ମୁମ୍ବାଇ: ଖିଲାଡି ଅକ୍ଷୟ କୁମାରଙ୍କ ବହୁପ୍ରତିକ୍ଷିତ ଫିଲ୍ମ ‘ଗୁଡନ୍ୟୁଜ’ ଶୁକ୍ରବାର ରିଲିଜ ହୋଇଯାଇଛି । ଫିଲ୍ମ ଦେଖିବାକୁ ଦୀର୍ଘ ସମୟରୁ ଅପେକ୍ଷା କରି ବସିଥିଲେ ଦର୍ଶକ । ଏବେ ତାଙ୍କ ଅପେକ୍ଷାର ଅନ୍ତ ଘଟିଛି । ‘ଗୁଡନ୍ୟୁଜ’ରେ ଅକ୍ଷୟଙ୍କ ବ୍ୟତୀତ କରୀନା କପୁର ଖାନ, ଦିଲଜିତ ଦୋସାଞ୍ଜ ଓ କିୟାରା ଆଡଭାନୀଙ୍କ ଦମଦାର କମେଡି ଅନ୍ଦାଜ ଦେଖିବାକୁ ମିଳିଛି । ରାଜ ମେହେଟ୍ଟାଙ୍କ ଦ୍ବାରା ନିର୍ଦ୍ଦେଶିତ ଏହି ଫିଲ୍ମ ଦର୍ଶକଙ୍କ ମନ କିଣିବାରେ ସଫଳ ହୋଇଛି । ଏକଥା ଆମେ କହୁନାହୁଁ ବରଂ ଫିଲ୍ମର ଫାଷ୍ଟଡେ ବକ୍ସ ଅଫିସ କଲେକ୍ସନରୁ ଏହା ଜଣାପଡିଛି । ଆଜ୍ଞା ହଁ, ରିଲିଜର ପ୍ରଥମ ଦିନରେ ଫିଲ୍ମର କଲେକ୍ସନ ଜବରଦସ୍ତ ହୋଇଛି ।
ଖାଲି ଏତିକି ନୁହେଁ ପ୍ରଥମ ଦିନରେ ଏହି ଫିଲ୍ମ ଦବଙ୍ଗ ବୟ ସଲମାନ ଖାନଙ୍କ ‘ଦବଙ୍ଗ 3’କୁ ମଧ୍ୟ ପଛରେ ପକାଇ ଦେଇଛି । ସଲମାନଙ୍କ ଫିଲ୍ମ ପ୍ରଥମ ସପ୍ତାହରେ ଯଦି ବକ୍ସ ଅଫିସରେ କଲେକ୍ସନ କରିବାରେ ଅସଫଳ ସାବ୍ୟସ୍ତ ହୋଇଛି, ତେବେ ଭାବନ୍ତୁ ‘ଗୁଡନ୍ୟୁଜ’ର କ୍ରେଜ ଦର୍ଶକଙ୍କ ମନରେ କିପରି ରହିଥିବ । ବକ୍ସ ଅଫିସ ଇଣ୍ଡିଆ ଅନୁଯାୟୀ ‘ଗୁଡନ୍ୟୁଜ’ ପ୍ରଥମଦିନରେ ପାଖାପାଖି 18 କୋଟି ଟଙ୍କା ଆୟ କରିବାରେ ସଫଳ ହୋଇଛି । ଏହି ଶୁକ୍ରବାର ବକ୍ସ ଅଫିସରେ ଚୁଲବୁଲ ପାଣ୍ଡେଙ୍କ ଜଲୱା ଚାଲିପାରିଲା ନାହିଁ । ରିଲିଜର 8 ଦିନରେ ‘ଦବଙ୍ଗ 3’ ମାତ୍ର 3 କୋଟି ଟଙ୍କା ଆୟ କରିଛି ।
ସେମିତି ଦେଖିବାକୁ ଗଲେ ରିଲିଜର 6 ଦିନରେ 100 କୋଟି କ୍ଲବରେ ସାମିଲ ହୋଇଥିବା ଦବଙ୍ଗ 3କୁ ବର୍ତ୍ତମାନ 150 କୋଟି ଆୟ କରିବାକୁ ହୁଏତ କଷ୍ଟ ହୋଇପାରେ । ଆଉ ଯଦି କଥା ହେବା ‘ଗୁଡନ୍ୟୁଜ’ ବିଷୟରେ ତେବେ ଆରମ୍ଭରୁ ନେଇ ଶେଷ ପର୍ଯ୍ୟନ୍ତ ଆପଣଙ୍କ ବୋର ହେବାକୁ ଦେବନାହିଁ । ‘କେସରୀ’ ଭଳି ଦମଦାର ଫିଲ୍ମ ଦେବା ପରେ ‘ହାଉସଫୁଲ 4’ରେ ଅକ୍ଷୟ ହୁଏତ ଦର୍ଶକଙ୍କୁ ନିରାଶ କରିଥିଲେ । କିନ୍ତୁ ଏବେ ସେ ‘ଗୁଡନ୍ୟୁଜ’ରେ ଶାନଦାର ଅଭିନୟ କରି ଦର୍ଶକଙ୍କ ମନ କିଣିଛନ୍ତି ।
