ମୁମ୍ବାଇ: ଆର୍ଯ୍ୟନଙ୍କୁ ଡ୍ରଗ୍ସ ମାମଲାରେ ଗତକାଲି ଜାମିନ ପ୍ରଦାନ କରିଛନ୍ତି ବମ୍ବେ ହାଇକୋର୍ଟ । ଏନେଇ ପିତା ଶାହରୁଖ ଖାନ ବେଶ ଖୁସି ଥିବା ବେଳେ ବଲିଉଡର ଅନେକ କଳାକାର ମାନେ ମଧ୍ୟ ଖୁସି ବ୍ୟକ୍ତ କରିଛନ୍ତି । ଏଥିସହ ଆର୍ଯ୍ୟନଙ୍କ ଭଉଣୀ ସୁହାନା ମଧ୍ୟ ବେଶ ଖୁସି ଅଛନ୍ତି । ଆର୍ଯ୍ୟନଙ୍କୁ ଜାମିନ ମିଳିବା ପରେ ସୁହାନା ନିଜ ଇଷ୍ଟାଗ୍ରାମରେ ପିଲା ଦିନର ଏକ ପୁରୁଣା ଫଟୋକୁ କୋଲାଜ କରି ସେୟାର କରିଛନ୍ତି । ଯେଉଁଥିରେ କି ପିତା ଶାହରୁଖ ଭାଇ ଆର୍ଯ୍ୟନ ଓ ସୁହାନାଙ୍କ ସହ ମସ୍ତି କରୁଥିବା ଦେଖିବାକୁ ମିଳିଛି । ଏହି ଫଟୋରେ ସୁହାନା କ୍ୟାପସନରେ ଲେଖିଛନ୍ତି 'ଆଇ ଲଭ୍ ୟୁ' ।
ତେବେ ସୁହାନା ସୋସିଆଲ ମିଡିଆରେ ବେଶ ଆକ୍ଟିଭ ରୁହନ୍ତି । କିନ୍ତୁ ଭାଇ ଆର୍ଯ୍ୟନ ଖାନଙ୍କ ଗିରଫ ପରେ ସେ ସୋସିଆଲ ମିଡିଆରୁ ଦୂରେଇ ଯାଇଥିଲେ । ମାତ୍ର ଅକ୍ଟୋବର ୮ରେ ମା ଗୌରୀ ଖାନଙ୍କ ଜନ୍ମଦିନରେ ସୋସିଆଲ ମିଡିଆରେ ଶୁଭେଚ୍ଛା ଜଣାଇଥିଲେ ।
କ୍ରୁଜ ଡ୍ରଗ୍ସ ପାର୍ଟି ମାମଲାରେ ଅକ୍ଟୋବର ୩ରେ ଆର୍ଯ୍ୟନ ଖାନଙ୍କୁ ଗିରଫ କରାଯାଇଥିବାବେଳେ ପ୍ରଥମ ବେଲ ନାମଞ୍ଜୁର ଓ ରିମାଣ୍ଡ ଅବଧି ଶେଷ ହେବା ପରେ ଅକ୍ଟୋବର ୮ରୁ ମୁମ୍ବାଇର ଆର୍ଥରରୋଡ ଜେଲରେ ରହିଥିଲେ ଆର୍ଯ୍ୟନ । ତେବେ ପୂର୍ବରୁ ୨ଥର ତାଙ୍କ ବେଲ ମୁମ୍ବାଇ ସେସନ କୋର୍ଟରେ ଆବେଦନ ଖାରଜ ହେବା ପରେ ମୁମ୍ବାଇ ହାଇକୋର୍ଟରେ ଚ୍ୟାଲେଞ୍ଜ ହୋଇଥିଲା ।
ହାଇକୋର୍ଟରେ ୨ଥର ଜାମିନ ଶୁଣାଣି ସ୍ଥଗିତ ରହିଥିବାବେଳେ ଶେଷରେ ଗତକାଲି ଆର୍ଯ୍ୟନଙ୍କୁ ସର୍ତ୍ତମୂଳକ ଜାମିନ ଦେଇଥିଲେ ବମ୍ବେ ହାଇକୋର୍ଟ ।
