ମୁମ୍ବାଇ: ଆରପାରିରେ କିମ୍ବଦନ୍ତୀ ଆକ୍ଟର ଋଷି କପୁର । କ୍ୟାନ୍ସର ସହ ଲଢି ଲଢି ଶେଷରେ ସେ ଶେଷ ନିଶ୍ବାସ ତ୍ୟାଗ କରିଛନ୍ତି । ବିଭିନ୍ନ ରାଜନେତା ଓ ଅଭିନେତାଙ୍କ ସହ ଦେଶ ବିଦେଶର ତାଙ୍କ ଅଂସଖ୍ୟ ଫ୍ୟାନ୍ସ ଏହି ଅବସରରେ ଶୋକପ୍ରକାଶ କରିଛନ୍ତି ।
ତେବେ ଏହି ସମୟରେ ତାଙ୍କ ଫ୍ୟାନ୍ସମାନେ ଏକ ନିଆରା ଟ୍ରେଣ୍ଡ ଆରମ୍ଭ କରିଛନ୍ତି । କିଛି ମଜାଦାର ଓ ଇମୋସନାଲ ଅନ୍ଦାଜରେ ସେମାନେ ରିଷିଙ୍କୁ ଶ୍ରଦ୍ଧାଞ୍ଜଳି ଦେଇଛନ୍ତି । ବିଗତ ଦିନରେ ରିଷିଙ୍କ ବ୍ଲକବଷ୍ଟର ଫିଲ୍ମ ମଧ୍ୟରୁ ଚାନ୍ଦିନୀ ଅନ୍ୟତମ । ଏଥିରେ ସେ ବିନୋଦ ଖାନ୍ନା, ଶ୍ରୀଦେବୀଙ୍କ ସହ ମୁଖ୍ୟ ଭୂମିକାରେ ଆକ୍ଟିଂ କରିଥିଲେ । ତେବେ ବିଡମ୍ବନାର ବିଷୟ ଫିଲ୍ମର ସମସ୍ତ ଷ୍ଟାର କାଷ୍ଟ ଏବେ ପରଲୋକରେ । ପୂର୍ବରୁ ବିନୋଦ ଖାନ୍ନା ଓ ଶ୍ରୀଦେବୀଙ୍କ ନିଧନ ହୋଇଥିବାବେଳେ ଗୁରୁବାର ଋଷିଙ୍କ ମୃତ୍ୟୁ ହୋଇଛି ।
ତେବେ ତାଙ୍କ ଫ୍ୟାନ୍ସମାନେ ଟ୍ବିଟରରେ ଚାନ୍ଦିନୀ ଫିଲ୍ମ ପାଇଁ ଷ୍ଟାରକାଷ୍ଟଙ୍କୁ ଧନ୍ୟବାଦ ଦେଇଛନ୍ତି । ଏହାର କାହାଣୀ ଓ ଗୀତ ସମସ୍ତଙ୍କ ମନରେ ଆଜି ଯାଏଁ ବି ଜୀବନ୍ତ ଅଛି । ଏପରି ଫିଲ୍ମ ଦେଇଥିବାରୁ ପ୍ରଶଂସକ ଶ୍ରୀଦେବୀ ଓ ରିଷିଙ୍କ ପ୍ରଶଂସା କରିଛନ୍ତି । ଏହାସହ ସେମାନେ କହିଛନ୍ତି ଯେ ଆଜି ରାତିରେ ସ୍ବର୍ଗରେ ଚାନ୍ଦିନୀର ପ୍ରିମିୟର ହେବ । କାରଣ ଫିଲ୍ମର ତିନି ଷ୍ଟାର ଏବେ ସ୍ବର୍ଗରେ । ତେଣୁ ସ୍ବର୍ଗବାସୀ ଏବେ ଚାନ୍ଦିନୀର ମଜା ଉଠାଇବେ ।
