ମାଞ୍ଚେଷ୍ଟର: ଇଂଲିଶ କାଉଣ୍ଟି କ୍ରିକେଟ ଲାଙ୍କାଶାୟର ଦଳରେ ସାମିଲ ହେଲେ ଭାରତୀୟ ବ୍ୟାଟସମ୍ୟାନ ଶ୍ରେୟସ ଆୟର। ରୟାଲ ଲଣ୍ଡନ କପ 2021 ଟୁର୍ଣ୍ଣାମେଣ୍ଟରେ ଲାଙ୍କାଶାୟର ପାଇଁ ଖେଳିବେ ଶ୍ରେୟସ ଆୟର। ଏହାକୁ ନେଇ ଦଳ ପକ୍ଷରୁ ବିଦ୍ଧିବଧ ଭାବରେ ସୂଚନା ଦିଆଯାଇଛି। ଜୁଲାଇ 15 ତାରିଖରେ ଗ୍ରୁପ ଷ୍ଟେଜ ମ୍ୟାଚ ପାଇଁ ଶ୍ରେୟସ ଦଳ ସହ ଯୋଗ ଦେବେ।
ଏହି ଆକ୍ରାମକ ଭାରତୀୟ ବ୍ୟାଟସମ୍ୟାନ 21ଟି ଦିନିକିଆ ମ୍ୟାଚ ଖେଳିଥିବା ବେଳେ 29ଟି ଟି-20 ମ୍ୟାଚ ଖେଳିଛନ୍ତି। ସେହି ସମୟରେ ଭାରତରେ ଅଫ ସିଜନ ଥିବାରୁ ବାହାରକୁ କାଉଣ୍ଟି ଖେଳିବାକୁ ବିସିସିଆଇ ନିକଟରୁ ଅନୁମତି ନେଇଥିଲେ। ଲାଙ୍କାଶାୟରର ଘରୋଇ ପଡ଼ିଆ ଓଲ୍ଡ ଟ୍ରାଫୋର୍ଡରେ ଦଳ ସହ ଯୋଗ ଦେବେ ଶ୍ରେୟସ ଆୟର।
ଏହାକୁ ନେଇ ଶ୍ରେୟସ ଆୟର ଖୁସି ଜାହିର କରିଛନ୍ତି। ସେ କହିଛନ୍ତି ଯେ, "ଲାଙ୍କାସାୟର ଏକ ସୁପରିଚିତ ଇଂଲିଶ କ୍ରିକେଟ ଟିମ। ଏଭଳି ଏକ ଦଳରେ ମୋତେ ସ୍ଥାନ ମିଳିଥିବାରୁ ମୁଁ ଧନ୍ୟବାଦ ଜଣାଉଛି। ପୂର୍ବରୁ ଫାରୁଖ ଇଞ୍ଜିନିୟର, ସୌରଭ ଗାଙ୍ଗୁଲି ଓ ଭିଭିଏସ ଲକ୍ଷ୍ମଣ ଭଳି ଖେଳାଳି ଏହି ଦଳ ସହ ଖେଳି ସାରିଥିବା ବେଳେ ବର୍ତ୍ତମାନ ମୋତେ ସୁଯୋଗ ମିଳିଛି। ଖୁବଶୀଘ୍ର ମୁଁ ମୋର ଦଳୀୟ ଖେଳାଳିଙ୍କ ସହ ଯୋଗ ଦେବି।"
ବର୍ତ୍ତମାନ ଇଂଲଣ୍ଡ ବିପକ୍ଷରେ ଦିନିକିଆ ଦଳରେ ସାମିଲ ରହିଛନ୍ତି ଶ୍ରେୟସ ଆୟର। ଭାରତ ଓ ଇଂଲଣ୍ଡ ବିପକ୍ଷରେ 3ଟି ଦିନିକିଆ ମ୍ୟାଚ ଖେଳାଯିବ। ପ୍ରଥମ ମ୍ୟାଚ ମାର୍ଚ୍ଚ 23 ତାରିଖରେ ଆରମ୍ଭ ହେବାକୁ ଯାଉଛି।
ବ୍ୟୁରୋ ରିପୋର୍ଟ, ଇଟିଭି ଭାରତ
