ଲାହୋର: ଇଂଲଣ୍ଡ ଗସ୍ତରେ ଥିବା ପାକିସ୍ତାନ ଟିମରେ ସାମିଲ ହେବେ ସ୍ପିଡଷ୍ଟାର ମହମ୍ମଦ ଆମିର । ଗତ ସପ୍ତାହରେ ଦ୍ବିତୀୟ କନ୍ୟା ସନ୍ତାନର ପିତା ହୋଇଛନ୍ତି ଆମିର । ସେଥିପାଇଁ ଇଂଲଣ୍ଡ ଗସ୍ତରୁ ବ୍ୟକ୍ତିଗତ କାରଣ ଦର୍ଶାଇ ଓହରି ଯାଇଥିଲେ ।
ମାତ୍ର ଇଂଲଣ୍ଡ ବିପକ୍ଷ ଆଗାମୀ ସିରିଜ ପାଇଁ ପାକିସ୍ତାନ ଟିମ ସହ ଯୋଗ ଦେବେ ବୋଲି ଜଣାପଡିଛି । ଅନ୍ୟତମ ଖେଳାଳି ମହମ୍ମଦ ଇମରାନ ମଧ୍ୟ ଟିମରେ ସାମିଲ ହେବେ । ଏନେଇ ପାକିସ୍ତାନ କ୍ରିକେଟ ବୋର୍ଡ(PCB) ପକ୍ଷରୁ ସୂଚନା ମିଳିଛି ।
ଆମିରଙ୍କ ଟିମରେ ସାମିଲ ହେବାନେଇ ପ୍ରକ୍ରିୟା ଆରମ୍ଭ ହୋଇଛି । ସୋମବାର ଆମିର ଓ ଇମରାନଙ୍କ କୋଭିଡ-19 ଟେଷ୍ଟ କରାଯିବା ନେଇ ଧାର୍ଯ୍ୟ ହୋଇଥିଲା । ନିୟମ ଅନୁଯାୟୀ ଉଭୟ ଖେଳାଳିଙ୍କ ଦୁଇଟି ଟେଷ୍ଟ ରିପୋର୍ଟ ନେଗେଟିଭ ଆବଶ୍ୟକ ।
ପାକିସ୍ତାନ-ଇଂଲଣ୍ଡ ମଧ୍ୟରେ 3 ମ୍ୟାଚ ବିଶିଷ୍ଟ ଟେଷ୍ଟ ସିରିଜ ଓ ପରେ ଟି-20 ସିରିଜ ଖେଳାଯିବ । ପ୍ରଥମ ଟେଷ୍ଟ ଅଗଷ୍ଟ 5ରୁ ଆରମ୍ଭ ହେବାନେଇ ସୂଚୀ ରହିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
