିକୁ ସମ୍ଭାଳି ବ୍ୟାଟିଂ କରୁଥିଲେ ।
ବିଶ୍ବକପ୍ ୨୦୨୩ରେ ଆଜି ଫାଇନାଲ୍ ଖେଳୁଛନ୍ତି ଭାରତ ଓ ଅଷ୍ଟ୍ରେଲିଆ । ଟସ୍ ଜିତି ପ୍ରଥମେ ଭାରତକୁ ବ୍ୟାଟିଂ ଆହ୍ବାନ କରିଛି ଅଷ୍ଟ୍ରେଲିଆ । ଜବାବରେ ଭାରତୀୟ ଅଧିନାୟକ ରୋହିତ ଶର୍ମା ମଧ୍ୟ ଦଳକୁ ଭଲ ଆରମ୍ଭ ଦେଇଥିଲେ । ସବୁ ମ୍ୟାଚ୍ ଭଳି ଫାଇନାଲ୍ରେ ମଧ୍ୟ ରୋହିତ ବିସ୍ଫୋରକ ବ୍ୟାଟିଂ କରିଥିଲେ । କିନ୍ତୁ ତାଙ୍କୁ ଷ୍ଟାର ଓପନର ଗିଲ୍ଙ୍କ ସାଥ୍ ମିଳିନଥିଲା । ଗିଲ୍ କେବଳ ୪ ରନ୍ କରି ୫ମ ଓଭରର ଦ୍ବିତୀୟ ବଲରେ ମିଚେଲ ଷ୍ଟାର୍କଙ୍କ ବଲରେ ଆଉଟ ହୋଇଥିଲେ । ହେଲେ ରୋହିତଙ୍କ ଉପରେ ଏହାର କୌଣସି ପ୍ରଭାବ ପଡ଼ିନଥିଲା । ସେ ନିଜର ଚିରାଚରିତ ଢଙ୍ଗରେ ଛକା ଓ ଚୌକା ମାରିବା ଜାରି ରଖିଥିଲେ ।
ଏହାପରେ ବିରାଟ କୋହଲି ମଧ୍ୟ ଦମଦାର ବ୍ୟାଟିଂ ଆରମ୍ଭ କରିଥିଲେ । ସେ ଷ୍ଟାର୍କଙ୍କୁ ଲଗାତର ୩ ଚୌକା ମାରି କଙ୍ଗାରୁ ବୋଲରଙ୍କ ଉପରେ ଚାପ ପକାଇଥିଲେ । ହେଲେ ଧୂଆଁଧାର ବ୍ୟାଟିଂ କରୁଥିବା ରୋହିତ କେବଳ ୪୭ ରନ କରି ଆଉଟ୍ ହୋଇଯାଇଥିଲେ । ଅର୍ଦ୍ଧଶତକ କରିବା ପୂର୍ବରୁ ଅଧିନାୟକ ଆଉଟ୍ ହେବା ପରେ ଶ୍ରେୟସ ଆୟର ବ୍ୟାଟିଂ କରିବାକୁ ଆସି ଚୌକାରୁ ଇନିଂସ୍ ଆରମ୍ଭ କରିଥିଲେ । ହେଲେ ସେ ସେହି ୪ ରନ୍ ହିଁ କରିବାରେ ସକ୍ଷମ ହୋଇଥିଲେ । ଦଳୀୟ ସ୍କୋର ୮୧ ହୋଇଥିବାବେଳେ ୧୦.୨ ଓଭରରେ ଅଧିନାୟକ ପ୍ୟାଟ୍ କମିନ୍ସଙ୍କ ବଲ୍ରେ ପାଭିଲିୟନ ଫେରିଥିଲେ ଆୟର ।
ଦୁଇ ୟଙ୍ଗ୍ଷ୍ଟାର ଫେଲ୍ ମାରିଥିବାବେଳେ ଆକ୍ରାମକ ଆରମ୍ଭ କରିଥିବା ଅଧିନାୟକ ରୋହିତ ଶର୍ମା ମଧ୍ୟ ପିଚ୍ରେ ନାହାନ୍ତି । ଫଳରେ ଦଳକୁ କଠିନ ପରିସ୍ଥିତିରୁ ବାହାର କରିବା ପାଇଁ ବିରାଟ କୋହଲି ଓ କେଏଲ୍ ରାହୁଲ ପରିସ୍ଥିତିକୁ ବୁଝି ବ୍ୟାଟିଂ ଜାରି ରଖିଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
