ଗୁଆନା: ବର୍ଷାରେ ଧୋଇ ଯାଇଛି ଟିମ୍ ଇଣ୍ଡିଆର ଇଣ୍ଡିଜ୍ ଗସ୍ତର ପ୍ରଥମ ଦିନିକିଆ । 13 ଓଭର ବୋଲିଂ ହୋଇଥିବା ଏହି ମ୍ୟାଚର କୌଣସି ଫଳାଫଳ ବାହାରି ପାରି ନାହିଁ । କିନ୍ତୁ ମ୍ୟାଚର ମଜା ଉଠାଇ ପାରିନଥିବା ଦର୍ଶକ ଦେଖିଛନ୍ତି ଭାରତୀୟ ଅଧିନାୟକଙ୍କ ରେନ ଡ୍ୟାନ୍ସ । ନିଜର ଆରିସିବି (ରୟାଲ ଚାଲେଞ୍ଜର୍ସ ବାଙ୍ଗଲୋର)ର ପାର୍ଟନର ତଥା ଇଣ୍ଡିଜ୍ ଦଳର ଓପନର କ୍ରିସ୍ ଗେଲଙ୍କ ସହ ପଡିଆ ମଝିରେ ନାଚୁଥିବାର ନଜର ଆସିଥିଲେ କୋହଲି ।
ଗୁରୁବାର ସ୍ଥାନୀୟ ପ୍ରୋଭିଡେନ୍ସ ଷ୍ଟାଡିୟମରେ ଖେଳାଯାଇଥିବା ଏହି ମ୍ୟାଚର ଆରମ୍ଭରୁ ବର୍ଷା ହୋଇଥିଲା । ପରେ ବର୍ଷା କମିବାରୁ ଖେଳ ଆରମ୍ଭ ହୋଇଥିଲା । ମାତ୍ର ପୁଣିଥରେ ବର୍ଷା ହେବାରୁ ଖେଳକୁ ବନ୍ଦ କରି ଦିଆଯାଇଥିଲା । ତେବେ ବର୍ଷା ପରେ ଖେଳ ଆରମ୍ଭ ହେବା ବେଳେ ଗେଲଙ୍କ ସହ ତାଳ ମିଶାଇ ଇଣ୍ଡିଜ୍ ଡିଜେ ଗୀତର ତାଳେ ତାଳେ ନାଚିଛନ୍ତି କୋହଲି । ତାଙ୍କ ସହ ସାଥ ଦେଇଛନ୍ତି ଦଳର ଅଲରାଉଣ୍ଡର କେଦାର ଯାଦବ ।
ଏହା ପ୍ରଥମ ଥର ନୁହେଁ ଯେ ବିରାଟ ପଡିଆରେ ନାଚିଛନ୍ତି । ପୂର୍ବରୁ ମଧ୍ୟ ନଜିର ରହିଛି । ସେ ମ୍ୟାଚ ଆରମ୍ଭରେ ଗମ୍ଭୀର ଦେଖାଯାନ୍ତି କିନ୍ତୁ ମ୍ୟାଚ ଆରମ୍ଭ ହେବା ପରେ ଖେଳକୁ ଉପଭୋଗ କରିଥାନ୍ତି । ତେବେ ବିସିସିଆଇର ଅଫିସିଆଲ ଟ୍ବିଟର ଆକାଉଣ୍ଟରେ ଏହାର କିଛି ଫଟୋ ପୋଷ୍ଟ ହୋଇଛି ।
