ହାଇଦ୍ରାବାଦ: ଅଷ୍ଟ୍ରେଲିଆ କ୍ରିକେଟ ଟିମର ବିସ୍ଫୋରକ ବ୍ୟାଟ୍ସମ୍ୟାନ ଗ୍ଲେନ ମ୍ୟାକ୍ସଓ୍ବେଲ ଆଗାମୀ ଆଇପିଏଲର ନିଲାମକୁ ନେଇ ପ୍ରତିକ୍ରିୟା ରଖିଛନ୍ତି । ବିରାଟଙ୍କ ଅଧିନରେ ଆରସିବି ଟିମ ପାଇଁ ଖେଳିବାକୁ ଇଚ୍ଛା ପ୍ରକାଶ କରିଛନ୍ତି ଏହି ଅଷ୍ଟ୍ରେଲିଆ କ୍ରିକେଟର ।
ସୂଚନାଥାଉକି, ଆଇପିଏଲ 2020ରେ ମ୍ୟାକ୍ସଓ୍ବେଲ କିଙ୍ଗ୍ସ ଏକାଦଶ ପଞ୍ଜାବ ଟିମ ପକ୍ଷରୁ ଖେଳୁଥିଲେ । କିନ୍ତୁ ଚଳିତ ବର୍ଷ ଟିମ ତାଙ୍କୁ ରିଲିଜ କରିଛି । ଆଗାମୀ ଗୁରୁବାରରେ ହେବାକୁ ଥିବା ଆଇପିଏଲ ନିଲାମରେ ତାଙ୍କର ବେସ୍ ପ୍ରାଇସ୍ 2କୋଟି ରହିଛି ।
ଏକ ଓ୍ବେବସାଇଟ୍କୁ ମ୍ୟାକ୍ସଓ୍ବେଲ କହିଛନ୍ତି ଯେ, ମୁଁ ବିରାଟଙ୍କ ସହ ଭଲ ଖେଳିପାରିବି । ମତେ ବହୁତ ଖୁସି ଲାଗିବ ବିରାଟଙ୍କ ଅଧିନରେ ଖେଳିବା ଓ ତାଙ୍କ ସହ ବ୍ୟାଟିଂ କରିବା ବି ବେଶ୍ ଉପଭୋଗ କରିବି । ତାଙ୍କ ସହ କାମ କରିବା ବେଶ୍ ସାନଦାର ଓ କୁଲ୍ ରହିବ ।
32ବର୍ଷୀୟ ମ୍ୟାକ୍ସଓ୍ବେଲ ଏଯାଏଁ 82ଟି ଆଇପିଏଲ ମ୍ୟାଚ ଖେଳିଛନ୍ତି ଓ 154.68 ଷ୍ଟ୍ରାଇକ୍ ରେଟ୍ ସହ 1505ରନ୍ ସଂଗ୍ରହ କରିଛନ୍ତି । ତାଙ୍କ ନାଁରେ 19ଟି ଓ୍ବିକେଟ ବି ରହିଛି । ସେ ପଞ୍ଜାବ ବ୍ୟତୀତ ମୁମ୍ବାଇ, ଦିଲ୍ଲୀ ପକ୍ଷରୁ ମଧ୍ୟ ଖେଳିଛନ୍ତି ।
