କେପଟାଉନ: ଇଂଲଣ୍ଡ କ୍ରିକେଟ ଟିମ ଆସନ୍ତା ମାସରେ 6ଟି ସୀମିତ ଓଭର ମ୍ୟାଚ ଖେଳିବାକୁ ଦକ୍ଷିଣ ଆଫ୍ରିକା ଗସ୍ତ କରିବ । ଦକ୍ଷିଣ ଆଫ୍ରିକା ସରକାର ଅତିଥି ଟିମକୁ କୋରୋନା ଭାଇରସ ଜନିତ ଯାତ୍ରା କଟକଣାକୁ ମୁକ୍ତ କରିଛି ।
ଇଂଲଣ୍ଡ ଓ ଦକ୍ଷିଣ ଆଫ୍ରିକା ମଧ୍ୟରେ 3 ମ୍ୟାଚ ବିଶିଷ୍ଟ ଟି-20 ସିରିଜ ଓ ସମାନ ସଂଖ୍ୟକ ଦିନିକିଆ ସିରିଜ ଖେଳାଯିବ । 4ଟି ମ୍ୟାଚ କେପଟାଉନରେ ଖେଳାଯିବା ନେଇ ସ୍ଥିର ହୋଇଥିବାବେଳେ, ଅବଶିଷ୍ଟ ଦୁଇଟି ମ୍ୟାଚ ନିକଟସ୍ଥ ସହର ପର୍ଲରେ ଖେଳାଯିବ । ଅର୍ଥାତ ଇଂଲଣ୍ଡ ଟିମ ଗୋଟିଏ ହୋଟଲରେ ଜୈବ ସୁରକ୍ଷା ବଳୟରେ ରହିବ । ଦକ୍ଷିଣ ଆଫ୍ରିକାରେ ଏଯାବତ 7 ଲକ୍ଷକୁ ଅଧିକ କୋରୋନା ଭାଇରସ ପଜିଟିଭ ସଂଖ୍ୟା ସାମ୍ନାକୁ ଆସି ସାରିଛି ।
ଏହି ସିରିଜ ପାଇଁ ଇଂଲଣ୍ଡ ଟିମ 16 ନଭେମ୍ବରରେ ଦକ୍ଷିଣ ଆଫ୍ରିକା ଗସ୍ତ କରିବ । ଟି-20 ମୁକାବିଲା 27, 29 ନଭେମ୍ବର ଓ 1 ଡିସେମ୍ବରରେ ଖେଳାଯିବ । ସେହିପରି ଅନ୍ତର୍ଜାତୀୟ ଦିନିକିଆ ମ୍ୟାଚ 4, 6, ଓ 9 ଡିସେମ୍ବରରେ ଖେଳାଯିବ । ତେବେ ସମସ୍ତ ମ୍ୟାଚ ବିନା ଦର୍ଶକରେ ଖାଲି ଷ୍ଟାଡିୟମରେ ଖେଳାଯିବ ।
ବ୍ୟୁରୋ ରିପୋର୍ଟ, ଇଟିଭି ଭାରତ
