ମୁମ୍ବାଇ: ବିସିସିଆଇର କ୍ରିକେଟ ପରିଚାଳନା ଜେନେରାଲ ମ୍ୟାନେଜର ପଦରୁ ସାବା କରିମଙ୍କ ଇସ୍ତଫା । ତେବେ ଏନେଇ ଖୁବଶୀଘ୍ର ଆନୁଷ୍ଠାନିକ ଭାବେ ଘୋଷଣା ହେବାର ସମ୍ଭାବନା ରହିଛି ।
2017 ଡିସେମ୍ବରରେ କରିମ ବିସିସିଆଇରେ ଯୋଗ ଦେଇଥିଲେ । ପୂର୍ବତନ ସିଇଓ ରାହୁଲ ଜୋହରୀଙ୍କ ତତ୍ବାବଧାନରେ ସେ କାର୍ଯ୍ୟ କରୁଥିଲେ । ତେବେ ବିସିସିଆଇ ସଭାପତି ସୌରଭ ଗାଙ୍ଗୁଲିଙ୍କୁ ଜୋହରୀ ଇମେଲ ଯୋଗେଁ ଇସ୍ତଫା ପତ୍ର ପଠାଇବାର ଗୋଟିଏେ ସପ୍ତାହ ପରେ କରିମ ମଧ୍ୟ ଇସ୍ତଫା ଛାଡିଛନ୍ତି ।
ତେବେ ସାବା କରିମଙ୍କ ପଦ ଛାଡିବାକୁ ନେଇ ବିସିସିଆଇ ଅଧିକାରୀ ନିରବତା ଅବଲମ୍ବନ କରିଛନ୍ତି । ଏମିତିକି ବିଦାୟ ବେଳେ ପଦଟିଏ ମୁହଁ ଖୋଲି ନାହାନ୍ତି । ଅନ୍ୟପଟେ ପରବର୍ତ୍ତୀ ଜେନେରାଲ ମ୍ୟାନେଜର ପଦ କାହାକୁ ମିଳିବ, ଏଯାବତ ସ୍ପଷ୍ଟ ହୋଇନାହିଁ ।
କରିମ ଘରୋଇ ସିଜିନର ସୂଚୀ ଓ କ୍ରିକେଟ ପରିଚାଳନା ନେଇ ସମସ୍ତ ଦାୟିତ୍ବ ନିଭେଇଥାନ୍ତି । ମାତ୍ର ମହାମାରୀ କୋରୋନା ଭାଇରସ ସଂକ୍ରମଣ ଭୟ ଯୋଗୁଁ ଚଳିତ ବର୍ଷର ଘରୋଇ କ୍ରିକେଟ ସୂଚୀ ସଂପୂର୍ଣ୍ଣ ପ୍ରଭାବିତ ହୋଇଛି । ଡିସେମ୍ବରରେ ଘରୋଇ ସିଜିନ ଆରମ୍ଭ ନେଇ ବିସିସିଆଇ ବିଚାର କରୁଥିବା ଚର୍ଚ୍ଚା ହେଉଛି ।
ଜୁଲାଇ 17ରେ ହୋଇଥିବା ବୋର୍ଡର ଆପେକ୍ସ କାଉନସିଲ ବୈଠକରେ ଡିସେମ୍ବର ପର୍ଯ୍ୟନ୍ତ, ଘରୋଇ କ୍ରିକେଟକୁ ସ୍ଥଗିତ ରଖାଯାଇଛି । ରଣଜୀ ଟ୍ରଫି ସମେତ କୌଣସି ପ୍ରଥମ ଶ୍ରେଣୀ ଟୁର୍ଣ୍ଣାମେଣ୍ଟ ଡିସେମ୍ବର ପୂର୍ବରୁ ଆରମ୍ଭ ହେବନାହିଁ ବୋଲି ନିଷ୍ପତି ନିଆଯାଇଛି । ଏଥିସହିତ ଦୁଲ୍ଲିପ ଟ୍ରଫି, ଦେଓଧର ଟ୍ରଫି ଓ ଚ୍ୟାଲେଞ୍ଜର୍ସ ସିରିଜ ପ୍ରଭାବିତ ହୋଇଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
