ମୁମ୍ବାଇ: ନିକଟରେ ନିଜ ଡେବ୍ୟୁ ୱେବ ସିରିଜ ସମ୍ପର୍କରେ ଘୋଷଣା କରିଥିଲେ ଅନୁଷ୍କା ଶର୍ମା । ଏହାସହ ‘ପାତାଲ ଲୋକ’ର ଟ୍ରେଲର ମଧ୍ୟ ରିଲିଜ ହୋଇଥିଲା । ତେବେ ସୋମବାର ଫିଲ୍ମର 2ଟି କ୍ୟାରେକ୍ଟର ଟିଜର ସେୟାର କରିଛନ୍ତି ଅନୁଷ୍କା ।
ଇନଷ୍ଟାଗ୍ରାମରେ 2ଟି କ୍ୟାରେକ୍ଟର ସମ୍ପର୍କରେ ଟିଜର ସେୟାର କରିଛନ୍ତି ଅନୁଷ୍କା । ଜୟଦୀପ ଅହଲୱାତ ଓ ନୀରଜ କବିଙ୍କ କ୍ୟାରେକ୍ଟର ବିଷୟରେ ଏଥିରେ ସେ ସୂଚନା ଦେଇଛନ୍ତି । ଜୟଦୀପଙ୍କ ଭୂମିକା ନାମ ରହିଛି ହାତୀରାମ ଚୌଧୁରୀ । ଅନୁଷ୍କା ଲେଖିଛନ୍ତି ଯେତେ ବାଧା ବିଘ୍ନ ଆସିଲେ ମଧ୍ୟ ହାତୀରାମକୁ ସତ ଉନ୍ମୋଚନ କରିବାରୁ କେହି ଅଟକାଇପାରିବେ ନାହିଁ । ସେହିପରି ନୀରଜଙ୍କ କ୍ୟାରେକ୍ଟର ନାମ ରହିଛି ସଞ୍ଜୀବ ମେହେରା ଏବଂ ସେ ଗେମର ମିଥ୍ୟାକୁ ସାମନା କରିବାକୁ ଡରନ୍ତି ନାହିଁ ବୋଲି ଅନୁଷ୍କା ଲେଖିଛନ୍ତି । ନୀରଜ ଜଣେ ସାମ୍ବାଦିକ ଭୂମିକାରେ ଅଭିନୟ କରିଛନ୍ତି ।
ପ୍ରକାଶ ଥାଉ କି ମେ 15ରୁ ଆମାଜନ ପ୍ରାଇମ ଭିଡିଓରେ ଏହାର ପ୍ରସାରଣ ହେବ । ଏହାର କାହାଣୀ ଭାରତର ତିନୋଟି ପୌରାଣିକ କ୍ଷେତ୍ର ପାତାଲ ଲୋକ, ଧରିତ୍ରୀ ଲୋକ, ସ୍ବର୍ଗ ଲୋକ ଉପରେ ଆଧାରିତ । ଏଥିରେ ଆଧୁନିକ ଭାରତକୁ ଏହି ତିନୋଟି କ୍ଷେତ୍ର ସହ ତୁଳନା କରାଯାଇଛି । ବ୍ୟବସାୟ କ୍ଷେତ୍ରକୁ ସ୍ବର୍ଗ ଲୋକ, କର୍ମକ୍ଷେତ୍ରକୁ ଧରିତ୍ରୀ ଲୋକ ଏବଂ ଅପରାଧୀଙ୍କ କ୍ଷେତ୍ରକୁ ପାତାଲ ଲୋକ ବୋଲି ଦର୍ଶାଯାଇଛି ।
ଏହାର କାହାଣୀ ଦେଶର ଜଣେ ଲୋକପ୍ରିୟ ସାମ୍ବାଦିକଙ୍କୁ ହତ୍ୟା କରିବାର ବିଫଳ ପ୍ରୟାସ ଉପରେ ଆଧାରିତ । ଏଥିରେ ଅଭିଷେକ ବାନାର୍ଜୀ, ଗୁଲ ପନାଗ ମଧ୍ୟ ଅଭିନୟ କରିଛନ୍ତି । ଏହି ଥ୍ରିଲର କାହାଣୀକୁ କ୍ରିଏଟ କରିଛନ୍ତି ସୁଦୀପ ଶର୍ମା । ପ୍ରଯୋଜିକା ଭାବେ ଫିଲ୍ମରେ ସଫଳତା ପରେ ଅନଲାଇନରେ ଭାଗ୍ୟ ପରୀକ୍ଷା କରିବାକୁ ଯାଉଛନ୍ତି କୋହଲିଙ୍କ ଧର୍ମପତ୍ନୀ । ‘ପାତାଲ ଲୋକ’ ହେଉଛି ଅନୁଷ୍କାଙ୍କ ପ୍ରଯୋଜନା ସଂସ୍ଥା କ୍ଲିନ ସ୍ଲେଟ ଫିଲ୍ମସର ପ୍ରଥମ ୱେବ ସିରିଜ ।
