ମୁମ୍ବାଇ:ସୁଶାନ୍ତଙ୍କ ମୃତ୍ୟୁ ପରେ ବଲିଉଡ ଏବଂ ଟିଭି ଇଣ୍ଡଷ୍ଟ୍ରିର ଅନେକ ସେଲିବ୍ରିଟିମାନେ ସେମାନଙ୍କ ସମସ୍ୟାକୁ ଖୋଲାଖୋଲି ଭାବେ କହିବା ଆରମ୍ଭ କରିଛନ୍ତି । ଡିପ୍ରେସନରୁ ଆତ୍ମହତ୍ୟା ପର୍ଯ୍ୟନ୍ତ ଆସିଥିବା ସମସ୍ତ ଚିନ୍ତାଧାରାକୁ ସେଲିବ୍ରିଟିମାନେ କହୁଛନ୍ତି ।
ନିକଟରେ ଜାତୀୟ ପୁରସ୍କାର ବିଜେତା ଅଭିନେତା ମନୋଜ ବାଜପେୟୀ ଏକ ଆଶ୍ଚର୍ଯ୍ୟଜନକ ଖୁଲାସା କରିଛନ୍ତି । ସଂଘର୍ଷର ପ୍ରଥମ ଦିନରେ ସେ କିପରି ନିଜକୁ ହରାଉଥିଲେ ଏବଂ ସେ ନିଜକୁ ଶେଷ କରିବାକୁ ଚିନ୍ତା କରୁଥିଲେ, କିନ୍ତୁ ତାଙ୍କ ବନ୍ଧୁମାନେ ତାଙ୍କ ଜୀବନ ରକ୍ଷା କରିଥିଲେ ।
ମନୋଜ କହିଛନ୍ତି, ମୁଁ ଜଣେ କୃଷକର ପୁଅ, ମୋର ପାଞ୍ଚ ଭାଇଭଉଣୀଙ୍କ ସହ ବିହାର ଗାଁରେ ରହୁଥିଲି । ମୁଁ ଅମିତାଭ ବଚ୍ଚନଙ୍କର ଜଣେ ପ୍ରଶଂସକ ଏବଂ ମୁଁ ତାଙ୍କ ପରି ହେବାକୁ ଚାହୁଁଥିଲି । 17 ବର୍ଷ ବୟସରେ ମୁଁ ଥିଏଟର କରିବା ଆରମ୍ଭ କଲି କିନ୍ତୁ ପରିବାର ଲୋକଙ୍କୁ ଏହି ବିଷୟରେ କୌଣସି ଧାରଣା ନଥିଲା ।
ମନୋଜ ଆହୁରି କହିଛନ୍ତି, ମୁଁ ଗାଁରୁ ଯାଇ ବାହାର ସହରରେ ଆଡଜଷ୍ଟ କରିବାକୁ ଚେଷ୍ଟା କରୁଥିଲି । ମୁଁ ଇଂରାଜୀ ଶିଖିଲି । ତାପରେ ମୁଁ ଏନ.ଏସ.ଡିରେ ଆପ୍ଲାଏ କଲି କିନ୍ତୁ ତିନିଥର ରିଜେକ୍ଟ ହେଲି । ଏହାକୁ ସହିନ ପାରି ମୁଁ ଆତ୍ମହତ୍ୟା କରିବାକୁ ଭାବୁଥିଲି, କିନ୍ତୁ ମୋ ବନ୍ଧୁମାନେ ମୋ ଜୀବନ ରକ୍ଷା କରିଥିଲେ । ସେହିବର୍ଷ ମୁଁ ଏକ ଚା’ ଦୋକାନରେ ଠିଆ ହେଇଥିଲି, ସେତେବେଳେ ମୋ ସାଙ୍ଗ ପାଖକୁ ଆସି ଏକ ବହୁତ ଭଲ ଖବର ମତେ କହିଥିଲା । ସେ କହିଲା, ଶେଖର କପୁର ମୋତେ ବନ୍ଦିତ କୁଇନରେ କାଷ୍ଟ କରିବାକୁ ଚାହୁଁଛନ୍ତି । ତା’ପରେ ମୁଁ ଅନୁଭବ କଲି ଯେ ମୁଁ ମୁମ୍ବାଇ ଯିବାକୁ ପ୍ରସ୍ତୁତ ଅଛି ।
ପ୍ରଥମ ସଟରେ ମୁଁ - ଗେଟ ଆଉଟ ଶୁଣିଥିଲି । ଆରମ୍ଭରେ ସବୁକିଛି ବହୁତ କଷ୍ଟସାଧ୍ୟ ଥିଲା । ଚାରି ବର୍ଷ ସଂଘର୍ଷ କରିଥିଲି । ମୋର ଚେହେରା ହିରୋ ପାଇଁ ଫିଟ୍ ନଥିଲା । ସେତେବେଳେ ଲୋକମାନେ ଭାବିଲେ ଯେ ମୁଁ ବଡ଼ ପରଦାରେ ସ୍ଥାନ ପାଇବି ନାହିଁ । ଚାରି ବର୍ଷର ସଂଘର୍ଷ ପରେ ମୁଁ ମହେଶ ଭଟ୍ଟଙ୍କ ଟିଭି ଧାରାବାହିକରେ ଏକ ଭୂମିକାରେ କାମ କଲି । ମୁଁ ଏକ ଏପିସୋଡ୍ ପାଇଁ 1500 ଟଙ୍କା ପାଉଥାଏ । ଏହା ପରେ ମୁଁ ମୋର ପ୍ରଥମ ବଲିଉଡ ଚଳଚ୍ଚିତ୍ର ପାଇଲି । ଏହାପରେ ମୁଁ ମୋର ପ୍ରଥମ ଘର କିଣିଥିଲି । ବର୍ତ୍ତମାନ 67 ଟି ଚଳଚ୍ଚିତ୍ର ପରେ, ମୁଁ ଆଜି ଏଠାରେ ଅଛି ।
ପ୍ରକାଶ ଥାଉ କି,ମନୋଜ ବାଜପେୟୀ ସତ୍ୟା, ଅଲିଗଡ, ରାଜନୀତି, ସତ୍ୟାଗ୍ରହ, ଗ୍ୟାଙ୍ଗସ୍ ଅଫ୍ ୱାସିପୁର ସମେତ ବଲିଉଡରେ ଅନେକ ଚଳଚ୍ଚିତ୍ରରେ କାମ କରିଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
