ହାଇଦ୍ରାବାଦ: ଶନିବାର ଠାରୁ ଆରମ୍ଭ ହେଉଛି ଭାରତ-ଅଷ୍ଟ୍ରେଲିଆ ମଧ୍ୟରେ 5 ମ୍ୟାଚ ବିଶିଷ୍ଟ ଦିନିକିଆ ସିରିଜ । ଏଥିପାଇଁ ଭାରତୀୟ ଦଳର ଏକାଦଶ ଆସନ୍ତାକାଲି ସକାଳେ ଜଣାପଡିବ । କିନ୍ତୁ ଦଳର 12 ତମ ଖେଳାଳି ଏବେଠାରୁ ଜଣାପଡିଗଲାଣି । ଆସନ୍ତୁ ଜାଣିବା କିଏ ଏହି ସ୍ୱତନ୍ତ୍ର ଦ୍ୱାଦଶ ଖେଳାଳି ।
ମଧ୍ୟପ୍ରଦେଶ ଗ୍ୱାଲିୟର ନିବାସୀ 25 ବର୍ଷିୟ ଧରମଭୀର ପାଲ ହେଉଛନ୍ତି ଭାରତୀୟ ଦଳର ଅନଅଫିସିଆଲ ଦ୍ୱାଦଶ ଖେଳାଳି । ତାଙ୍କୁ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ(ବିସିସିଆଇ) ଅନଅଫିସିଆଲ ମାସ୍କଟ ଅଫ ଟିମ ଇଣ୍ଡିଆର ଆଖ୍ୟା ଦେଇଛି । ଧରମଭୀର ଭାରତୀୟ କ୍ରିକେଟ ଦଳର ଜଣେ ବଡ ପ୍ରଶଂସକ । ଦଳ ସାଙ୍ଗରେ ସେ ସବୁବେଳେ ଥାଆନ୍ତି । ଦଳ ଯୁଆଡେ ଯାଏ ସେ ସେଠାରେ ପହଞ୍ଚିଯାଆନ୍ତି । ଏପରିକି ଭାରତୀୟ ଦଳର ପ୍ରାକ୍ଟିସ ସମୟରେ ସେ ବଲ ବୟ ଭାବେକାମ କରିଥାନ୍ତି ।
ସଚିନଙ୍କଠାରୁ ଆରମ୍ଭ କରି ବିରାଟଙ୍କ ପର୍ଯ୍ୟନ୍ତ ସମସ୍ତ ଖେଳାଳି ଧରମଭୀରଙ୍କୁ ଜାଣିଛନ୍ତି । ସେ ମଧ୍ୟ ସବୁ ଖେଳାଳିଙ୍କ ବିଷୟରେ ଟିକିନିଖ ଖବର ରଖିଛନ୍ତି । ଏପରି କୌଣସି ଖେଳାଳି ନାହାନ୍ତି ଯାହା ବିଷୟରେ ସେ କିଛି କହିପାରିବେ ନାହିଁ । ତାଙ୍କର ପସନ୍ଦିତ କ୍ରିକେଟର ହେଉଛନ୍ତି ଯୁବରାଜ ସିଂହ । ଯୁବରାଜଙ୍କ ପରାମର୍ଶ ଅନୁସାରେ ସେ ଇଂରାଜୀ ଦୈନିକ ଖବରକାଗଜ ପଢିବା ଆରମ୍ଭ କରିଥିଲେ । ଯାହା ଫଳରେ 10ମ ଫେଲ ହୋଇ ମଧ୍ୟ ସେ ଚତ୍ମକାର ଇଂରାଜୀ କହିପାରନ୍ତି ।
ଆପଣଙ୍କୁ କହି ରଖୁଛୁ ଯେ ମାଂସପେଶୀରେ ପାରାଲିସିସ ଯୋଗୁଁ ଧରମଭୀର ଦୁଇ ହାତ ଭରା ଦେଇ ଚାଲନ୍ତି । ତାଙ୍କ ବାପାଙ୍କ ଦେହାନ୍ତ ପରେ ଭାରତୀୟ ଖେଳାଳିଙ୍କ ଦ୍ୱାରା ପ୍ରଦତ୍ତ ଟଙ୍କାରେ ପରିବାର ଚଳେ । ସେ ନିଜେ ଭାରତୀୟ ଦିବ୍ୟାଙ୍ଗ ଟିମର କ୍ୟାପ୍ଟେନ । ଟିମ ଇଣ୍ଡିଆ ସହ ସେ ପ୍ରାୟ ସବୁ ମ୍ୟାଚରେ ଉପସ୍ଥିତ ରହନ୍ତି । ଏପରିକି ବିଦେଶ ଯାତ୍ରାରେ ମଧ୍ୟ ସେ ଯାଇଛନ୍ତି । ଆଗାମୀ ବିଶ୍ୱକପରେ ଦଳକୁ ସମର୍ଥନ ଦେବା ପାଇଁ ସେ ଇଂଲଣ୍ଡ ଯିବେ ବୋଲି କହିଛନ୍ତି ।
