ହାଇଦ୍ରାବାଦ: ସିଦ୍ଧାର୍ଥ ଶୁକ୍ଲାଙ୍କୁ ହରାଇ ଆଜି ସର୍ବହରା ସେହନାଜ । ମୃତ୍ୟୁକୁ ୩୬ ଘଣ୍ଟାରୁ ଊର୍ଦ୍ଧ୍ବ ସମୟ ବିତିଯାଇଥିଲେ ମଧ୍ୟ ଏହି ସତକୁ ଗ୍ରହଣ କରିପାରିନାହାନ୍ତି ସେହନାଜ । ଏହି ସତ ଯେପରି ତାଙ୍କୁ ପୁରା ଭାଙ୍ଗି ଦେଇଛି । ସବୁବେଳେ ହସ ହସ ଥିବା ମୁହଁରୁ ଆଜି ଝରିପଡ଼ୁଛି ଅଶ୍ରୁଧାର । କେହି ହୁଏତ ସେହନାଜଙ୍କ ଏପରି ଅବସ୍ଥା ପୂର୍ବରୁ କେବେ ଦେଖିନଥିବେ । ଦିଲ ଖୋଲି ହସୁଥିବା ମୁହଁଟି ଆଜି ସମ୍ପୂର୍ଣ୍ଣ ମଉଳି ପଡ଼ିଛି । ଆଖି ଯେପରି ଖୋଜୁଛି କେବଳ ସିଦ୍ଧାର୍ଥଙ୍କୁ । ସେହନାଜଙ୍କ ମୁହଁରୁ ବାରି ହୋଇପଡ଼ୁଛି କେତେ ଦୁଃଖରେ ଅଛନ୍ତି ସେ । ସେହନାଜଙ୍କୁ ଦେଖିଲେ ତାଙ୍କ ଦୁନିଆ ଯେପରି ଶେଷ ହୋଇଯାଇଥିବା ମନେ ହେଉଛି । ଉଭୟଙ୍କ ମଧ୍ୟରେ ପ୍ରେମ ସମ୍ପର୍କ ଥିଲା ବୋଲି ବିଗ ବସ ଶୋ'ରୁ ଚର୍ଚ୍ଚା ହେଉଥିଲା । ଏହା କେତେ ଦୂରୁ ସତ, ତାହା ଜଣାନଥିଲେ ମଧ୍ୟ ଉଭୟ ପରସ୍ପରକୁ ଖୁବ ପସନ୍ଦ କରୁଥିଲେ । ସିଡ଼ନାଜଙ୍କ ମଧ୍ୟରେ ଥିଲା ପକ୍କା ଦୋସ୍ତି ।
BIGG BOSSରେ #Sidnaazଙ୍କ ହୋଇଥିଲା ଭେଟ:-
ବିଗ ବସ ସିଜନ-୧୩ରେ ସିଦ୍ଧାର୍ଥ ସେହନାଜଙ୍କୁ ଭେଟିଥିଲେ । ଉଭୟ ଡେଟ କରୁଥିଲେ ବୋଲି ମଧ୍ୟ ଚର୍ଚ୍ଚା ଜୋର ଧରିଥିଲା । କିନ୍ତୁ ସେମାନେ ଉଭୟଙ୍କ ସମ୍ପର୍କକୁ ସ୍ପଷ୍ଟ କରିନଥିଲେ । ବିଗ ବସରେ ଉଭୟଙ୍କ କେମେଷ୍ଟ୍ରି ଦର୍ଶକଙ୍କୁ ଖୁବ ପସନ୍ଦ ଥିଲା । ଏହାପରେ ପ୍ରଶଂସକ ସେମାନଙ୍କୁ #Sidnaaz ବୋଲି ସମ୍ବୋଧନ କରିବା ଆରମ୍ଭ କରିଦେଇଥିଲେ । ସେହନାଜ ଟ୍ରୋଲ ହେଲେ ସିଦ୍ଧାର୍ଥ ସର୍ବଦା ଚୁଲବୁଲି ସେହନାଜଙ୍କୁ ସମର୍ଥନ କରୁଥିଲେ । ବିଗବସ ହାଉସ ମଧ୍ୟରେ ଉଭୟ ପରସ୍ପର ସହିତ ଅଧିକ ସମୟ ବିତାଉଥିବା ବେଳେ ପରସ୍ପରକୁ ଖୁବ ସମର୍ଥନ କରୁଥିଲେ ।
BIGG BOSSର ଥିଲେ ରାଜାରାଣୀ:-
ବିଗବସ ଦୁନିଆର ରାଜାରାଣୀ ଥିଲେ ସିଡନାଜ । ସିଦ୍ଧାର୍ଥ ସର୍ବଦା ନିଜ ବ୍ୟକ୍ତିତ୍ବ ସହ ରହୁଥିବା ବେଳେ ସେହନାଜ ମସ୍ତି କରୁଥିଲେ । ଉଭୟଙ୍କ ଏହି 'ଅଦ୍ଦା'କୁ ଖୁବ ପସନ୍ଦ କରୁଥିଲେ ଦର୍ଶକ । ସିଦ୍ଧାର୍ଥ କେତେବେଳେ ସେହନାଜଙ୍କୁ ମୋଟି କହୁଥିଲେ ତ କେତେବେଳେ ତାଙ୍କ କେଶ ଟାଣି ତାଙ୍କୁ ଚିଡାଉଥିଲେ । ସେପଟେ ସେହନାଜ ବି ସିଦ୍ଧାର୍ଥଙ୍କ କ୍ରୋଧ ସମ୍ପର୍କରେ ଜାଣିଥିଲେ ମଧ୍ୟ ତାଙ୍କୁ ଚିଡାଉଥିବା ଦେଖିବାକୁ ମିଳୁଥିଲା । ଉଭୟଙ୍କ ଏହି ନଟଖଟ ଅନ୍ଦାଜ ଦର୍ଶକଙ୍କୁ ଖୁବ ପସନ୍ଦ ଆସିଥିଲା । ଫଳରେ ଏହି ୨ ବ୍ୟକ୍ତିତ୍ବ ହୋଇଯାଇଥିଲେ ଏକ । ବିଗବସ ଶୋ' ଶେଷ ହେବା ପୂର୍ବରୁ ଉଭୟ ସିଦ୍ଧାର୍ଥ ଓ ସେହନାଜରୁ ହୋଇଯାଇଥିଲେ #SIDNAAZ ।
ଉଭୟଙ୍କ ମଧ୍ୟରେ 'ଦୋସ୍ତି ନା ପ୍ୟାର'ର ସମ୍ପର୍କ ଥିଲା ?
ଏହି ପ୍ରଶ୍ନ ଉତ୍ତର କେବେ ଦୁହେଁ ଦେଇନାହାନ୍ତି । ସେହନାଜ ଏହି ସମ୍ପର୍କ ସମ୍ବନ୍ଧରେ କିଛି କହିଲେ ସିଦ୍ଧାର୍ଥ ଲାଜ କରୁଥିବା ମଧ୍ୟ ଦେଖିବାକୁ ମିଳେ । ଉଭୟଙ୍କ ଫ୍ୟାନ୍ସମାନେ 'କୁଛ କୁଛ ହୋତା ହେ'ର ରାହୁଲ ଓ ଅଞ୍ଜଲୀ ସହିତ ତୁଳନା କରନ୍ତି । ଉଭୟ ଲଢୁଥିଲେ ମଧ୍ୟ ପରସ୍ପରକୁ ଖୁବ ଭଲ ପାଉଥିବା ଦେଖିବାକୁ ମିଳେ । ବିଗବସରେ ସିଦ୍ଧାର୍ଥ ଓ ସେହନାଜଙ୍କ ଏହି ପ୍ୟାର ଓ ଦୋସ୍ତିର ସମ୍ପର୍କକୁ ଦର୍ଶକ ଖୁବ ପସନ୍ଦ କରିଥାନ୍ତି ।
ବିଗବସ ଶେଷ ହେବା ପରେ ମଧ୍ୟ ଭଲ ବନ୍ଧୁ ଥିଲେ ସିଡନାଜ:-
୨୦୧୯ ମସିହା ସେପ୍ଟେମ୍ବର ୨୯ ତାରିଖରେ ବିଗବସ-୧୩ ଆରମ୍ଭ ହୋଇଥିଲା । ସେତେବେଳେ ପରସ୍ପର ଉଭୟଠାରୁ ସମ୍ପୂର୍ଣ୍ଣ ଅଲଗା ଥିଲେ । ମାତ୍ର ଶୋ' ଶେଷ ହେବା ପରେ ଉଭୟଙ୍କ ମଧ୍ୟରେ ଭଲ ସମ୍ପର୍କ ଥିଲା । ଶୋ'ରୁ ବାହାରିବା ପରେ ଉଭୟଙ୍କ ସମ୍ପର୍କ ପୂର୍ବ ପରି ରହିଥିଲା । ଉଭୟ ଅନେକ ସ୍ଥାନରେ ଏକାଠି ନଜର ଆସୁଥିଲେ । ଫ୍ୟାନ୍ସ ମଧ୍ୟ ତାଙ୍କୁ ଦେଖି ଖୁସି ହେଉଥିଲେ । ୨ ବର୍ଷ ପୂର୍ବରୁ ଏହି ସେପ୍ଟେମ୍ବର ମାସରେ ଉଭୟଙ୍କ ଭେଟ ହୋଇଥିଲା, ଆଉ ଏହି ମାସରେ ହିଁ ଦୁହେଁ ପରସ୍ପରଠାରୁ ଅଲଗା ହୋଇଗଲେ ।
ଉଭୟ ପ୍ରଂଶସକଙ୍କୁ ଦେଇଛନ୍ତି ହିଟ ଗୀତ:-
ବିଗବସ ପରେ ସିଡନାଜଙ୍କୁ ଦେଖିବା ପାଇଁ ଫ୍ୟାନ୍ସ ଚାତକ ଭଳି ଚାହିଁ ରହିଥିଲେ । ଏହାପରେ ସିଡନାଜଙ୍କ ପ୍ୟାରର ଝଲକ ଆଲବମ ସଙ୍ଗରେ ଦେଖିବାକୁ ମିଳିଥିଲା । ଉଭୟ 'ଭୁଲା ଦୁଙ୍ଗା' ଓ 'ଶୋନା ଶୋନା' ନଜର ଆସିଥିଲେ । ଏହି ୨ଟି ଗୀତ ମଧ୍ୟ ବହୁତ ହିଟ ହୋଇଥିଲା । ହ୍ୟାଣ୍ଡସମ ହଙ୍କ ସିଦ୍ଧାର୍ଥ ଓ ଚୁଲବୁଲି ସେହନାଜଙ୍କ ଜଲୱା ଗୀତରେ ଦେଖିବାକୁ ମିଳିଥିଲା ।
ଅଲଗା ହୋଇଗଲେ ୨ ଷ୍ଟାର:-
ଗତ ୨ ବର୍ଷ ପୂର୍ବେ ସେପ୍ଟେମ୍ବର ମାସରେ ଭେଟ ହେବା ପରେ ଆଜି ଏହି ମାସରେ ଦୁଇ ଷ୍ଟାରଙ୍କୁ ଅଲଗା କରିଦେଲେ ଭଗବାନ । ଆଜି କେଉଁ ଅଫେରା ରାଇଜକୁ ଚାଲିଯାଇଛନ୍ତି ସିଦ୍ଧାର୍ଥ, ଆଉ ବଞ୍ଚି ଥାଇ ମଧ୍ୟ ଗୁମସୁମ ହୋଇଯାଇଛନ୍ତି ସେହି ମସ୍ତିଖୋର ସେହନାଜ । ଏଠାରେ ଯଦି କଥା କହୁଛି କେବଳ ସେହନାଜଙ୍କ ଆଖିର ଲୁହ । ଅଲଗା ହୋଇଯାଇଛନ୍ତି ଏହି ୨ ତାରା । ଦୋସ୍ତିରୁ ପ୍ରେମରେ ବଦଳିଥିବା ଏହି ସମ୍ପର୍କରେ ଆଜି ପଡିଯାଇଛି ଫୁଲଷ୍ଟପ ।
ବ୍ୟୁରୋ ରିପୋର୍ଟ, ଇଟିଭି ଭାରତ
