ମୁମ୍ବାଇ: ହ୍ୟାଣ୍ଡସମ ଅଭିନେତା ଜନ ଅବ୍ରାହମଙ୍କ ବହୁ ଚର୍ଚ୍ଚିତ ଫିଲ୍ମ ‘ବାଟଲା ହାଉସ’ ଶୁକ୍ରବାର ରିଲିଜ ହୋଇଯାଇଛି । ଆଉ ବର୍ତ୍ତମାନ ଭଲ କଲେକ୍ସନ କରିବାରେ ଲାଗିପଡିଛି । ଜନଙ୍କ ଏହି ଫିଲ୍ମର ଯାଦୁ ଏବେ ଦର୍ଶକଙ୍କ ଉପରେ ଥମିନାହିଁ, ଇତିମଧ୍ୟରେ ତାଙ୍କର ଆଉ ଏକ ଫିଲ୍ମର ପ୍ରଥମ ପୋଷ୍ଟର ରିଲିଜ ହୋଇଯାଇଛି ।
ଆଜ୍ଞା ହଁ, ଜନଙ୍କ ଆଗାମୀ ଫିଲ୍ମ ‘ମୁମ୍ବାଇ ସାଗା’ର ସୁଟିଂ ଜୋରସୋରରେ ଚାଲିଛି । ଫିଲ୍ମର ପୋଷ୍ଟର ଜାରି ହେବା ଖୁସିରେ ଜନ ଇନଷ୍ଟାଗ୍ରାମରେ ଫ୍ୟାନ୍ସଙ୍କ ପାଇଁ ପୋଷ୍ଟରକୁ ସେୟାର କରିଛନ୍ତି । ପୋଷ୍ଟର ଆସିବାର ମାତ୍ର 2 ଘଣ୍ଟା ମଧ୍ୟରେ ପାଖାପାଖି 2 ଲକ୍ଷରୁ ଅଧିକା ଲାଇକ୍ସ ମିଳିସାରିଲାଣି ।
‘ମୁମ୍ବାଇ ସାଗା’ର ପୋଷ୍ଟରରେ ଫ୍ୟାକ୍ଟ୍ରିଜର ଛାତ ଦେଖିବାକୁ ମିଳୁଛି । ପୋଷ୍ଟରକୁ ଏପରି ଡିଜାଇନ କରାଯାଇଛି ଯେ ବନ୍ଧୁକ ଧୂଆଁ ଫ୍ୟାକ୍ଟ୍ରି ଧୂଆଁ ସହ ମିଶି ଏକାପରି ଦେଖାଯାଉଛି । ପୋଷ୍ଟରଟିକୁ ସେୟାର କରି ଜନ କ୍ୟାପସନରେ ଲେଖିଛନ୍ତି, ‘ମୁମ୍ବାଇ ସାଗା 2020’ ।
ଅନ୍ୟପଟେ ଫିଲ୍ମ ପୋଷ୍ଟରରେ ଷ୍ଟାର-କାଷ୍ଟଙ୍କ ନାମ ମଧ୍ୟ ଦେଖିବାକୁ ମିଳୁଛି । ‘ମୁମ୍ବାଇ ସାଗା’ରେ ଜନଙ୍କ ବ୍ୟତୀତ ଇମରାନ ହାସମୀ, ରୋହିତ ରାୟ, ସମୀର ସୋନୀ ଓ ଅମୋଲ ଗୁପ୍ତା ମୁଖ୍ୟ ଭୂମିକାରେ ନଜର ଆସିବେ । ପୋଷ୍ଟରରେ ପଞ୍ଚ ଲାଇନରେ ଲେଖାଯାଇଛି ‘ବମ୍ବେ ମୁମ୍ବାଇ ହେବା ପର୍ଯ୍ୟନ୍ତ ସକିଂ ଯାତ୍ରା’ ।
ମୁମ୍ବାଇ ସାଗାର ନିର୍ଦ୍ଦେଶନା ଦାୟିତ୍ବ ତୁଲାଉଛନ୍ତି ସଞ୍ଜୟ ଗୁପ୍ତା । ସଞ୍ଜୟ ଏହା ପୂର୍ବରୁ ସୁଟଆଉଟ ଆଟ ଲୋଖଣ୍ଡୱାଲା, କାବିଲ, କାଣ୍ଟେ ଭଳି ଫିଲ୍ମ ନିର୍ମାଣ କରିସାରିଛନ୍ତି ।
