ଶାରଜାହ: ଚଳିତ ଆଇପିଏଲ ସଂସ୍କରଣରେ ଚେନ୍ନାଇ ସୁପର କିଙ୍ଗ୍ସର ପ୍ଲେ-ଅଫ ଆଶା କ୍ଷୀଣ ରହିଛି । ମାତ୍ର ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ଠାରୁ କୋଲକାତା ନାଇଟ ରାଇଡର୍ସର ପରାଜୟ ସାମାନ୍ୟ ଆଶା ସଞ୍ଚାର କରିଛି । ଶୁକ୍ରବାର ମୁମ୍ବାଇ ଇଣ୍ଡିଆନ୍ସ ସହ ଚେନ୍ନାଇ ସୁପର କିଙ୍ଗ୍ସର ମୁକାବିଲା ରହିଛି । ଫଳରେ ଏହି ମ୍ୟାଚରେ ନିଶ୍ଚିନ୍ତ ବିଜୟ ଲକ୍ଷ୍ୟରେ ଖେଳିବ ସିଏସକେ ।
10ଟି ମ୍ୟାଚରୁ 6 ପଏଣ୍ଟ ସହ ପଏଣ୍ଟ ଟେବୁଲର ଶେଷରେ ରହିଛି ଧୋନିଙ୍କ ଚେନ୍ନାଇ ସୁପର କିଙ୍ଗ୍ସ । ଫଳରେ ଅବଶିଷ୍ଟ ସମସ୍ତ ମ୍ୟାଚରେ ବିଜୟ ସହ ଅନ୍ୟ ମ୍ୟାଚ ଗୁଡିକର ଫଳାଫଳ ଦଳ ସପକ୍ଷରେ ହୋଇପାରିଲେ ପ୍ଲେ-ଅଫରେ 4ର୍ଥ ଟିମ ଭାବେ ସ୍ଥାନ ଅର୍ଜନ କରିବାର ଆଶା ରହିଛି ।
ଆଇପିଏଲ 2020ର ଉଦ୍ଘାଟନୀ ମ୍ୟାଚରେ ମୁମ୍ବାଇ ସହ ମୁହାମୁହିଁ ହୋଇଥିଲା ଚେନ୍ନାଇ । ଏହି ମ୍ୟାଚରେ ଧୋନି ଧୁରନ୍ଦରଙ୍କୁ ବିଜୟ ମିଳିଥିଲା । ମାତ୍ର ଏହାପରେ, ଚଳିତ ଟୁର୍ଣ୍ଣାମେଣ୍ଟରେ ସିଏସକେ ପାଇଁ କିଛି ବି ଠିକ ହୋଇନାହିଁ । ଏପରିକି ଅଭିଜ୍ଞ ଅଲରାଉଣ୍ଡର ଡ୍ବାଇନ ବ୍ରାଭୋ ମଧ୍ୟ ଅବିଶିଷ୍ଟ ଟୁର୍ଣ୍ଣାମେଣ୍ଟରୁ ଆହତ କାରଣରୁ ବାଦ ପଡିଛନ୍ତି ।
ଫାଫ ଡୁପ୍ଲେସିସ, ସେନ ୱାଟସନ, କ୍ୟାପଟେନ ମହେନ୍ଦ୍ର ସିଂ ଧୋନି, ଅମ୍ବାତି ରାୟୁଡୁଙ୍କ ଉପରେ ପୁନର୍ବାର ଦଳର ବ୍ୟାଟିଂ ବାର ରହିବ । ବ୍ରାଭୋଙ୍କ ଅନୁପସ୍ଥିତିରେ ଅଲରାଉଣ୍ଡର ରବିନ୍ଦ୍ର ଜାଡେଜାଙ୍କ ଉପରେ ମଧ୍ୟକ୍ରମ ବ୍ୟାଟିଂ ବାର ରହିବ ।
ବୋଲିଂ ବିଭାଗ ଶାର୍ଦ୍ଦୁଳ ଠାକୁର, ଦୀପକ ଚହର ଓ ଜସ ହେଜଲଉଡଙ୍କ ପ୍ରଦର୍ଶନ ଉପରେ ନିର୍ଭର କରିବ । ଇମ୍ରାନ ତାହିର ଏହି ମ୍ୟାଚରେ ସ୍ଥାନ ପାଇବା ସମ୍ଭାବନା ରହିଛି ।
ଅନ୍ୟପଟେ ମୁମ୍ବାଇ ଇଣ୍ଡିଆନ୍ସ ଖେଳିଥିବା ପୂର୍ବ ମ୍ୟାଚରେ, କିଙ୍ଗ୍ସ ଇଲେଭେନ ପଞ୍ଜାବ ଠାରୁ ସଂଘର୍ଷପୂର୍ଣ୍ଣ ମ୍ୟାଚରେ ପରାସ୍ତ ହୋଇଥିଲା । ଫଳରେ ବିଜୟ ଟ୍ରାକକୁ ଫେରିବାକୁ ଚାହିଁବ ରୋହିତ ଶର୍ମାଙ୍କ ମୁମ୍ବାଇ ଇଣ୍ଡିଆନ୍ସ ।
କ୍ବିଣ୍ଟନ ଡିକକ, ସୂର୍ଯ୍ୟକୁମାର ଯାଦବ, ଇଶାନ କିଶନ ଓ କ୍ୟାପଟେନ ରୋହିତ ଶର୍ମାଙ୍କୁ ନେଇ ଟପ ଅର୍ଡର ବ୍ୟାଟିଂକ୍ରମ ମଝବୁତ ରହିଛି । ଏଥିସହ ହାର୍ଦ୍ଦିକ ପାଣ୍ଡ୍ୟା, କ୍ରୁଣାଳ ପାଣ୍ଡ୍ୟା ଓ କିରଣ ପୋଲାର୍ଡଙ୍କୁ ନେଇ ଶକ୍ତିଶାଳୀ ମଧ୍ୟକ୍ରମ ବ୍ୟାଟିଂ ମଧ୍ୟ ରହିଛି । ବୋଲିଂ ବିଭାଗରେ ଜଶପ୍ରୀତ ବୁମରା ଓ ଟ୍ରେଣ୍ଟ ବୋଲ୍ଟ ଫର୍ମରେ ରହିଛନ୍ତି ।
ଫଳରେ ଆଜିର ମ୍ୟାଚରେ କଡା ସଂଘର୍ଷ ଦେଖିବାକୁ ମିଳିବ ବୋଲି ଆଶା କରାଯାଉଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
