ହାଇଦ୍ରାବାଦ: ପ୍ରଥମ ଟିମ ଭାବେ 2019-20 ରଣଜୀ ଟ୍ରଫି ସେମିଫାଇନାଲରେ ପ୍ରବେଶ କରିଛି ଗୁଜୁରାଟ । କ୍ବାର୍ଟରଫାଇନାଲ ମୁକାବିଲାରେ ଗୋଆକୁ ହରାଇ ସେମି ଟିକେଟ ହାତେଇଛି ଗୁଜୁରାଟ । ଗୋଆ ବିପକ୍ଷରେ 464 ରନର ବଡ ବିଜୟ ହାସଲ କରିଛି ପାର୍ଥୀବ ପଟେଲଙ୍କ ନେତୃତ୍ବାଧିନ ଗୁଜୁରାଟ।
ଗୋଆ ସାମ୍ନାରେ 629 ରନର କଷ୍ଟସାଧ୍ୟ ବିଜୟ ଲକ୍ଷ୍ୟ ରଖିଥିଲା ଗୁଜୁରାଟ ଦଳ। ବ୍ୟାଟ୍ସମ୍ୟାନଙ୍କ କମାଲ ପରେ ଗୁଜୁରାଟ ବୋଲରଙ୍କ ଘାତକ ବୋଲିଂ ଦେଖିବାକୁ ମିଳିଥିଲା । ମାତ୍ର 13 ରନରେ ଗୋଆର 3ଟି ଟପ ଅର୍ଡର ୱିକେଟ ଅକ୍ତିଆର କରିଥିଲେ ଗୁଜୁରାଟ ବୋଲର । ତେବେ ଗୋଆ ପକ୍ଷରୁ ଭାର୍ଗବ ମେରାଇ 50 ଓ ସମିତ ଗୋହିଲ 72 ରନର ଇଂନିସ ଖେଳି କିଛି ସୟମ ଲଢେଇ କରିଥିଲେ । ମାତ୍ର ସିଦ୍ଧାର୍ଥ ଦେଶାଇ 5ଟି ଓ ଅର୍ଜାନ ନାଗୱାଲ୍ଲା 4ଟି ୱିକେଟ ହାସଲ କରି ଗୋଆ ଇଂନିସକୁ ମାତ୍ର 164 ରନରେ ଅଟକାଇଥିଲେ । ଫଳରେ ଗୋଟିଏ ଦିନ ପୂର୍ବରୁ 464 ରନର ବଡ ବ୍ୟବଧାନରେ ବିଜୟୀ ହୋଇଥିଲା ଗୁଜୁରାଟ ।
ଅନ୍ୟପଟେ ସୌରାଷ୍ଟ୍ର ମଧ୍ୟ ସେମିଫାଇନାଲରର ନିକଟତର ହୋଇଛି । ସିଏସଆର ଶର୍ମା ଗ୍ରାଉଣ୍ଡରେ ଆନ୍ଧ୍ର ବିପକ୍ଷ ମ୍ୟାଚରେ ବିଜୟ ଦ୍ବାରଦେଶରେ ରହିଛି ସୌରାଷ୍ଟ୍ର । ଅନ୍ୟପଟେ କର୍ଣ୍ଣାଟକ, ବେଙ୍ଗଲ ମଧ୍ୟ ସେମିଫାଇନାଲ ପ୍ରବେଶର ନିକଟତର ହୋଇଛନ୍ତି।
