ମୁମ୍ବାଇ: ତେଲୁଗୁ ସୁରଷ୍ଟାର ନାଗାର୍ଜୁନକୁ ନେଇ ଏକ ବଡ ଖବର ସାମ୍ନାକୁ ଆସିଛି । ବିବାଦ ଘେରରେ ଏବେ ଅଭିନେତା । କାରଣ ତାଙ୍କ ଫାର୍ମ ହାଉସରୁ ବୁଧବାର ଏକ ମୃତଦେହ ମିଳିଛି । ନାଗାର୍ଜୁନ ଜୈବିକ କୃଷି ପାଇଁ ନିଜ ଫାର୍ମ ହାଉସର ସର୍ଭେ କରିବା ପାଇଁ ଜଣେ ବ୍ୟକ୍ତିଙ୍କୁ ପଠାଇଥିଲେ । କିନ୍ତୁ ଫାର୍ମ ହାଉସରୁ ଏବେ ମୃତଦେହ ମିଳିବା ସମସ୍ତଙ୍କୁ ଚକିତ କରିଦେଇଛି । ଏହି ଘଟଣାରେ ସ୍ଥାନୀୟ ଅଞ୍ଚଳରେ ଭୟର ବାତାବରଣ ସୃଷ୍ଟି ହୋଇଛି।
ତଦନ୍ତରେ ଜଣାପଡିଛି ଯେ ମିଳିଥିବା ମୃତଦେହ ଛଅ ମାସ ପୁରୁଣା । ଯାହାର ଚିହ୍ନଟ କରିବାରେ ଲାଗିପଡିଛି ପୋଲିସ । ଗାଁର ରେଭେନ୍ୟୁ ଅଫିସରଙ୍କ ପାଖରୁ ସୂଚନା ମିଳିବା ପରେ ଫରେନ୍ସିକ ଏକ୍ସପର୍ଟ ସହ ପୋଲିସ ଟିମ ଘଟଣାସ୍ଥଳରେ ପହଞ୍ଚିଥିଲା । ଏହି ଘଟଣାରେ ଏବେ ପୋଲିସ ତଦନ୍ତ ଚଳାଇଛି ।
ପ୍ରକାଶ ଥାଉକି ନାଗାର୍ଜୁନ ଏହି ଜମି କିଛି ବର୍ଷ ପୂର୍ବେ କିଣିଥିଲେ । କିନ୍ତୁ ଦୀର୍ଘ ସମୟରୁ ଏହି ଜମିର କୌଣସି ବ୍ୟବହାର କରାଯାଇନଥିଲା । ଯାହାଦ୍ବାରା ଏହି ଫାର୍ମ ଭୂମି ଅନୁର୍ବର ଥିଲା । ପତ୍ନୀ ଅମଲାଙ୍କ ସହ କିଛି ଦିନ ପୂର୍ବରୁ ନାଗାର୍ଜୁନ ସେଠାକୁ ଯାଇ ବୃକ୍ଷ ରୋପଣ କରିଥିଲେ ବୋଲି ଶୁଣିବାକୁ ମିଳୁଛି ।
