ମୁମ୍ବାଇ: ସୁପରଷ୍ଟାର ହ୍ରିତିକ ରୋଶନ ଓ ପ୍ରୀତି ଜିଣ୍ଟାଙ୍କ ଅଭିନୀତ ଫିଲ୍ମ ‘ମିଶନ କଶ୍ମୀର’ ରିଲିଜକୁ ରବିବାର 19 ବର୍ଷ ପୂରଣ ହୋଇଛି । ଦୀପାବଳି ଅବସରରେ ପ୍ରୀତି ଡବଲ ସେଲିବ୍ରେଶନ କରିଥିଲେ । ସେ ସୋସିଆଲ ମିଡିଆରେ ନିଜ ଫିଲ୍ମର ‘ବୁମରୋ ବୁମରୋ’ ଗୀତ ସେୟାର କରି 19 ବର୍ଷ ପୂରଣ ଅବସରରେ ସେଲିବ୍ରେଟ କରିଛନ୍ତି ।
‘ଭୀର-ଜାରା’ ଅଭିନେତ୍ରୀ ପ୍ରୀତି ନିଜ ଟ୍ବିଟରରେ ଗୀତର ଭିଡିଓ ସେୟାର କରି କ୍ୟାପସନରେ ଲେଖିଛନ୍ତି, ‘ମିଶନ କଶ୍ମୀର କେବଳ ଫିଲ୍ମ ନଥିଲା, ତାଙ୍କ ପାଇଁ ଶାନଦାର ଅନୁଭୂତି ମଧ୍ୟ ଥିଲା । ଧନ୍ୟବାଦ ବିଧୁ ବିନୋଦ ଚୋପ୍ରା ତୁମେ ମତେ ଏହି ଫିଲ୍ମରେ ସାମିଲ କରାଇବା ସହ ଅନେକ ଅନୁଭୂତି ଦେଇଥିଲ । ବୁମରୋ ସବୁବେଳେ ମୋ ପାଇଁ ସ୍ପେଶାଲ ।’
ପ୍ରକାଶ ଥାଉକି ‘ମିଶନ କଶ୍ମୀର’ରେ ହ୍ରିତିକ ଅଭିନେତା ସଞ୍ଜୟ ଦତ୍ତଙ୍କ ପୋଷ୍ୟପୁତ୍ର ରୂପେ ଅଭିନୟ କରୁଥିବେ । ଯାହାଙ୍କ ପରିବାରକୁ ଆତଙ୍କବାଦୀ ଭାବି ପୋଲିସ ଦ୍ବାରା ହତ୍ୟା କରାଯାଇଥିବ । ଏହାର ପ୍ରତିଶୋଧ ନେବାକୁ ହ୍ରିତିକ ଆତଙ୍କବାଦୀ ହୋଇ ସଞ୍ଜୟଙ୍କ ସହ ମୁହାଁମୁହିଁ ହୋଇଥିବେ ।
ପ୍ରକାଶ ଥାଉକି 2000ରେ ରିଲିଜ ହୋଇଥିବା ଏହି ଫିଲ୍ମ ସେହି ବର୍ଷର ତୃତୀୟ ଅଧିକ ଆୟ କରିଥିବା ଫିଲ୍ମ ସାଜିଥିଲା । ଫିଲ୍ମରେ ଜ୍ୟାକି ଶ୍ରଫ ଓ ସୋନାଲୀ କୁଲକର୍ଣ୍ଣୀ ମଧ୍ୟ ମୁଖ୍ୟ ଭୂମିକାରେ ନଜର ଆସିଥିଲେ ।
