ନୂଆଦିଲ୍ଲୀ: ଭାରତୀୟ କ୍ରିକେଟର ମୁଖ୍ୟ କୋଚ ରବି ଶାସ୍ତ୍ରୀ ବିସିସିଆଇର ଅନ୍ୟ କୋଚ ( ଇଣ୍ଡିଆ-ଏ ଓ ଜୁନିୟର ଟିମର କୋଚ) ନିଜ ନିଜ ପକ୍ଷ ପାଇଁ ଭବିଷ୍ୟତ ରୋଡମ୍ୟାପ ନେଇ ଅନଲାଇନରେ ଆଲୋଚନା କରିଥିଲେ । ଲକଡାଉନ କାରଣରୁ ସମସ୍ତେ ଘରେ ଥିବା ବେଳେ ନିଜ ଖାଲି ସମୟକୁ ବ୍ୟବହାର କରିଥିଲେ ବିସିସିଆଇର କୋଚ ।
ଜାତୀୟ କ୍ରିକେଟ ଏକାଡେମୀ (NCA)ର ମୁଖ୍ୟ ରାହୁଲ ଦ୍ରାବିଡ ଏହି ଅନଲାଇନ ଆଲୋଚନା ନେଇ ପ୍ରସ୍ତାବ ଦେଇଥିଲେ । ତେବେ ଏହି ଆଲୋଚନାରେ ରବି ଶାସ୍ତ୍ରୀ, ବୋଲିଂ କୋଚ ଭଗତ ଅରୁଣ, ଫିଲ୍ଡିଂ କୋଚ ଆର ଶ୍ରୀଧର ସାମିଲ ହୋଇଥିଲେ ।
‘‘ଏହା କୌଣସି ଅନଲାଇନ କ୍ଲାସ ନଥିଲା । ଏହାକେବଳ କୋଚଙ୍କ ମଧ୍ୟ ଆଲୋଚନା ଥିଲା । ଯେଉଁଥିରେ ସେମାନେ ଆଗାମୀ ଦିନର ଯୋଜନା ଓ ପରସ୍ପରଙ୍କ ମତାମତ ନେଇ ଆଲୋଚନା କରିଥିଲେ । ବର୍ତ୍ତମାନ ଏହି ଆଲୋଚନା କେବଳ ଗୋଟିଏ ଥର ହୋଇଛି କିନ୍ତୁ ଆଗାମୀ ଦିନରେ ମଧ୍ୟ ଏହା ନିୟମିତ ଭାବରେ ହେବାର ସମ୍ଭାବନା ରହିଛି,’’ ବୋଲି ଏନସିଏର ଜଣେ ଅଧିକାରୀ କହିଛନ୍ତି ।
‘‘ରବି ଶାସ୍ତ୍ରୀ, ଅରୁଣ ଓ ଶ୍ରୀଧରଙ୍କ ପରି ବରିଷ୍ଠ କୋଚ ଯେତେବେଳେ ଆଲୋଚନାରେ ସାମିଲ ହୁଅନ୍ତି, ଆପଣ ସେହି ଆଲୋଚନାରୁ ନିଶ୍ଚିତ ତାଙ୍କ ଅନ୍ତର୍ଜାତୀୟ ଅଭିଜ୍ଞତାରୁ କିଛି ଶିଖିବାକୁ ପାଆନ୍ତି,’’ ବୋଲି ଅଧିକାରୀ ଜଣକ କହିଛନ୍ତି ।
ସେ ଆହୁରି ମଧ୍ୟ କହିଛନ୍ତି ଯେ, ‘‘ଲକଡାଉନ ସମୟରେ ଏପରି ଅନଲାଇନ ସେସନ ଆୟୋଜନ କରିବା ସହଜ ହୋଇଛି । କିନ୍ତୁ ଦେଖିବାକୁ ହେବ ଯେ ଯେତେବେଳେ ପରିସ୍ଥିତି ସ୍ବଭାବିକ ହେବ ସମସ୍ତେ ପୁଣି ଥରେ କାର୍ଯ୍ୟରେ ଯୋଗଦେବେ ସେତେବେଳେ ଏହା ହେଇ ପାରିବ କି ନାହିଁ ।’’
