ହାଇଦ୍ରାବାଦ: ୱିସଡେନ କ୍ରିକେଟର୍ସ ଅଲମାନେକ୍ ତାଲିକାରେ ଅନ୍ୟ ଚାରି ଖେଳାଳିଙ୍କ ସହ ବିରାଟ କୋହଲିଙ୍କୁ ଦସନ୍ଧିର ସର୍ବଶ୍ରେଷ୍ଠ 5 କ୍ରିକେଟର ଭାବେ ସ୍ଥାନ ମିଳିଛି । କୋହଲିଙ୍କ ସମେତ ଏହି ତାଲିକାରେ ଦକ୍ଷିଣ ଆଫ୍ରିକାର ପେସ୍ ବୋଲର ଡେଲ ଷ୍ଟେନ ଓ ବ୍ୟାଟ୍ସମ୍ୟାନ ଏବି ଡିଭିଲିୟର୍ସ, ଅଷ୍ଟ୍ରେଲିଆର ଷ୍ଟିଭ ସ୍ମିଥ ଓ ମହିଳା କ୍ରିକେଟର ଷ୍ଟାର ଅଲରାଉଣ୍ଡର ଏଲିସ ପେରି ଏହି ତାଲିକାରେ ସାମିଲ ରହିଛନ୍ତି ।
ଅନ୍ୟ ଖେଳାଳିଙ୍କ ତୁଳନାରେ କୋହଲି ଗତ 10 ବର୍ଷରେ 5,775 ରନ ଅଧିକ କରିଛନ୍ତି । ଯାହା ପାଇଁ ସେ ଚଳିତ ଦଶନ୍ଧିର ଶ୍ରେଷ୍ଠ ବ୍ୟାଟ୍ସମ୍ୟାନ ଭାବେ ବିବେଚିତ ହୋଇଛନ୍ତି । ୱିସଡେନ ଟେଷ୍ଟ ଟିମର ଅଧିନାୟକ ଭାବେ ବିରାଟଙ୍କୁ ନିଯୁକ୍ତ କରାଯିବା ସହ ଦିନିକିଆରେ ମଧ୍ୟ ସାମିଲ କରାଯାଇଛି ।
ବିରାଟଙ୍କୁ ନେଇ ୱିସଡେନ ଲେଖିଛି ଯେ, ‘କୋହଲି ଜଣେ ପ୍ରତିଭାବାନ ଖେଳାଳି । 2014 ଇଂଲଣ୍ଡ ଗସ୍ତର ଶେଷ ଠାରୁ ଆରମ୍ଭ କରି ନଭେମ୍ବରରେ ବାଂଲାଦେଶ ବିପକ୍ଷ କୋଲକାତା ଟେଷ୍ଟ ପର୍ଯ୍ୟନ୍ତ 63 ଆଭେରେଜରେ ରନ ସ୍କୋର କରିଛନ୍ତି କୋହଲି । ଯେଉଁଥିରେ 21ଟି ଶତକ ଓ 13ଟି ଅର୍ଦ୍ଧଶତକ ସାମିଲ ରହିଛି । ତିନୋଟି ଯାକ ଅନ୍ତର୍ଜାତୀୟ ଫର୍ମାଟରେ ସେ ଅତି କମରେ 50 ଆଭେରେଜରେ ରନ କରିଥିବା ଏକମାତ୍ର ବ୍ୟାଟ୍ସମ୍ୟାନ । କେବଳ ସେତିକି ନୁହେଁ କିଛି ଦିନ ତଳେ ଷ୍ଟିଭ ସ୍ମିଥ ମଧ୍ୟ କହିଥିଲେ ଯେ କୋହଲି ଭଳି କେହି ନାହିଁ ।’
ୱିସଡେନ ଅନୁସାରେ, ‘ସଚିନ ଓ ଧୋନିଙ୍କ ପରେ ବିଶ୍ବରେ ଅନ୍ୟ କୌଣସି ଖେଳାଳି ନାହିଁ ଯିଏ କୋହଲିଙ୍କ ଭଳି ଚାପରେ ଖେଳି ପାରିବ ।’
ଗତ ଦଶନ୍ଧିରେ କୋହଲି ଟେଷ୍ଟ କ୍ରିକେଟରେ 27 ଶତକ ସହ 7,202 ରନ କରିଛନ୍ତି । ଏହାଛଡ଼ା ଏକଦିବସୀୟ କ୍ରିକେଟରେ ସେ 11,125 ଓ ଟି-20ରେ 2,633 ରନ କରିଛନ୍ତି । ତାଙ୍କ ନାଁରେ ଅନ୍ତର୍ଜାତୀୟ କ୍ରିକେଟରେ 70ଟି ଶତକ ରହିଛି । ଅନ୍ତରାଷ୍ଟ୍ରୀୟ କ୍ରିକେଟରେ ତେନ୍ଦୁଲକର ସର୍ବାଧିକ 100ଟି ଓ ତାଙ୍କ ପଛକୁ ରିକି ପଣ୍ଟିଂ 71ଟି ଶତକ କରିଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
