ଦୁବାଇ: ଆଇପିଏଲ 2020ର 3ୟ ମ୍ୟାଚରେ ବିରାଟ କୋହଲିଙ୍କ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର(ଆଇସିବି) ସନରାଇଜର୍ସ ହାଇଦ୍ରାବାଦ ବିପକ୍ଷରେ ଅଭିଯାନ ଆରମ୍ଭ କରିବ । ତେବେ ଏହି ମ୍ୟାଚ ପୂର୍ବରୁ ପୂର୍ବତନ ନ୍ୟୁଜିଲାଣ୍ଡ କ୍ରିକେଟର ସ୍କଟ ଷ୍ଟାଇରିସ କୋହଲିଙ୍କୁ ନେଇ ବଡ ବୟାନ ଦେଇଛନ୍ତି । ବିରାଟ କୋହଲିଙ୍କୁ 'ସର୍ବକାଳୀନ ମହାନ' ଖେଳାଳି ବିରାଟ କୋହଲି କହିବା ସହ, ନିଜର ପୁରୁଣା ଲୟକୁ ଫେରିବାକୁ ବେଶୀ ସମୟ ନେବେ ନାହିଁ ବୋଲି ପୂର୍ବାନୁମାନ କରିଛନ୍ତି ଷ୍ଟାଇରିସ ।
ଦୀର୍ଘ ସମୟ ଧରି ମ୍ୟାଚ ଖେଳିନଥିଲେ ମଧ୍ୟ ବିରାଟ ଅସୁବିଧାର ସାମ୍ନା କରିବେ ନାହିଁ ବୋଲି କହିଛନ୍ତି ଷ୍ଟାଇରିସ । ଷ୍ଟାଇରିସ କହିଛନ୍ତି, "ମୁଁ ଭାବୁନାହିଁ ବିରାଟ କଷ୍ଟ ଅନୁଭବ କରିବେ । ଏହାର କାରଣ ବିରାଟ ଜଣେ ସର୍ବକାଳୀନ ମହାନ ଖେଳାଳି ଓ ଏଯାବତ ଆଇପିଏଲ ଇତିହାସରେ ଅନ୍ୟତମ ଶ୍ରେଷ୍ଠ ବ୍ୟାଟ୍ସମ୍ୟାନ । ଯଦି ସେ ଅସୁବିଧାର ସାମ୍ନା କରନ୍ତି, ତେବେ ସମସ୍ତେ ଅସୁବିଧାର ସାମ୍ନା କରିବେ ।"
ଅନ୍ୟପଟେ ସନରାଇଜର୍ସ ହଇଦ୍ରାବାଦ ଟିମକୁ ନେଇ ମଧ୍ୟ ମତ ରଖିଛନ୍ତି ଷ୍ଟାଇରିସ । କୋହଲି ଓ ୱାର୍ଣ୍ଣର ଦୁଇ ଦକ୍ଷ କ୍ୟାପଟେନ ସହ ହ୍ବାଇଟ ବଲ କ୍ରିକେଟରେ ବିସ୍ପୋରକ ବ୍ୟାଟ୍ସମ୍ୟାନ । ଇଂଲଣ୍ଡର ଜନ୍ନି ବେୟାରଷ୍ଟୋ ମଧ୍ୟ ଏସଆରଏଚ ପକ୍ଷରୁ ଧମାକା କରିପାରନ୍ତି । ଫଳରେ ଉଭୟ ଟିମରେ ଏକାଧିକ ଦୁର୍ଦ୍ଦଶ ବ୍ୟାଟ୍ସମ୍ୟାନ ରହିଥିବାରୁ କଡା ଟକ୍କର ହେବ ବୋଲି ଆଶା କରାଯାଉଛି ।
ଆଇପିଏଲର 13ତମ ସଂସ୍କରଣ ୟୁଏଇରେ ସେପ୍ଟେମ୍ବର 19ରୁ ଆରମ୍ଭ ହୋଇସାରିଛି । ପ୍ରଥମ ମ୍ୟାଚରେ ମୁମ୍ବାଇ ଇଣ୍ଡିଆନ୍ସକୁ 5 ୱିକେଟରେ ହରାଇଥିଲା ଚେନ୍ନାଇ ସୁପର କିଙ୍ଗ୍ସ ।
ବ୍ୟୁରୋ ରିପୋର୍ଟ, ଇଟିଭି ଭାରତ
