ଦୁବାଇ: ଚଳିତ ଏସିଆ କପ୍ ଲିଗ ମ୍ୟାଚରେ ଭାରତ ପାକିସ୍ତାନକୁ 5 ୱିକେଟରେ ହରାଇଥିଲା । ସୁପର ଫୋର ପର୍ଯ୍ୟାୟରେ ପାକିସ୍ତାନ ଭାରତକୁ 5 ୱିକେଟରେ ପରାସ୍ତ କରିଛି । ବିରାଟ କୋହଲିଙ୍କ ଅର୍ଦ୍ଧଶତକ ବିଫଳ ହୋଇଛି । ଭାରତ 7 ୱିକେଟ ହରାଇ 181 ରନ କରିଥିଲା । ପାକିସ୍ତାନ ବ୍ୟାଟରଙ୍କୁ ଅଟକାଇବାରେ ବିଫଳ ହୋଇଥିଲେ ଭାରତୀୟ ବୋଲର । 19.5 ଓଭରରେ 5 ୱିକେଟ ହରାଇ ପାକିସ୍ତାନ ଆବଶ୍ୟକ ରନ ସଂଗ୍ରହ କରି ନେଇଥିଲା । ଅଲରାଉଣ୍ଡର ପ୍ରଦର୍ଶନ ପାଇଁ ନୱାଜ ପ୍ଲେୟାର ଅଫ ଦ ମ୍ୟାଚ ବିବେଚିତ ହୋଇଥିଲେ । ଦୀର୍ଘ ୮ ବର୍ଷ ପରେ ଏସିଆ କପରେ ଭାରତକୁ ପରାସ୍ତ କରିଛି ପାକିସ୍ତାନ । ଏହାପୂର୍ବରୁ ୨୦୧୪ରେ ପାକିସ୍ତାନ ଏସିଆ କପରେ ଭାରତ ବିପକ୍ଷରେ ଜିତିଥିଲା ।
ଭାରତ ପାକିସ୍ତାନର ଏହି ହାଇଭୋଲଟେଜ ମ୍ୟାଚକୁ ଦେଖିବାକୁ ଫ୍ୟାନ୍ସ ଉତ୍କଣ୍ଠାର ସହ ଅପେକ୍ଷା କରିଥିଲେ । ଟସ୍ ଜିତି ପାକିସ୍ତାନ କ୍ୟାପଟେନ ବାବର ଆଜମ ପ୍ରଥମେ ଫିଲ୍ଡିଂ ନିଷ୍ପତ୍ତି ନେଇଥିଲେ । ବ୍ୟାଟିଂ ଆମନ୍ତ୍ରଣ ପାଇ ଭାରତ ଗ୍ରାଉଣ୍ଡକୁ ଓହ୍ଲାଇଥିଲା । ଦୁଇ ଓପନର ରୋହିତ ଶର୍ମା ଓ କେଏଲ ରାହୁଲ ପାଳି ଆରମ୍ଭ କରିଥିଲେ । ଆରମ୍ଭରୁ ବିସ୍ଫୋରକ ବ୍ୟାଟିଂ କରି 4.2 ଓଭରରେ 50 ରନ କରିଥିଲେ ଉଭୟ । ହ୍ୟାରିସ ରୌଫ ଷଷ୍ଠ ଓଭରରେ ରୋହିତଙ୍କୁ ଆଉଟ କରିଥିଲେ । 16ଟି ବଲରୁ 28 ରନ କରିଥିଲେ ରାହୁଲ । ସପ୍ତମ ଓଭରରେ 28ରନ କରି ରାହୁଲ ଆଉଟ ହୋଇଥିଲେ । ପ୍ରଥମ ୱିକେଟ ପତନ ପରେ ବ୍ୟାଟିଂ କରିବାକୁ ଆସିଥିଲେ ବିରାଟ କୋହଲି ।
ହାଇଭୋଲଟେଜ ମୁକାବିଲାର ହିରୋ ସାଜିଥିଲେ ବିରାଟ । ୱିକେଟ ପତନ ହୋଇଥିଲେ ବି କୋହଲି ବିଚଳିତ ହୋଇ ନହୋଇ ଦଳୀୟ ସ୍କୋରକୁ ଆଗକୁ ନେଇଥିଲେ । ମଧ୍ୟଭାଗରେ ସୂର୍ଯ୍ୟକୁମାର (13), ଋଷବ ପନ୍ତ (14)ଓ ହାର୍ଦ୍ଦିକ ପାଣ୍ଡ୍ୟା (0)ଙ୍କୁ ସଅଳ ପାଭିଲିୟନ ପଠାଇଥିଲେ ପାକିସ୍ତାନ ବୋଲର । କୋହଲି ଦର୍ଶକୀୟ ସଟ ଖେଳିଥିଲେ । ଦୀପକ ହୁଡ୍ଡା ଓ କୋହଲିଙ୍କ ମଧ୍ୟରେ ଷଷ୍ଠ ୱିକେଟରେ 37ରନ ଭାଗିଦାରୀ ହୋଇଥିଲା । ହୁଡା (16) ଆଉଟ ହେବା ପରେ କୋହଲି 44 ବଲରେ 60 ରନ କରି ରନ ଆଉଟ ହୋଇଥିଲେ । ରବି ବିଷ୍ଣୋଇ ଶେଷ 2ଟି ବଲରେ 2ଟି ଚୌକା ମାରି ଦଲୀୟ ସ୍କୋରକୁ 181ରେ ପହଞ୍ଚାଇଥିଲେ ।
