ମୁମ୍ବାଇ: ଫେମସ ବେଲି ଡାନ୍ସର ନୋରା ଫତେହୀ ବହୁତ କମ ଦିନରେ ବଲିଉଡରେ ଛାଇ ଗଲେଣି । ଗତ କିଛି ବର୍ଷ ମଧ୍ୟରେ ଆସିଥିବା ଆଇଟମ ନମ୍ବର୍ସରେ ସେ ଜବରଦସ୍ତ ଡାନ୍ସ କରି ଦର୍ଶକଙ୍କ ମନ କିଣିବାରେ ସଫଳ ହୋଇଛନ୍ତି । ଏବେ ତାଙ୍କୁ ବରୁଣ ଧୱନ ଓ ଶ୍ରଦ୍ଧା କପୁରଙ୍କ ଅଭିନୀତ ଫିଲ୍ମ ‘ଷ୍ଟ୍ରିଟ ଡାନ୍ସ 3ଡି’ରେ ଅଭିନୟ କରୁଥବାର ଦେଖିବାକୁ ମିଳିବ । ଇତିମଧ୍ୟରେ ତାଙ୍କ ଫ୍ୟାନ୍ସଙ୍କ ପାଇଁ ଏକ ଗୁଡନ୍ୟୁଜ ସାମ୍ନାକୁ ଆସିଛି । ଯାହା ଶୁଣି ସମସ୍ତେ ଖୁସି ହେବା ସହ ଆଶ୍ଚର୍ଯ୍ୟ ମଧ୍ୟ ହୋଇଯିବେ ।
କାରଣ ସେ ବି-ଟାଉନର ଚୁଲବୁଲି ଅଭିନେତ୍ରୀ ପରିଣୀତି ଚୋପ୍ରାଙ୍କୁ ଏକ ଫିଲ୍ମରୁ ରିପ୍ଲେସ କରିଦେଇଛନ୍ତି । ଆଜ୍ଞା ହଁ, ବର୍ତ୍ତମାନ ସେ ସିଂଘମ ଅଜୟ ଦେବଗନଙ୍କ ଆଗାମୀ ଫିଲ୍ମ ‘ଭୁଜ: ଦ ପ୍ରାଇଡ ଅଫ ଇଣ୍ଡିଆ’ରେ ସାମିଲ ହୋଇଛନ୍ତି।
ଅଭିଷେକ ଦୁଧେୟାଙ୍କ ନିର୍ଦ୍ଦେଶନାରେ ନିର୍ମାଣ ହେଉଥିବା ଫିଲ୍ମ ‘ଭୁଜ: ଦ ପ୍ରାଇଡ ଅଫ ଇଣ୍ଡିଆ’ରେ ପରିଣୀତିଙ୍କୁ ହଟାଇ ନୋରାଙ୍କୁ ନିଆଯାଇଛି । ଫିଲ୍ମରେ ପରିଣୀତି ଜଣେ ସ୍ପାଇ ଭୂମିକାରେ ନଜର ଆସିଥାନ୍ତେ । ହେଲେ ବ୍ୟସ୍ତ ସିଡ୍ୟୁଲ ପାଇଁ ସେ ଫିଲ୍ମରେ କାମ କରିବାକୁ ମନା କରିବା ପରେ ନୋରାଙ୍କୁ ସାଇନ କରାଇନେଇଛନ୍ତି ମେକର୍ସ ।
ପ୍ରକାଶ ଥାଉକି ଏହି ଫିଲ୍ମର ସୁଟିଂ ଆସନ୍ତା 12 ତାରିଖରେ ଆରମ୍ଭ ହେବାକୁ ଯାଉଛି । ଏହି ସୁଟିଂ ସିଡ୍ୟୁଲ 15 ଦିନର ରଖାଯାଇଛି । ଅଜୟଙ୍କ ଆଗାମୀ ଫିଲ୍ମ ‘ଭୁଜ: ଦ ପ୍ରାଇଡ ଅଫ ଇଣ୍ଡିଆ’ ଏକ ୱାର ଡ୍ରାମା ଫିଲ୍ମ । 1971ର ଇଣ୍ଡୋ-ପାକ ୱାର ବ୍ୟାକଡ୍ରପକୁ ନେଇ ଆଧାରିତ ଏହି ଫିଲ୍ମ । ଫିଲ୍ମରେ ଅଜୟ ସ୍କ୍ବାଡର୍ନ ଲିଡର ଭୂମିକାରେ ନଜର ଆସିବେ ।
ଅଜୟଙ୍କ ବ୍ୟତୀତ ଫିଲ୍ମରେ ସୋନାକ୍ଷୀ ସିହ୍ନା ଜଣେ ସୋସିଆଲ ୱାର୍କର, ସଞ୍ଜୟ ଦତ୍ତ ଜଣେ ସ୍ଥାନୀୟ ବ୍ୟକ୍ତି, ରାଣା ଦଗ୍ଗୁବତୀ ଲେଫ୍ଟନାଣ୍ଟ କର୍ଣ୍ଣେଲ ଓ ଏମି ୱିର୍କ ଜଣେ ପାଏଲଟ ଭୂମିକାରେ ଅଭିନୟ କରୁଥିବାର ଦେଖାଯିବେ ।
