ମୁମ୍ବାଇ: ଏବେ ବଲିଉଡ ଗ୍ୟାଲେରିରେ କାର୍ତ୍ତିକ ଆର୍ୟନ ଓ କରନ ଜୋହରଙ୍କୁ ନେଇ ବେଶ୍ ଚର୍ଚ୍ଚା । ଶୁକ୍ରବାର ନିଜ ଆଗାମୀ ଫିଲ୍ମ ‘ଦୋସ୍ତାନା 2’ରୁ କାର୍ତ୍ତିକଙ୍କୁ ବାହାର କରି ସମାଲୋଚନାର ଶିକାର ହେଉଛନ୍ତି କରନ । ଅଭିନେତାଙ୍କ ଖରାପ ଆଚ୍ଚରଣରେ ବିରକ୍ତ ହୋଇ ନିର୍ମାତା ଫିଲ୍ମରୁ ତାଙ୍କୁ ରିପ୍ଲେସ କରିବାର ନିଷ୍ପତ୍ତି ନେଇଥିଲେ । ଯାହାକୁ ନେଇ ସୋସିଆଲ ମିଡିଆରେ ଏବେ ପରିବାରବାଦ ପ୍ରସଙ୍ଗ ପୁଣି ଉଠାଇଛନ୍ତି ଫ୍ୟାନ୍ସ । ଇତିମଧ୍ୟରେ ଶୁଣିବାକୁ ମିଳୁଛି ସୋସିଆଲ ମିଡିଆରେ ମଧ୍ୟ କାର୍ତ୍ତିକଙ୍କୁ ଅନଫଲୋ କରିଦେଇଛନ୍ତି କରନ ।
ଆଜ୍ଞା ହଁ, କରନ ଇନଷ୍ଟାଗ୍ରାମରେ କାର୍ତ୍ତିକଙ୍କୁ ଅନଫଲୋ କରିଛନ୍ତି । ଆଉ ଭବିଷ୍ୟତରେ ତାଙ୍କ ସହ କେବେ ମଧ୍ୟ କାମ ନକରିବାକୁ ନିଷ୍ପତ୍ତି ନେଇଛନ୍ତି । ସେପଟେ କାର୍ତ୍ତିକଙ୍କୁ ଫିଲ୍ମରୁ ବାହାର କରିବା ଘୋଷଣା କରି ଧର୍ମା ପ୍ରଡକ୍ସନ ନିଜ ଷ୍ଟେଟମେଣ୍ଟରେ ଲେଖିଥିଲା, ‘ବୃତ୍ତିଗତ କଥାବାର୍ତ୍ତା ଯାହା ହେଉ, ଆମେ ଏହା ଉପରେ ନୀରବ ରହିବାକୁ ନିଷ୍ପତ୍ତି ନେଇଛୁ, ଆମେ ପୁଣିଥରେ ଦୋସ୍ତାନା 2 ପାଇଁ କାଷ୍ଟିଂ କରିବୁ, ଯାହା ଖୁବ ଶୀଘ୍ର ଆନୁଷ୍ଠାନିକ ଭାବେ ଘୋଷଣା ହେବ ।’
ସେପଟେ କାର୍ତ୍ତିକଙ୍କୁ ଫିଲ୍ମରୁ ଆଉଟ୍ କରିବାକୁ ନେଇ କରନଙ୍କୁ ଟାର୍ଗେଟ କରୁଛନ୍ତି ଫ୍ୟାନ୍ସ । ସୋସିଆଲ ମିଡିଆରେ ପରିବାରବାଦ ପ୍ରସଙ୍ଗ ଉଠାଇ ଅଭିନେତା ସମର୍ଥନରେ ନଜର ଆସୁଛନ୍ତି ଅନେକ ଫ୍ୟାନ୍ସ ।
