ସିଡନି: ୱେଷ୍ଟ ଇଣ୍ଡିଜର ମହାନ ଖେଳାଳି ଭିଭ ରିଚାର୍ଡ୍ସ ବିନା ହେଲମେଟରେ ଖେଳିବା ପାଇଁ ବେଶ ଜଣାଶୁଣା । ରିଚାର୍ଡ୍ସ ଅନେକ ଭୟଙ୍କର ଫାଷ୍ଟ ବୋଲରଙ୍କୁ ସାମ୍ନା କରିଛନ୍ତି । ଆଉ ସେତେବେଳେ ବାଉନ୍ସର ଉପରେ ଏତେ କଟକଣା ମଧ୍ୟ ନଥିଲା । ତେବେ ଅଷ୍ଟ୍ରେଲିଆ ଅଲରାଉଣ୍ଡର ସେନ ୱାଟସନଙ୍କ ସହ ଆଲୋଚନା କରି ଭିଭ କହିଛନ୍ତି ଯେ ବିନା ହେଲମେଟରେ ଖେଳିବା ବେଳେ ଯେଉଁ ବିପଦ ଥାଏ ତାସହ ଖେଳିବାରେ ମତେ କୌଣସି ଅସୁବିଧା ହେଉ ନଥିଲା ।
‘ଖେଳ ପାଇଁ ମୋର ଏତେମାତ୍ରାରେ ଆବେଗ ଥିଲା ଯେ ଯାହାକୁ ମୁଁ ଏତେ ଭଲପାଏ ତାହା ଖେଳିଲା ବେଳେ ମୋର ଜୀବନ ଚାଲିଯାଇଥିଲେ ବି ମୋର ଦୁଃଖ ନଥିଲା । ଯଦି ମୁଁ ଏହା ବାଛିଛି ଏବଂ ମୁଁ ଏଠାକୁ ଯାଏ, ତେବେ ତାଠାରୁ ଆଉ କଣ ଭଲ ରାସ୍ତା ଅଛି ଯିବାକୁ ? ବୋଲି ୱାଟସନଙ୍କ ସହ କଥା ହେବା ବେଳେ ସେ କହିଛନ୍ତି ।
ସେ ଏହା ମଧ୍ୟ କହିଛନ୍ତି ଯେ, ଅନ୍ୟ ଖେଳ ସହ ଜଡିତ ଖେଳାଳିଙ୍କ ଠାରୁ ତାଙ୍କୁ ପ୍ରେରଣା ମିଳେ । ଯେଉଁମାନେ କି ନିଜର ଜୀବନକୁ ଖେଳପାଇଁ ଉତ୍ସର୍ଗ କରି ଦିଅନ୍ତି । ‘ମୁଁ ଜଣେ ବ୍ୟକ୍ତିଙ୍କୁ ଦେଖିଛି ଯିଏ ଫର୍ମ୍ୟୁଲା 1 ରେସିଙ୍ଗ କାର ଚଳାଉଥିଲେ, ତାଠାରୁ ଆଉ ବିପଦଜନକ କଣ ହୋଇପାରେ ?’ ଯାହା ପରେ ମଜାରେ ୱାଟସନ କହିଥିଲେ, ତାଠାରୁ ଅଧିକ ବିପଦଜନକ ହେଉଛି ‘ବିନା ହେଲମେଟରେ 150 କିମି ପ୍ରତିଘଣ୍ଟା ବେଗରେ ଆସୁଥିବା ବଲକୁ ସାମ୍ନା କରିବା ।’
