ଆବୁଧାବି: ଆଫଗାନିସ୍ତାନର ଅସଘର ଆଫଗାନ ଶନିବାର ପୂର୍ବତନ ଭାରତୀୟ କ୍ୟାପଟେନ ମହେନ୍ଦ୍ର ସିଂହ ଧୋନିଙ୍କ ରେକର୍ଡକୁ ଅତିକ୍ରମ କରିବା ସହ ଅନ୍ତର୍ଜାତୀୟ ଟି20ରେ ସଫଳତମ କ୍ୟାପଟେନ ହୋଇଛନ୍ତି ।
ଜିମ୍ବାୱେ ବିପକ୍ଷ ତୃତୀୟ ଟି20ରେ 47 ରନରେ ବିଜୟୀ ହୋଇଛି ଆଫଗାନିସ୍ତାନ । ଶୈଖ ଜାଏଦ ଷ୍ଟାଡିୟମ ଆବୁଧାବିରେ ଖେଳାଯାଇଥିବା ଏହି ମ୍ୟାଚରେ ଏହି ରେକର୍ଡର ଅଧିକାରୀ ହୋଇଛନ୍ତି ଆଫଗାନ କ୍ୟାପଟେନ ।
ଅନ୍ତର୍ଜାତୀୟ ଟି20ରେ ଆଫଗାନଙ୍କ ନାମରେ ବର୍ତ୍ତମାନ 42ଟି ବିଜୟ ରହିଛି । ଫଳରେ ଧୋନିଙ୍କ 41ଟି ମ୍ୟାଚରେ ବିଜୟ ରେକର୍ଡକୁ ଅତିକ୍ରମ କରିଛନ୍ତି । ଦ୍ବିତୀୟ ଟି20ରେ ଜିମ୍ବାୱେକୁ ଆଫଗାନିସ୍ତାନ ହରାଇବା ପରେ ସେ କ୍ୟାପଟେନ ଭାବେ ସର୍ବାଧିକ ଥର ମ୍ୟାଚ ବିଜୟୀ ହେବାରେ ଧୋନିଙ୍କ ରେକର୍ଡର ସମକକ୍ଷ ହୋଇଥିଲେ ।
ଏହି ତାଲିକାରେ ଇଂଲଣ୍ଡ କ୍ୟାପଟେନ ଇଆନ ମୋର୍ଗାନ 33 ବିଜୟ ସହ ତୃତୀୟ ଓ ପାକିସ୍ତାନର ସର୍ଫରାଜ ଅହମ୍ମଦ 29 ବିଜୟ ସହ ଚତୁର୍ଥ ସ୍ଥାନରେ ରହିଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
