କଟକ: ରବିବାର ବାରବାଟୀରେ ହେବ ବିଗ ଫାଇଟ । ପୁଣି ଟିମ ଇଣ୍ଡିଆର ସ୍ମରଣୀୟ ମୁକାବିଲାର ମୁକସାକ୍ଷୀ ହେବେ ବାରବାଟୀ ଦର୍ଶକ। ଏହାକୁ ନେଇ ଉତ୍ସବ ମୁଖର କଟକ ସହର । ସୁପର ସଣ୍ଡେରେ ପୋଲାର୍ଡ ପାୱାର ହିଟର ବନାମ ଟିମ ଇଣ୍ଡିଆର ଅଭିଜ୍ଞ କ୍ରିକେଟରଙ୍କ ମଧ୍ୟରେ ହେବ କଡା ଟକ୍କର । ଟି-20 ସିରିଜ ବିଜୟ ପରେ ଦିନିକିଆ ସିରିଜକୁ କବଜା କରିବା ଲକ୍ଷ୍ୟରେ ରହିଛି ବିରାଟ ବାହିନୀ । ଅନ୍ୟପଟେ ଦିନିକିଆ ସରିଜ 1-1ରେ ବରାବର ଥିବାରୁ ସିରିଜ ବିଜୟ ପାଇଁ ଦମ ଲଗାଇବ ଇଣ୍ଡିଜ ।
ଏହି ନିର୍ଣ୍ଣାଟକ ମ୍ୟାଚରେ ବିସିସିଆଇ ସଭାପତି ସୌରଭ ଗାଙ୍ଗୁଲି ଓ ସମ୍ପାଦକ ଜୟ ଶାହା ଯୋଗ ଦେବାର ସମ୍ଭାବନା ରହିଛି । କାରଣ ନିର୍ଣ୍ଣାୟକ ମ୍ୟାଚ ହେଇଥିବାରୁ ପୁରସ୍କାର ବଣ୍ଟନ କାର୍ଯ୍ୟକ୍ରମରେ ଉପସ୍ଥିତ ହୋଇପାରନ୍ତି । ଏନେଇ ବିସିସିଆଇ ସଭାପତି ଓ ସମ୍ପାଦକଙ୍କୁ ନିମନ୍ତ୍ରଣ କରାଯାଇଥିବା କହିଛନ୍ତି ଓସିଏ ସମ୍ପାଦକ ସଞ୍ଜୟ ବେହେରା ।
ଏଥିସହିତ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମଧ୍ୟ ଯୋଗ ଦେବାର କାର୍ଯ୍ୟକ୍ରମ ରହିଛି । ମ୍ୟାଚ ଆରମ୍ଭରେ ଜାତୀୟ ସଙ୍ଗୀତ ଗାନ ହେବା ପରେ ଖେଳାଳିଙ୍କ ସହ ସାକ୍ଷାତ କାର୍ଯ୍ୟକ୍ରମ ରହିଛି । ଏନେଇ ସୂଚନା ଦେଇଛନ୍ତି ଓସିଏ ସମ୍ପାଦକ ।
କଟକରୁ ପ୍ରଭୁ କଲ୍ୟାଣ ପାଲ, ଇଟିଭି ଭାରତ
