ବାରିପଦା: ବିଜୁ ଜନତା ଦଳର ପକ୍ଷରୁ ଆୟୋଜିତ କ୍ରୀଡା ଟୁର୍ଣ୍ଣାମେଣ୍ଟ ପାଇଁ ଚଳଚଞ୍ଚଳ ମୟୂରଭଞ୍ଜ । ମୟୂରଭଞ୍ଜ ପ୍ରିମିୟମ ଲିଗର ସେମି ଫାଇନାଲ ମ୍ୟାଚକୁ ଶୁଭାରମ୍ଭ କରିଛନ୍ତି ରାଜସ୍ବ ମନ୍ତ୍ରୀ ସୁଦାମ ମାରାଣ୍ଡି।
ଗାଁ ଠାରୁ ସହର ସବୁଠି ଏବେ କ୍ରିକେଟ ଓ ଫୁଟବଲ ଫିଭର । ବ୍ଲକ ସ୍ତରରେ ଲିଗ ମ୍ୟାଚ ଶେଷ ହେବା ପରେ ରବିବାର ଠାରୁ ବାରିପଦା ଷ୍ଟାଡିୟମରେ ଦ୍ବିତୀୟ ପର୍ଯ୍ୟାୟ ଲିଗ୍ର ଶୁଭ ଉଦ୍ଘାଟିତ ହୋଇଛି ।
ରାଜସ୍ବ ମନ୍ତ୍ରୀ ସୁଦାମ ମାରାଣ୍ଡି ଆନୁଷ୍ଠାନିକ ଭାବେ ଏହାକୁ ଉଦ୍ଘାଟନ କରିଛନ୍ତି । ମୟୂରଭଞ୍ଜ ଜିଲ୍ଲାରେ ପ୍ରଥମ କରି ଯୁବ ପ୍ରତିଭା ଅନ୍ବେଷଣ ପାଇଁ ଆୟୋଜିତ ହେଉଛି। ମୟୂରଭଞ୍ଜ ପ୍ରିମିୟର ଲିଗ୍ ନାମରେ କ୍ରିକେଟ ଓ ଫୁଟବଲ ପ୍ରତିଯୋଗିତା ଆୟୋଜନ ହୋଇଛି । ଗାଁ ରୁ ସହର ପର୍ଯ୍ୟନ୍ତ ଯୁବ ଖେଳାଳିଙ୍କୁ ଉତ୍ସାହିତ କରିବାକୁ ବିଜୁ ଯୁବ ଓ ଛାତ୍ର ଜନତା ଦଳର ଏହା ଅଭିନବ ପ୍ରୟାସ ।
ଜିଲ୍ଲାର ୨୬ ଟି ବ୍ଲକର ବିଜେତା ଦଳ ମଧ୍ୟରେ ଅନୁଷ୍ଠିତ ହେଉଛି ଦ୍ବିତୀୟ ପର୍ଯ୍ୟାୟ ଲିଗ୍ । ଆସନ୍ତା ମାର୍ଚ୍ଚ ମାସ ୭ ତାରିଖ ଫାଇନାଲ ଖେଳ ବାରିପଦା ଠାରେ ଅନୁଷ୍ଠିତ ହେବ । ବିଜେତା ଦଳକୁ ୧ ଲକ୍ଷ ଟଙ୍କା ପୁରସ୍କାର ରାଶି ପ୍ରଦାନ କରାଯିବାକୁ ଥିବା ବେଳେ ରନର୍ସଅପ ଦଳକୁ ୫୦ ହଜାର ଟଙ୍କା ପୁରସ୍କାର ରାଶି ପ୍ରଦାନ କରାଯିବ । ତେବେ ଏହି ମୟୂରଭଞ୍ଜ ପ୍ରିମିୟର ଲିଗକୁ ନେଇ ଜିଲ୍ଲାର ଯୁବପିଢିଙ୍କ ମଧ୍ୟରେ ଉତ୍ସାହ ଦେଖାଦେଇଛି।
ମୟୂରଭଞ୍ଜରୁ ମୃତ୍ୟୁଞ୍ଜୟ ସେନାପତି, ଇଟିଭି ଭାରତ
