ଚେନ୍ନାଇ: ଭାରତୀୟ କ୍ରିକେଟରେ ଚଳିତ ଦଶନ୍ଧିର ଶ୍ରେଷ୍ଠ ଫିଲ୍ଡର ହେଉଛନ୍ତି ଅଲରାଉଣ୍ଡର ରବିନ୍ଦ୍ର ଜାଡେଜା । ଏହା କହିଛନ୍ତି ଟିମ ଇଣ୍ଡିଆର ଫିଲ୍ଡିଂ କୋଚ ଆର ଶ୍ରୀଧର । ଭାରତୀୟ ଦଳର ଆକ୍ରମଣାତ୍ମକ ଚିନ୍ତାଧାରା ଓ ଶତପ୍ରତିଶତ ଫିଟିନେସ ହିଁ ଫିଲ୍ଡିଂ ସ୍ତରକୁ ବୃଦ୍ଧି କରିଛି। ଏହି ବିଭାଗରେ ଶକ୍ତିଶାଳୀ କୌଣସି ଏକ ଚମ୍ପିଆନ ଟିମର ପରିଚୟ ବୋଲି 49ବର୍ଷୀୟ ଶ୍ରୀଧର ମତ ଦେଇଛନ୍ତି।
ଏଥିସହିତ ଦକ୍ଷିଣ ଆଫ୍ରିକା ବିପକ୍ଷ ସିରିଜରେ ଭାରତ, କ୍ରିକେଟର ସମସ୍ତ ବର୍ଗରେ ଶ୍ରେଷ୍ଠ ପ୍ରଦର୍ଶନ କରିଛି। କିଛି ଖେଳାଳି ନିକଟରେ ନିଜର ଫିଲ୍ଡିଂର ସ୍ତର ମଧ୍ୟ ବଢାଇଛନ୍ତି । ସେମାନଙ୍କ ମଧ୍ୟରେ ୟୁଜଭେନ୍ଦ୍ର ଚହଲ, ଜଶପ୍ରୀତ ବୁମରା ଓ ଇଶାନ୍ତ ଶର୍ମା ରହିଛନ୍ତି । ରିଦ୍ଧିମାନ ଶାହା ୱିକେଟ ପଛରେ ଅବିଶ୍ବସନୀୟ କ୍ୟାଚ ଧରିଛନ୍ତି । ଏହା ବୋଲରଙ୍କ ମନୋବଳକୁ ବୃଦ୍ଧି କରିବାରେ ସହାୟକ ହୋଇଥିବା କହିଛନ୍ତି ଶ୍ରୀଧର । ଏଥିସହିତ ଆଇସିସି ଫିଲ୍ଡିଂ ରାଙ୍କିଙ୍ଗ ସପକ୍ଷରେ ମତ ରଖିଛନ୍ତି ଟିମ ଇଣ୍ଡିଆର ଫିଲ୍ଡିଂ କୋଚ।
