ଭୁବନେଶ୍ବର: ସିନେପଲିସରେ ବଙ୍ଗଳା ଫିଲ୍ମ ‘ଗୋତ୍ର’ର ସ୍ପେଶାଲ ସ୍କ୍ରିନିଂ କରାଯାଇଛି । ଫିଲ୍ମରେ ଓଡିଶାର ସାମ୍ପ୍ରଦାୟିକତା ଓ ସଦଭାବନାର ସୁନ୍ଦର ଉପସ୍ଥାପନା ସହିତ ସଂସ୍କୃତିକୁ ଅତି ସୁନ୍ଦର ଭାବେ ପଦର୍ଶନ କରାଯାଇଛି । ଫିଲ୍ମଟି ବଙ୍ଗଳା ଦର୍ଶକଙ୍କ ନିକଟରେ ଖୁବ ଆଦୃତ ହେଉଥିବାର ଶୁଣିବାକୁ ମିଳିଛି ।
ଓଡ଼ିଆ ପ୍ରଯୋଜକ ଅକ୍ଷୟ ପରିଜାଙ୍କ ପ୍ରଯୋଜିତ ଏହି ଫିଲ୍ମରେ ମାନବିକ ମୂଲ୍ୟବୋଧ ନିକଟରେ ଜାତି, ଗୋତ୍ରର ପ୍ରତିବନ୍ଧକ କିପରି ହାର ମାନିଯାଉଛି ତାହାକୁ ଜ୍ବଳନ୍ତ ଭାବେ ବଙ୍ଗଳାର ନିର୍ଦେଶକ ନନ୍ଦିତା ରାୟ ଓ ଶିବ ପ୍ରସାଦ ମୁଖାର୍ଜୀ ନିଖୁଣ ଭାବେ ଉପସ୍ଥାପନ କରିଛନ୍ତି । ଯେଉଁଥିରେ ଓଡ଼ିଶାର ଖୋର୍ଦ୍ଧା ଜିଲ୍ଲା ଅନ୍ତର୍ଗତ କାଇପଦର ଅଞ୍ଚଳର ବୋକାରୀ ବାବାଙ୍କ ଦରଘାର ଧାର୍ମିକ ସଦ୍ଭାବନାର ବାର୍ତ୍ତା ସହ ବଙ୍ଗାଳି ପରିବାରର ରୀତିନୀତି ବିଷୟରେ ଉପସ୍ଥାପନା କରାଯାଇଛି ।
ଫିଲ୍ମରେ ଓଡିଶାର ପ୍ରଖ୍ୟାତ ସଙ୍ଗୀତ ରଙ୍ଗବତୀକୁ ବଙ୍ଗଳା ଭାଷାରେ ମଧ୍ୟ ଏଥିରେ ସ୍ଥାନିତ କରାଯାଇଛି । ଏହାକୁ ଦେଖିବାଆକୁ ଆସିଥିବା ବିଶିଷ୍ଟ ବ୍ୟକ୍ତିମାନେ ଶ୍ରୀ ପରିଜାଙ୍କ ଏଭଳି ପ୍ରୟାସକୁ ପ୍ରଶଂସା କରିବା ସହିତ ଦୁଇଟି ରାଜ୍ୟ ମଧ୍ୟରେ ଏଭଳି ସାଂସ୍କୃତିକ ଆଦାନପ୍ରଦାନ ଆଗାମୀ ଦିନରେ ନୂତନ ସମ୍ଭାବନା ଆଣିଦେବ ବୋଲି କହିଛନ୍ତି।
ଭୁବନେଶ୍ବରରୁ ଲକ୍ଷ୍ମୀକାନ୍ତ ଦାସ, ଇଟିଭି ଭାରତ
