ସିଡନି: ଆଇସିସି ବ୍ୟାଟିଂ ମାନ୍ୟତାରେ ଭାରତୀୟ କ୍ୟାପଟେନ ବିରାଟ କୋହଲି ଓ ଓପନର ରୋହିତ ଶର୍ମାଙ୍କ ଦବଦବା ଜାରି । ମାନ୍ୟତାର ଶୀର୍ଷ ଦୁଇଟି ସ୍ଥାନରେ ରହିଛନ୍ତି ଉଭୟ କୋହଲି ଓ ରୋହିତ । ସେହିପରି ବୋଲିଂ ମାନ୍ୟତାର ତୃତୀୟ ସ୍ଥାନରେ ରହିଛନ୍ତି ଜଶପ୍ରୀତ ବୁମରା ।
ସଦ୍ୟ ସମାପ୍ତ ହୋଇଥିବା ଅଷ୍ଟ୍ରେଲିଆ ବିପକ୍ଷ ଦିନିକିଆ ସିରିଜରେ କୋହଲି ଦୁଇଟି ଅର୍ଦ୍ଧଶତକୀୟ ଇଂନିସ ଖେଳିଥିଲେ । ସିରିଜରେ ଭାରତ 2-0ରେ ବିଜୟୀ ହୋଇଥିଲା । ମାଂସପେଶୀରେ ଯନ୍ତ୍ରଣା ଯୋଗୁଁ ସୀମିତ ଓଭର ସିରିଜ ଖେଳିନଥିବା ରୋହିତ ଦ୍ବିତୀୟ ସ୍ଥାନରେ ରହିଛନ୍ତି । ଏଥିସହ ତୃତୀୟ ସ୍ଥାନରେ ଥିବା ପାକିସ୍ତାନର ବାବର ଆଜମଙ୍କ ଠାରୁ 5 ପଏଣ୍ଟ ଅଧିକ ରହିଛନ୍ତି ।
ଅଷ୍ଟ୍ରେଲିଆ ବିପକ୍ଷ ଦିନିକିଆ ସିରିଜର ପ୍ରଥମ ମ୍ୟାଚରେ 90 ଓ 3ୟ ମ୍ୟାଚରେ ଅପରାଜିତ 92 ରନର ଇଂନିସ ଖେଳିଥିବା ହାର୍ଦ୍ଦିକ ପାଣ୍ଡ୍ୟା ପ୍ରଥମ ଥର ପାଇଁ ଶୀର୍ଷ 50 ସ୍ଥାନ ମଧ୍ୟରେ ରହିଛନ୍ତି ।
553 ପଏଣ୍ଟ ସହ 49ତମ ସ୍ଥାନରେ ରହିଛନ୍ତି ପାଣ୍ଡ୍ୟା ।
ଅଷ୍ଟ୍ରେଲିଆ ଟିମରୁ ଦିନିକିଆ ସିରିଜରେ ଯଥାକ୍ରମେ 114, 60 ଓ 75 ରନର ଇଂନିସ ଖେଳିଥିବା କ୍ୟାପଟେନ ଆରୋନ ଫିଞ୍ଚ କ୍ୟାରିୟରରେ ସର୍ବାଧିକ 791 ପଏଣ୍ଟ ହାସଲ କରିବା ସହ ପଞ୍ଚମ ସ୍ଥାନରେ ରହିଛନ୍ତି । ସିରିଜର ପ୍ରଥମ ଦୁଇଟି ମ୍ୟାଚରେ 62 ବଲରେ ଶତକୀୟ ଇଂନିସ ଖେଳିଥିବା ଷ୍ଟିଭ ସ୍ମିଥ 2018 ପରେ ଶୀର୍ଷ 20କୁ ଫେରିଛନ୍ତି । 707 ପଏଣ୍ଟ ସହ 15ତମ ସ୍ଥାନରେ ରହିଛନ୍ତି ସ୍ମିଥ ।
194.18 ଷ୍ଟ୍ରାଇକରେଟରେ ଦିନିକିଆ ସିରିଜର 3ଟି ମ୍ୟାଚରେ 167 ରନ ସଂଗ୍ରହ କରିଥିବା ଗ୍ଳେନ ମାକ୍ସୱେଲ 20ତମ ସ୍ଥାନରେ ପହଞ୍ଚିଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
