କଟକ: ନିରାଶ ହେବେନି କ୍ରିକେଟପ୍ରେମୀ । ବାରବାଟୀ ଷ୍ଟାଡିୟମରେ ଡିସେମ୍ବର 22ରେ ଖେଳାଯିବ ଭାରତ ବନାମ ୱେଷ୍ଟଇଣ୍ଡିଜ ମ୍ୟାଚ୍ । ଏନେଇ ବିସିସିଆଇ ସହ ହୋଇଛି ଆଲୋଚନା । କେବଳ ଫ୍ଲଡ ଲାଇଟର ମରାମତି ସରିଗଲେ ଗ୍ରାଉଣ୍ଡ ଓ ପାଭିଲୟନ କାମ ଶୀଘ୍ର ସରିବ । ଏହାପରେ ମ୍ୟାଚ ବିନା ଦ୍ଵିଧାରେ ହୋଇପାରିବ ବୋଲି କହିଛନ୍ତି ଓସିଏ ସମ୍ପାଦକ ସଞ୍ଜୟ ବେହେରା ।
ଫନି ପରେ ଷ୍ଟାଡିୟମର ସ୍ଥିତି ବେହାଲ ହୋଇଯାଇଛି । ବିଶେଷକରି ଫ୍ଲଡ୍ ଲାଇଟର ଅବସ୍ଥା ଜରାଜୀର୍ଣ୍ଣ । ତେବେ ଏହି ଫ୍ଲଡ୍ ଲାଇଟ ସଂକ୍ରାନ୍ତରେ କପିଳ ଦେବଙ୍କ ସହ ଆଲୋଚନା ସରିଛି । ସେ ମଧ୍ୟ ଖୁବଶୀଘ୍ର ସାହାଯ୍ୟ କରିବା ନେଇ ମତ ପ୍ରକାଶ କରିଛନ୍ତି ବୋଲି ଓସିଏ ସମ୍ପାଦକ କହିଛନ୍ତି ।
ଅନ୍ୟପଟେ ବିସିସିଆଇର ନୂଆଟିମ୍ ଏକ ପ୍ରକାର ଗଠନ ହୋଇ ସାରିଥିଲାବେଳେ ଔପଚାରିକ ଦୃଷ୍ଟିରୁ ଚଳିତମାସ 23 ତାରିଖରେ ନାମ ଘୋଷଣା ହେବ । ଏହା ପରେ ଓସିଏକୁ ଆର୍ଥିକ ସହାୟତା ମିଳିବ । ଯାହା ଦ୍ବାରା ଷ୍ଟାଡିୟମ ସ୍ଥିତି ଖୁବ ଶୀଘ୍ର ସୁଧୁରିଯିବ ବୋଲି ମଧ୍ୟ ସେ କହିଛନ୍ତି। ତେବେ ଅନେକ କଥା ମ୍ୟାଚକୁ ନେଇ ଉଠୁଥିବା ବେଳେ ଓସିଏର ନୂଆ ଟିମ କେବେ ହେଲେ ଏହି ମ୍ୟାଚକୁ ହାତରୁ ଯିବାକୁ ଦେବନି ବୋଲି ସେ ଦୃଢୋକ୍ତି ପ୍ରକାଶ କରିଛନ୍ତି।
କଟକରୁ ପ୍ରଭୁ କଲ୍ୟାଣ ପାଲ, ଇଟିଭି ଭାରତ
