ୱେଲିଂଟନ: ୱେଷ୍ଟଇଣ୍ଡିଜ ବିପକ୍ଷ 2 ଟିକିଆ ଟେଷ୍ଟ ସିରିଜକୁ 2-0ରେ ମୂଳପୋଛ କଲା ନ୍ୟୁଜିଲାଣ୍ଡ । ଦ୍ବିତୀୟ ଟେଷ୍ଟକୁ ଗୋଟିଏ ଇଂନିସ ଓ 12ରନରେ ଜିତିନେଇଛି କିୱି ଦଳ । ହେନରୀ ନିକୋଲାସ ଅନ୍ତର୍ଜାତୀୟ କ୍ୟାରିୟରର ଶ୍ରେଷ୍ଠ 174 ରନର ଇଂନିସ ଖେଳିବା ସହ ପ୍ଲେଆର ଅଫ ଦ ମ୍ୟାଚ ହୋଇଛନ୍ତି ।
ୱେଷ୍ଟଇଣ୍ଡିଜ ମ୍ୟାଚର 4ର୍ଥ ଦିନ 244-6ରୁ ଅସମାପ୍ତ ଦ୍ବିତୀୟ ଇଂନିସ ଆରମ୍ଭ କରିଥିଲା । ତେବେ 317 ରନରେ ଭ୍ରମଣକାରୀ ଇଣ୍ଡିଜ ଦଳ ସମସ୍ତ ୱିକେଟ ହରାଇଥିଲା । ପରେ ସୋମବାର ବର୍ଷା ଯୋଗୁଁ ମ୍ୟାଚ ଆରମ୍ଭରେ କିଛି ସମୟ ବିଳମ୍ବ ହୋଇଥିଲା । ତେବେ ନ୍ୟୁଜିଲାଣ୍ଡ ପ୍ରଭାବୀ ପ୍ରଦର୍ଶନ ସହ ଏକତରଫା ମ୍ୟାଚ ଜିତିନେଇଛି ।
ଟିମ ସାଉଦୀ ଘାତକ ବୋଲିଂ ସହ 7ଟି ୱିକେଟ ଅକ୍ତିଆ କରିଥିଲେ । ଏଥିସହ ସାଉଦୀଙ୍କ ମୋଟ ଟେଷ୍ଟ ୱିକେଟ 296ରେ ପହଞ୍ଚିଛି । ଫଳରେ ରିଚାର୍ଡ ହାଡଲି ଓ ଡାନିଏଲ ଭିଟୋରୀଙ୍କ ପରେ ତୃତୀୟ ନ୍ୟୁଜିଲାଣ୍ଡ ବୋଲର ଭାବେ 300 ୱିକେଟର ନିକଟତର ହୋଇଛନ୍ତି ।
ଏହି ସିରିଜ ପରେ ନ୍ୟୁଜିଲାଣ୍ଡ 116 ପଏଣ୍ଟ ହାସଲ କରି ଅଷ୍ଟ୍ରେଲିଆ ସହ ଆଇସିସି ବିଶ୍ବ ଟେଷ୍ଟ ରାକିଂର ସମକକ୍ଷ ହୋଇଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
