ମୁମ୍ବାଇ: ଧର୍ମଶାଳାରେ ବି-ଟାଉନର ଛୋଟେ ନୱାବ ସୈଫ ଅଲ୍ଲୀ ଖାନ ନିଜର ଆଗାମୀ ଫିଲ୍ମ ‘ଭୂତ ପୋଲିସ’ର ସୁଟିଂ କରୁଛନ୍ତି । ତାଙ୍କ ସହ ଫିଲ୍ମରେ ଦେଖାଯିବେ ଜ୍ୟାକଲିନ ଫର୍ଣ୍ଣାଡେଜ, ଅର୍ଜୁନ କପୁର, ୟାମୀ ଗୌତମ । ପୁରା ପରିବାର ସହ ଧର୍ମଶାଳାରେ ଅଛନ୍ତି ସୈଫ । ଆଉ କାମରୁ ଫୁରସତ ପାଇବା ମାତ୍ରେ ସେ ପରିବାର ସହ ଏନଜୟ କରିବାକୁ ବାହାରି ପଡୁଛନ୍ତି । ତାଙ୍କ ଏହି ଟ୍ରିପର ଅନେକ ଫଟୋ, ଭିଡିଓ ସୋସିଆଲ ମିଡିଆରେ ଭାଇରାଲ ହୋଇସାରିଲାଣି । ଇତିମଧ୍ୟରେ ସେ ଦୁଇ ପୁଅଙ୍କ ବିଷୟରେ ଆଲୋଚନା କରି ଚର୍ଚ୍ଚାରେ । ସେ ପୁଅଙ୍କ କ୍ୟାରିୟର ବିଷୟରେ ସମସ୍ତଙ୍କୁ ଜଣାଇଛନ୍ତି ।
ତେବେ କଥାଟି ହେଲା ଯେ ଜ୍ୟାକଲିନ ଏବଂ ଅମାଣ୍ଡା କର୍ନିଙ୍କ ପୋଡକାଷ୍ଟରେ ନଜର ଆସିଥିଲେ ସୈଫ ଆଉ କହିଥିଲେ, ‘ମୋ ବଡ ପୁଅ ସହ ସାନ ପୁଅ ମଧ୍ୟ ଅଭିନେତା ହେବାକୁ ଚାହୁଁଛନ୍ତି । ତୈମୁର କିନ୍ତୁ ଏବେଠୁ ଅଭିନେତା ହୋଇସାରିଲେଣି । କାରଣ ସେ ସମସ୍ତଙ୍କୁ ପିଲାବେଳୁ ମନୋରଞ୍ଜନ କରିଆସୁଛନ୍ତି ।’
ସେହିପରି ନିକଟରେ ଦେଇଥିବା ଏକ ସାକ୍ଷାତକାରରେ କହିଥିଲେ ତାଙ୍କ ବଡ ପୁଅ ଇବ୍ରାହମ ଅଭିନୟ ଦୁନିଆରେ ପଦାର୍ପଣ କରିବାକୁ ପ୍ରସ୍ତୁତି ଅଛନ୍ତି । ସେ ମଧ୍ୟ ଅନ୍ୟ ଷ୍ଟାର କିଡ୍ସଙ୍କ ପରି ବଲିଉଡରେ ନିଜ କ୍ୟାରିୟର କରିବାକୁ ସ୍ଥିର କରିଛନ୍ତି । ଏହାବ୍ୟତୀତ ସୈଫ ଚତୁର୍ଥଥର ବାପା ହେବାକୁ ନେଇ ମଧ୍ୟ ଚର୍ଚ୍ଚାରେ ଅଛନ୍ତି । ନିକଟରେ କରୀନା ଦ୍ବିତୀୟଥର ମା' ହେବାକୁ ସୂଚନା ଦେଇଥିଲେ ।
