କଟକ: ଦୁଇ ବର୍ଷ ପରେ ବାରବାଟୀକୁ ଫେରିଛି ଅନ୍ତର୍ଜାତୀୟ ମ୍ୟାଚ । ଡିସେମ୍ବର 22ରେ ଭାରତ-ୱେଷ୍ଟଇଣ୍ଡିଜ ଦିନିକିଆ ସିରିଜର ଗୋଟିଏ ମ୍ୟାଚ ବାରବାଟୀରେ ଖେଳାଯିବ । ଏହାକୁ ନେଇ ଓଡିଶା କ୍ରିକେଟପ୍ରେମୀ ଯେତିକି ଖୁସିହେବା କଥା, ସେତିକି ନୁହଁନ୍ତି ।
କାରଣ ବାରବାଟୀରେ ପ୍ରିୟ କ୍ରିକେଟରଙ୍କ ଖେଳ ଦେଖିବାକୁ ଅପେକ୍ଷା କରିବାକୁ ପଡିଛି 2ବର୍ଷ । ବାରଵାଟୀରେ ଦିନକୁ ଦିନ କମିବାକୁ ଲାଗିଲାଣି ଅନ୍ତର୍ଜାତୀୟ ମ୍ୟାଚ । ତେବେ ବର୍ଷକୁ ଯଦି ଗୋଟିଏ କି ଦୁଇଟି ମ୍ୟାଚ ହୁଅନ୍ତା, ଓଡିଶା ଖେଳାଳି ସମେତ ଅନ୍ୟ ଯୁବ କ୍ରିକେଟର କିଛି ଶିଖିବାର ସୁଯୋଗ ପାଆନ୍ତେ । ଅନ୍ତର୍ଜାତୀୟସ୍ତରୀୟ ଖେଳାଳିଙ୍କ ସହ ଗ୍ରାଉଣ୍ଡରେ ଅଭ୍ୟାସ କରି ନିଜ ଦକ୍ଷତା ପରଖି ପାରନ୍ତେ । ଏହା ମଧ୍ୟ ଯୁବ କ୍ରିକେଟରଙ୍କ ମନୋବଳ ବେଶ ବଢ଼ନ୍ତା ବୋଲି କହିଛନ୍ତି କ୍ଲବ କ୍ରିକେଟର ଶୁଭ୍ରାଂଶୁ ।
ଅନ୍ୟପଟେ ଓସିଏ ପାଖରେ ସବୁ ପୃଷ୍ଠଭୂମି ରହିଛି । ହେଲେ କେଉଁ ତ୍ରୁଟି ଯୋଗୁ ଅତ୍ୟଧିକ ଅନ୍ତର୍ଜାତୀୟ ମ୍ୟାଚ ବାରବାଟୀରେ ହୋଇପାରୁନି ବୋଲି ପ୍ରଶ୍ନ କରିଛନ୍ତି ପୂର୍ବତନ ରଣଜୀ ଖେଳାଳି ପବନ ଅଗ୍ରୱାଲ । ଓଡିଶା କ୍ରିକେଟ ଆସୋସିଏସନରେ ଉନ୍ନତ ମାନର ଗ୍ରାଉଣ୍ଡ, ଗ୍ୟାଲେରୀ, ପାର୍କିଂ ସ୍ଥାନ, ଅଭ୍ୟାସ ପିଚ ରହିଥିବା ସତ୍ତ୍ବେ ମ୍ୟାଚ ନହେବା ଦୁର୍ଭାଗ୍ୟଜନକ । ଯଦି ଓସିଏ ଏହି ପ୍ରସଙ୍ଗକୁ ଗୁରୁତ୍ୱର ସହ ନେଇ ବିସିସିଆଇର ଦୃଷ୍ଟିଗୋଚର କରନ୍ତା ତେବେ କିଛି ସମ୍ଭବ ହୋଇପାରନ୍ତା ବୋଲି ସେ କହିଛନ୍ତି ।
ଅନ୍ୟ ଷ୍ଟାଡିୟମରେ ନିୟମିତ ମ୍ୟାଚ ହେଇଥିବା ବେଳେ କାହିଁକି ବାରବାଟିରେ ମ୍ୟାଚ ହେଉନାହିଁ ? ତାକୁ ନେଇ ଉଠିଛି ପ୍ରଶ୍ନ । ମ୍ୟାଚ ପାଇଁ ସବୁ ଆନୁସଙ୍ଗିକ ବ୍ୟବସ୍ଥା ମହଜୁଦ ଥିବା ବେଳେ ମ୍ୟାଚ ହେବାରେ ଅସୁବିଧା କେଉଁଠି ବୋଲି କ୍ରୀଡାପ୍ରେମୀ ପ୍ରଶ୍ନ କରିଛନ୍ତି ।
ସେପଟେ OCAର ସ୍ଥାଣୁତାକୁ ନେଇ ପ୍ରଶ୍ନ ଉଠାଇଛନ୍ତି ପୂର୍ବତନ କ୍ରିକେଟର । ବାରବାଟୀରେ ଶେଷ ଦିନିକିଆ 2017 ଜାନୁୟାରୀ 19ରେ ଭାରତ-ଇଂଲଣ୍ଡ ମଧ୍ୟରେ ହୋଇଥିଲା ଓ ସେହିବର୍ଷ ଡିସେମ୍ବରରେ ଭାରତ -ଶ୍ରୀଲଙ୍କା ମଧ୍ୟରେ ଶେଷ ଟି-20 ମ୍ୟାଚ ହୋଇଥିଲା ।
ଅଧିକ ମ୍ୟାଚ ଖେଳାଗଲେ ଓଡିଶାର ଯୁବ କ୍ରିକେଟର ଲାଭବାନ ହେବେ । ତେବେ ଦେଖିବାର କଥା କେବେ OCAର ନିଦ ଭାଙ୍ଗୁଛି ଓ ଡିସେମ୍ବର 22 ମ୍ୟାଚ ପରେ କେଉଁ ପ୍ରକାର ଆଭିମୁଖ୍ୟ ଗ୍ରହଣ କରୁଛି ଓସିଏ ।
କଟକରୁ ପ୍ରଭୁକଲ୍ୟାଣ ପାଲ, ଇଟିଭି ଭାରତ
