ହାଇଦ୍ରାବାଦ: ଟିମ ଇଣ୍ଡିଆର ଷ୍ଟାର ପେସ ବୋଲର ଜଶପ୍ରୀତ ବୁମରା ଟେଷ୍ଟ କ୍ରିକେଟରେ ହ୍ୟାଟ୍ରିକ ହାସଲ କରିଛନ୍ତି । ୱେଷ୍ଟଇଣ୍ଡିଜ ବିପକ୍ଷ 2ୟ ଟେଷ୍ଟରେ ବୁମରା ଘାତକ ବୋଲିଂ କରିଥିଲେ । 12.1 ଓଭର ବୋଲିଂ କରି 3 ମେଡେନ ସହ 27 ରନ ବ୍ୟୟ କରି 6ଟି ୱିକେଟ ହାସଲ କରିଥିଲେ ବୁମରା ।
ଇଣ୍ଡିଜ ବ୍ୟାଟ୍ସମ୍ୟାନ ଡାରେନ ବ୍ରାଭୋ, ସମରାହ ବ୍ରୁକ୍ସଙ୍କୁ ଲଗାତାର 2ଟି ବଲରେ ଆଉଟ କରି ବୁମରା ପ୍ୟାଭିଲିୟନ ଫେରାଇଥିଲେ । ପରେ 3ୟ ବଲ ସାମ୍ନା କରିଥିଲେ ରୋଷ୍ଟନ ଚେଜ । ବୁମରାଙ୍କ ଘାତକ ୟର୍କର ଚେଜଙ୍କ ପ୍ୟାଡରେ ଲାଗିଥିଲା । ତେବେ ଏହା ଆଉଟ ନୁହେଁ ଭାବିଥିଲେ ବୁମରା । ଅପିଲ ମଧ୍ୟ କରିନଥିଲେ । ମାତ୍ର କ୍ୟାପଟେନ ବିରାଟ ତୁରନ୍ତ ରିଭ୍ୟୁ ନେଇଥିଲେ । ରିଭ୍ୟୁ ସଫଳ ହୋଇଥିଲା ଓ ବୁମରା ଟେଷ୍ଟ କ୍ରିକେଟରେ 3ୟ ଭାରତୀୟ ବୋଲର ଭାବେ ହ୍ୟାଟ୍ରିକ ୱିକେଟ ହାସଲ କରିଥିଲେ।
ପୂର୍ବରୁ ଅଫସ୍ପିନର ହରଭଜନ ସିଂହ ଓ ପେସ ବୋଲର ଇରଫାନ ପଠାନ ଏହି କରସ୍ମା କରିସାରିଛନ୍ତି। 2001ରେ ଅଷ୍ଟ୍ରେଲିଆ ବିପକ୍ଷରେ ଟରବୋନେଟର ହରଭଜନ ହ୍ୟାଟ୍ରିକ ହାସଲ କରିଥିଲେ । ପରେ ବାମହାତୀ ପେସ ବୋଲର ଇରଫାନ ପଠାନ 2006ରେ ପାକିସ୍ତାନ ବିପକ୍ଷରେ ହ୍ୟାଟ୍ରିକ ହାତେଇଥିଲେ ।
