କଟକ: ବାରବାଟୀ ଷ୍ଟାଡିୟମରେ ଆରମ୍ଭ ହୋଇଛି ଓଡ଼ିଶା କ୍ରିକେଟ ଲିଗ ଟି-20 ମୁକାବିଲା । ଓଡ଼ିଶା କ୍ରିକେଟ ଆସୋସିଏସନ(OCA) ପକ୍ଷରୁ ରବିବାର ଠାରୁ ଆରମ୍ଭ ହୋଇଥିବା ଏହି ଟୁର୍ଣ୍ଣାମେଣ୍ଟରେ 6ଟି ଟିମ ମଧ୍ୟରେ ହେବ ଜୋରଦାର ଲଢେଇ ।
ନିକଟରେ ବିସିସିଆଇର ବରିଷ୍ଠ ଚୟନକର୍ତ୍ତା କମିଟିରେ ସଦସ୍ୟ ଭାବେ ସ୍ଥାନ ପାଇଥିବା ତଥା ପୂର୍ବତନ ଓଡିଶା କ୍ରିକେଟର ଦେବାଶିଷ ମହାନ୍ତି ମୁଖ୍ୟ ଅତିଥି ରୂପେ ଯୋଗ ଦେଇ ଏହି ଟୁର୍ଣ୍ଣାମେଣ୍ଟର ଉଦଘାଟିତ କରିଛନ୍ତି ।
ଉଦଘାଟନୀ ମୁକାବିଲାରେ ଓଡ଼ିଶା ପୁମାର୍ସ ଟିମର ଟକ୍କର ଓଡ଼ିଶା ପାନ୍ଥର୍ସ ଟିମ ସହ ହୋଇଛି । ଏହି ମୁକାବିଲାକୁ ନେଇ ଖେଳାଳିଙ୍କ ମଧ୍ୟରେ ଢେର ଉତ୍ସାହ ଦେଖା ଦେଇଛି । ଡିସେମ୍ବର ୨୭ରୁ ଜାନୁଆରୀ 13 ପର୍ଯ୍ୟନ୍ତ ଖେଳାଯିବ ଏହି ଟୁର୍ଣ୍ଣାମେଣ୍ଟ । ଫଳରେ ଏକାଧିକ ଦକ୍ଷ ପ୍ରତିଭା ମିଳିବା ନେଇ ଆଶାବାଦୀ ଥିବା କହିଛନ୍ତି ଓସିଏ ସମ୍ପାଦକ ସଞ୍ଜୟ ବେହେରା ।
ଗୋଟିଏ ଟୁର୍ଣ୍ଣାମେଣ୍ଟରେ ନୁହେଁ ନିୟମିତ ଭଲ ପ୍ରଦର୍ଶନ ଜାରି ରଖିଲେ ହିଁ ଓଡ଼ିଆ ଖେଳାଳି ମାନେ ଜାତୀୟ ଚୟନକର୍ତ୍ତାଙ୍କ ଦୃଷ୍ଟିକୁ ଆସିବେ ବୋଲି ସ୍ପଷ୍ଟ କରିଛନ୍ତି ଦେବାଶିଷ ମହାନ୍ତି ।
କଟକରୁ ପ୍ରଭୁ କଲ୍ୟାଣ ପାଲ, ଇଟିଭି ଭାରତ
