ମୁମ୍ବାଇ: ଉରି ଆକ୍ଟର ବିକି କୌଶଲ ଓ ସୁନ୍ଦରୀ ଅଭିନେତ୍ରୀ କ୍ୟାଟ୍ରିନା କୈଫଙ୍କ ସମ୍ପର୍କକୁ ନେଇ ସୋସିଆଲ ମିଡ଼ିଆରେ ବେଶ ଚର୍ଚ୍ଚା । ଗତ କିଛି ଦିନ ତଳେ ତାଙ୍କର ନିର୍ବନ୍ଧ ଶେଷ ହୋଇଛି ବୋଲି ଗୁଜବ ଉଠିଥିଲା । ଯାହାକୁ ନେଇ ବେଶ ଉତ୍ସାହିତ ହୋଇପଡିଥିଲେ ଉଭୟ ଷ୍ଟାରଙ୍କ ପ୍ରଶଂସକ । ଏହି ଗୁଜବକୁ ନେଇ ବିକିଙ୍କ ବାପାମା’ କିପରି ପ୍ରତିକ୍ରିୟା ପ୍ରକାଶ କରିଥିଲେ ସେ ସମ୍ପର୍କରେ ସୂଚନା ଦେଇଛନ୍ତି ବିକିଙ୍କ ସାନ ଭାଇ ସନି କୌଶଲ ।
ବିକିଙ୍କ ସାନ ଭାଇ ସନି ଏହି ଖବର ମିଥ୍ୟା ବୋଲି କହିଛନ୍ତି । ସନ୍ନି କହିଛନ୍ତି ଯେ ସେମାନଙ୍କ ପରିବାର ଏ ସମ୍ପର୍କରେ ଜାଣିବା ପରେ ବିକିଙ୍କ ସହ ମିଶି ଖୁବ ଜୋରରେ ଏକତ୍ର ହସିଥିଲେ । ତେବେ ଏହି ଖବରରେ କିଛି ସତ୍ୟତା ଅଛି କି ନାହିଁ ସେ ସମ୍ପର୍କରେ ସନିଙ୍କୁ ପଚରାଯାଇଥିଲା । ସେ କହିଥିଲେ ଯେତେବେଳେ ଏହି ଖବର ଆସିଲା ସେତେବେଳେ ବିକି ଜିମ ଯାଇଥିଲେ । ତେବେ ବିକି ଜିମରୁ ଫେରିବା ପରେ ତାଙ୍କ ବାପାମା’ ବିକିଙ୍କୁ କହିଥିଲେ ଯେ, " ଆରେ ୟାର, ତୋ ନିର୍ବନ୍ଧ ହୋଇଯାଇଛି, ମିଠା ତ ଖାଇବାକୁ ଦେ" । ଏହାପରେ ବିକି କହିଥିଲେ ଯେ, "ଯେମିତି ଅସଲି ନିର୍ବନ୍ଧ ହୋଇଛି, ସେମିତି ଅସଲି ମିଠାଇ ବି ଖାଇଦିଅ" ।
ତେବେ ଏଭଳି ଗୁଜବ କେଉଁଠି ଆସୁଛି ବୋଲି ସନି ଆଶ୍ଚର୍ଯ୍ୟ ପ୍ରକଟ କରିଛନ୍ତି । ତେବେ ସୂଚନା ଥାଉ କି ଅଭିନେତା ହର୍ଷବର୍ଦ୍ଧନ କପୁର ଏକ ଟକ୍ ଶୋ'ରେ ବିକି ଓ କ୍ୟାଟ୍ରିନା ରିଲେସନସିପରେ ଅଛନ୍ତି ବୋଲି କହିଥିଲେ । କେଉଁ ବଲିଉଡ ରିଲେସନସିପ ଗୁଜବକୁ ସେ ବିଶ୍ବାସ କରୁଛନ୍ତି ବୋଲି ପ୍ରଶ୍ନରେ ଏଭଳି ଉତ୍ତର ରଖିଥିଲେ ହର୍ଷ । ଏହାପରେ ଉଭୟଙ୍କ ସମ୍ପର୍କକୁ ନେଇ ଚର୍ଚ୍ଚା ଜୋର ଧରିଥିଲା । ଏହାରି ମଧ୍ୟରେ ଗତ କିଛି ଦିନ ତଳେ ସେମାନଙ୍କର ନିର୍ବନ୍ଧ ହୋଇଥିବା ସମ୍ପର୍କରେ ଗୁଜବ ଶୁଣିବାକୁ ମିଳିଥିଲା ।
କ୍ୟାଟ୍ରିନା ଅକ୍ଷୟ କୁମାରଙ୍କ 'ସୂର୍ଯ୍ୟବଂଶୀ' ଫିଲ୍ମରେ ନଜର ଆସିବାକୁ ଯାଉଛନ୍ତି । ଏହାସହିତ ହରର-କମେଡି ଫିଲ୍ମ 'ଫୋନ ଭୁତ୍'ରେ ମଧ୍ୟ ନଜର ଆସିବେ । ସେପଟେ ବିକି ଶଶାଙ୍କ ଖୈତାନଙ୍କ ଫିଲ୍ମ Mr Lele ସହିତ ସୁଜିତ ସରକାରଙ୍କ ସର୍ଦ୍ଦାର ଉଦ୍ଧମ ସିଂ ଓ ମେଘ୍ନା ଗୁଲଜାରଙ୍କ 'ସାମ ବାହାଦୂର'ରେ ନଜର ଆସିବାକୁ ଯାଉଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
