ଭୁବନେଶ୍ବର: ପୁଣି ଏକ ବଡ ଜାତୀୟସ୍ତରୀୟ କ୍ରୀଡା ଟୁର୍ଣ୍ଣାମେଣ୍ଟର ସଫଳ ଆୟୋଜନ କରିଛି ଓଡିଶା। ଆରମ୍ଭ ହୋଇଯାଇଛି 33ତମ ଜାତୀୟ ସବ-ଜୁନିୟର ବ୍ୟାଡମିଣ୍ଟନ ଚମ୍ପିଆନସିପ। ସ୍ଥାନୀୟ ରେଲୱେ ଇନଡୋର ଷ୍ଟାଡିୟମରେ ମୁଖ୍ୟ ଶାସନ ସଚିବ ଅସିତ୍ କୁମାର ତ୍ରିପାଠୀ ଏହି ଟୁର୍ଣ୍ଣାମେଣ୍ଟର ଉଦଘାଟନ କରିଛନ୍ତି। ଏହି ଚମ୍ପିଆନସିପରେ ପ୍ରାୟ 600 ଖେଳାଳି ଭାଗ ନେଇଛନ୍ତି।
ଓଡିଶା ଦେଶର କ୍ରୀଡା ରାଜଧାନୀ ହେବା ଦିଗରେ ଏହି ଟୁର୍ଣ୍ଣାମେଣ୍ଟ ଆଉ ପାଦେ ଆଗକୁ ନେବ ବୋଲି କହିଛନ୍ତି ମୁଖ୍ୟ ଶାସନ ସଚିବ। ରାଜ୍ୟରେ ଏଭଳି କ୍ରୀଡା ଆୟୋଜନ ତୃଣମୂଳସ୍ତରରୁ କ୍ରୀଡ଼ବିତଙ୍କୁ ପ୍ରୋତ୍ସାହିତ କରିବ। ସେହିଭଳି ଆଗକୁ ରାଜ୍ୟ ସରକାରଙ୍କ ସହିତ ପୁଲେଲା ଗୋପିଚାନ୍ଦ ସ୍ପୋଟର୍ସ ଏକାଡେମୀ ଖୁବ ଶୀଘ୍ର କାର୍ଯ୍ୟକାରୀ ହେବାକୁ ଯାଉଥିବା ସେ କହିଛନ୍ତି। ଏହି ଏକାଡେମୀରୁ ଅଧିକ ଜାତୀୟ ଓ ଅନ୍ତର୍ଜାତୀୟ ସ୍ତରର ଖେଳାଳି ଆମ ରାଜ୍ୟରୁ ବାହାରିବା ଦିଗରେ ସହାୟକ ହେବ। ଏହାସହିତ ସମସ୍ତ ପ୍ରତିଯୋଗୀଙ୍କୁ ଶୁଭେଚ୍ଛା ଜଣାଇବା ସହ ନିଜର ଶ୍ରେଷ୍ଠତା ପ୍ରଦର୍ଶନ କରିବାକୁ ଉତ୍ସାହିତ କରିଛନ୍ତି ମୁଖ୍ୟ ଶାସନ ସଚିବ।
ଏଭଳି ଆୟୋଜନ ଆଗାମୀ ଯୁବପିଢ଼ିଙ୍କ ପାଇଁ ସୁବର୍ଣ୍ଣ ସୁଯୋଗ ସୃଷ୍ଟି କରିବ ବୋଲି କହିଛନ୍ତି ଓଡିଶାର ଆନ୍ତର୍ଜାତିକ ଖେଳାଳି ଋତୁପର୍ଣ୍ଣା ପଣ୍ଡା। ଦେଶର ବିଭିନ୍ନ ସ୍ଥାନରୁ ଆସିଥିବା ଅନେକ ଜାତୀୟ ଓ ଆନ୍ତର୍ଜାତୀୟସ୍ତରର ଖେଳାଳିଙ୍କ ସହ ଓଡିଶା ଖେଳାଳି ଖେଳିବାର ସୁଯୋଗ ପାଇବେ।ଫଳରେ ନିଜ ଖେଳରେ ସୁଧାର ଆଣିବାରେ ଓଡିଶା ଖେଳାଳିଙ୍କୁ ଏହି ଟୁର୍ଣ୍ଣାମେଣ୍ଟ ବେଶ ସହାୟକ ହେବ। ଏହି ଟୁର୍ଣ୍ଣାମେଣ୍ଟ ଆଜି ଠାରୁ ଆରମ୍ଭ ହୋଇ ଆସନ୍ତା 22 ତାରିଖ ପର୍ଯ୍ୟନ୍ତ ଖେଳାଯିବ। ରେଲୱେ ଓ ସହିଦ ନଗର ଇନଡୋର ଷ୍ଟାଡିୟମରେ ଏହି ମ୍ୟାଚ ଖେଳାଯିବ। ଦର୍ଶକଙ୍କୁ ମ୍ୟାଚର ମଜା ଉଠାଇବାକୁ ଓଡିଶା ଟେନିସ ଆସୋସିଏସନ ପକ୍ଷରୁ ଅପିଲ କରାଯାଇଛି।
ଭୁବନେଶ୍ବରରୁ ଲକ୍ଷ୍ମୀକାନ୍ତ ଦାସ, ଇଟିଭି ଭାରତ
