ହାଇଦ୍ରାବାଦ: ବ୍ୟକ୍ତିଗତ କାରଣରୁ ଆଇପିଏଲ 2020ରୁ ଓହରିଯାଇଛନ୍ତି ଅଲରାଉଣ୍ଡର ସୁରେଶ ରାଇନା । ତେବେ ଏହି ନିଷ୍ପତି ରାଇନାଙ୍କ ପାଇଁ ମହଙ୍ଗା ପଡିବ ବୋଲି ଚର୍ଚ୍ଚା ହେଉଛି । 2021 ସଂସ୍କରଣର ଆଇପିଏଲ ପୂର୍ବରୁ ଆସନ୍ତାବର୍ଷ ଚେନ୍ନାଇ ସୁପର କିଙ୍ଗ୍ସ ରାଇନାଙ୍କୁ ଦଳରୁ ବାହାର କରିବା ସମ୍ଭାବନା ରହିଛି ।
ଆଇପିଏଲ 2020 ପାଇଁ ୟୁଏଇରେ ଥିବା ଚେନ୍ନାଇ ସୁପର କିଙ୍ଗ୍ସର ଦୁଇ ଖେଳାଳି ଦୀପକ ଚହର ଓ ଋତୁରାଜ ଗାଏକ୍ବାଡଙ୍କ ସମେତ 13 ସଦସ୍ୟ କୋରୋନା ପଜିଟିଭ ଚିହ୍ନଟ ହୋଇଥିବା ଜଣାପଡିଥିଲା । ଆଇପିଏଲ ସୁତ୍ର ଅନୁଯାୟୀ, ଏହି କାରଣ ପାଇଁ ରାଇନା ଆଇପିଏଲରୁ ଓହରିଯାଇଛନ୍ତି । ରୈନାଙ୍କ ଏହି ନିଷ୍ପତିରେ ଟିମ ମ୍ୟାନେଜମେଣ୍ଟ, ସିଏସକେ ମାଲିକ ତଥା ପୂର୍ବତନ ବିସିସିଆଇ ସଭାପତି ଏନ ଶ୍ରୀନିବାସନ ଅସନ୍ତୁଷ୍ଟ ଥିବା ଜଣାପଡିଛି ।
ଅନ୍ୟ ଏକ ଆଇପିଏଲ ସୁତ୍ର ଅନୁଯାୟୀ, କୋଚ, କ୍ୟାପଟେନ ଓ ମ୍ୟାନେଜରଙ୍କୁ ପସନ୍ଦ ଅନୁଯାୟୀ ରୁମ ମିଳିଥିଲା । ମାତ୍ର ରାଇନାଙ୍କୁ ଯେଉଁ ରୁମ ମିଳିଥିଲା, ସେଠାରେ ବାଲକୋନି ନଥିଲା ।
ଏହା ଏକ କାରଣ, ମାତ୍ର ଭାରତ ଫେରିଯିବା ପାଇଁ ବଡ କାରଣ ହୋଇନପାରେ । ରାଇନାଙ୍କ ନାମରେ ଜୈବ ସୁରକ୍ଷା ନିୟମ ଉଂଲଘନ ନେଇ ମଧ୍ୟ ଚର୍ଚ୍ଚା ରହିଥିଲା ।
ହୁଏତ ରାଇନା ବର୍ତ୍ତମାନର ସ୍ଥିତିରେ ଏହି ସଂସ୍କରଣରେ ଏପରି ନିଷ୍ପତି ନେଇଛନ୍ତି । ତେବେ ଆଇପିଏଲର ପରବର୍ତ୍ତୀ ସଂସ୍କରଣ 2021 ଏପ୍ରିଲରେ ରହିଛି । ଚେନ୍ନାଇର 'ଚିନ୍ନା ଥାଲା' ସିଏସକେର ହଳଦିଆ ଜର୍ସିରେ ହୁଏତ ଆଉ ନଜର ଆସିନପାରନ୍ତି ।
ତେବେ ଏଯାବତ ରାଇନାଙ୍କ ବଦଳ ଖେଳାଳି ଚେନ୍ନାଇ ସୁପର କିଙ୍ଗ୍ସ ପକ୍ଷରୁ ଘୋଷଣା କରାଯାଇନାହିଁ । ରାଇନା 164ଟି ଆଇପିଏଲ ମ୍ୟାଚରୁ, ସିଏସକେ ପକ୍ଷରୁ ସର୍ବାଧିକ 4527 ରନ ହାସଲକାରୀ ଖେଳାଳି ରହିଛନ୍ତି । ଉତ୍ତର ପ୍ରଦେଶର ବାମହାତୀ ବ୍ୟାଟ୍ସମ୍ୟାନ ରାଇନା ଆଇପିଏଲ ଇତିହାସରେ 5368 ରନ ସହ ଦ୍ବିତୀୟ ସର୍ବାଧିକ ରନ ହାସଲକାରୀ ବ୍ୟାଟ୍ସମ୍ୟାନ ରହିଛନ୍ତି । ପ୍ରଥମ ସ୍ଥାନରେ ଟିମ ଇଣ୍ଡିଆ କ୍ୟାପଟେନ 5412 ରନ ସହ ପ୍ରଥମ ସ୍ଥାନରେ ରହିଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
