ନୂଆଦିଲ୍ଲୀ: ପୁଣି ବିବାଦରେ ଟିମ ଇଣ୍ଡିଆ ଅଲରାଉଣ୍ଡର ହାର୍ଦ୍ଦିକ ପାଣ୍ଡ୍ୟା । ପୂର୍ବତନ ଭାରତୀୟ ପେସ ବୋଲର ଜାହିର ଖାନଙ୍କୁ ଜନ୍ମଦିନର ଶୁଭେଚ୍ଛା ଜଣାଇଥିଲେ ପାଣ୍ଡ୍ୟା । ଏଥିସହିତ ଏକ ଭିଡିଓ ମଧ୍ୟ ପୋଷ୍ଟ କରିଥିଲେ । ଯେଉଁ ଭିଡିଓରେ ଜାହିରଙ୍କ ଏକ ବଲକୁ ଛକା ମାରୁଛନ୍ତି ପାଣ୍ଡ୍ୟା ।
ଭିଡିଓ ସହିତ ପାଣ୍ଡ୍ୟା ଲେଖିଥିଲେ "ହାପି ବାର୍ଥ ଡେ ଜାକ.....ମୁଁ ଯେମିତି ଛକା ମାରି ବଲ ବାଉଣ୍ଡ୍ରି ବାହାରକୁ ପଠାଇଛି, ସେହିପରି ତମେ ମଧ୍ୟ କରିବ" ।
ଏପରି ଜନ୍ମଦିନର ଶୁଭେଚ୍ଛାକୁ ନେଇ ଭାରତୀୟ ଫ୍ୟାନ୍ସ କ୍ଷୁବ୍ଧ ହୋଇଛନ୍ତି । ପାଣ୍ଡ୍ୟାଙ୍କୁ ଅହଙ୍କାରୀ ବୋଲି ମଧ୍ୟ କିଛି ଫ୍ୟାନ୍ସ କହିଛନ୍ତି ।
ତେବେ ଜାହିର ଉକ୍ତ ଟ୍ବିଟର ଜବାବ ରଖିଛନ୍ତି । ପାଣ୍ଡ୍ୟାଙ୍କ ଭିଡିଓ ସହ ଜାହିର ଲେଖିଛନ୍ତି ଶୁଭେଚ୍ଛା ପାଇଁ ଧନ୍ୟବାଦ । " ମୋର ବ୍ୟାଟିଂ ଦକ୍ଷତା ତୁମ ପରି ଏତେ ଭଲ ନୁହେଁ । କିନ୍ତୁ ଜନ୍ମଦିନ ଭଲରେ ପାଳନ ହୋଇଛି..ଯେପରି ଛକା ମାରିଥିବା ପର ବଲଟି ତୁମେ ସାମ୍ନା କରିଥିଲ" ।
